Гудыртӥз кышкыт ож

Возь вылын – чебересь сяська­ос, синъёсты ик мальдыто. Кыӵе гинэ тусъёсын уг кисьтасько соос! Будосъёс но адямиосын ӵош ик шулдыръясько, лэся. Сяськаос пӧлын – пичиос. Погылляськыса, ватскыса шудо соос. Асьсэды небыт миндэрын кожало, дыр. Шулдыръ­яськон кык нунал ӵоже кыстӥськиз.

Вуиз турнан дыр. Калык то­лалтэлы пудо сиён дасян борды басьтӥськиз. Гуртоос огзы кыльытэк, пичиос но, та бадӟым уже пыриськи­зы: колхозысь пудолы дыраз турын дасяны вутсконо. Одӥг гуртын куинь бригада бере, турнасьёс но, турын октӥсьёс но куиньлы люкиськыса ужало. Школаын дышетскисьёс вал вылэ пуксьыса турын кыскало. Валъ­ёс чебересь, сэзесь. Пиналъёслы кельше асьсэ ужзы. Лымшор дыре соос ӵошатскыса сямен шур дуре валъёсты люктаны васько. «Пӧсь» дыре ӵукна сизьым часысен бер ӝытозь ужатэк уг луы. Пинал вор­дэм анайёс нуныоссэс пичыробоен сьӧразы нулло. Уж секыт ке но, турын дасясьёс жадёнзэс валатэк тыршо. Ӵошен кырӟаны но вутско. Кырӟаса жадем быре, шуо ук калыкын. Мыл­кыд капчи ке, уж но каньыл потэ. Серекъяны но дыр шедьто ужасьёс: яке азьвыл луэм серемес учырзы сярысь мадё, яке ог-огзэс юмоке уськытыны выро:

- Кут, Накия! Чальгес выры, ӝытозь та кабанэз йылъяны вутско­но. Чылкак нӥзили кадь выриськод.

Витьымтэ шорысь шундыпуксён палась кужмо тӧл пельтӥз. Сьӧд ӵын кадь тӧлпери лыктэ, бӧрсяз тузонэз бугыръяса вае. Будосъёсты ишка, возь вылысь турын бӧмъёсты инозь ик ӝутэ. Турын лёгись Накия кенакез тќл воксё огпала сэрпалтӥз. Кышкыт, нокин номыр карыны уг вала. Сьӧд пи­лем тани-тани ваньзэ ӵокталоз кадь. Югыт нунал уй кадь пеймыт луиз. Котырысь нокинэ, номыре адӟыны уг луы ни. Шӧдтэк шорысь чилектӥз: тыр толэзь югдытӥз, кожалод. Собере, быдэс дуннеез зуркатыса, гудыртӥз, ша-а-а-рк! карыса мае ке но ӵашйиз. Кыдёкын ик ӧвӧл писпуос тӥяськизы. Ведра дурен кадь кисьтыны кут­скиз, со бӧрсьы – йӧзор. Дыдыкпуз быдӟаесь соос.

Кабан сюрисьёс ваньзы огазе ӝиптӥськизы. Котькуд ӵашъемлы быдэ инмарез тодазы вайыса курись­ко. Турын октӥсьёс но писпуос пӧлы ватскиллям.

Малпамтэ шорысь зор ултӥвал вы­лын лыктӥсь кышномурт адӟиськиз: куинетӥбригадалэн бригадирез Гыдибей апай. Со воксё кӧсэктэмын, шокчемез но уг луы. Верано кылзэ но вераны уг быгаты, викышъяса бӧрдэ. «Война! Война!» - мырдэм вера со.

Адямиос паймемын. Пожар пуш­кысь мозмытскыса потэм выллем йырсазьзы сураськиз. Кышкыт йӧзор но соослы номыр кадь ӧз поты ни. Ваньзы гурт пала бызизы.

Быдэс гурт ӵаш! каре. Кудӥз пыд улысьтыз сюйез чиньыосыныз ӵабъяса бӧрдэ, кудӥз музъеме мыж­гаса сюлворе, кудӥз капка борды йыркышетсэ шуккылэ… Кышкыт суред. Нуныос гинэ но анайёссылэн гадь бордазы ӝиптӥськыса викышъ­яло. Соос но валало, шӧдо, лэся, малы анай бӧрдэ.

Ӵуказеяз быдэ вуэмъёслы но вор­горонъёслы военкоматысь повест­каос вуизы. Быриз гуртлэн чеберез, шулдырез. Нылкышноослэн ымныръ­ёсысьтызы пальпотонзы ышиз.Адя­миослэн сюлэмъёсазы вормонтэм кайгу каръяськиз. Сюлэм яра туж юн висе, пӧсьтыны вуэм пыктос выллем куректыса.

Нунал бӧрсьы нунал вордӥське. Воргоронъёс огез сьќры мукетыз фронтэ кошко. Гуртооссы соосты бӧрдыса келяло. Нуналлы быдэ сямен ӝожмыт кырӟан гуръёс чузъ­ясько.

Колхозлэн ужез дугдӥз. Возьёс мӧзмыт адско. Пӧртэм сяськаосын ке но соос шобырскемын, шулдыр­лыксы бырем. Нылкышноос, азьпал улонзэс малпаса, мур лулскыса шокчо. Кӧня пиналъёс атайтэк кылё, кышноос – картъёссытэк. Нош кин соосты сюдоз-вордоз? Кин соосты ужын воштоз? Котькуд корка кайгу куриське…

Кӧня ке нунал ортчыса, Тэмырез но военкоматэ вазизы. Ӧз, сое фронтэ ӧз басьтэ, кельтӥзы. Паллян кияз одӥг чиньыез тӥрен ӵогиськемын вал угось. Военкоматысь со шумпотыса бертӥз но кышноезлы вера: «Марьям, монэ ӧз басьтэ. Тани, та чиньые понна кельтӥзы. Нылпиослэн шудзы вормиз». Ӵуказеяз Тэмыр бадӟым агайзэ – Бакирбай Кучербаевез - ож­маськонэ келяз. Кӧня ке нуналскын экеезлы – Тимирбай Кучербаевлы – повестка сётӥзы.

Калык уж сярысь воксё вунэтӥз. Нунал – солдат келян. Ӧвӧлтэм сиён­зэс но, вань луэм коньдонзэс но гур­тоос фронтэ кошкисьлы сёто. Бӧрдон но бӧрдон. Ожмаськонэ мынӥсьёс кузпалъёсынызы, нылпиосынызы берпуметӥзэ адӟиськем выллем ке­лясько. Дор палъёсы берытскыны уз луы ни, дыр, шуо. Ӧвӧл ни урамтӥкап­чи мылкыдын вамышъясьёс. Ваньзы тушмонэз каргало.

Нуналлы быдэ нылкышноос пар валъёсын солдатъёсты Алкиное келяло. Отчы республикаысь призыв­ной пункт интыяськемын. Кыдёкын со, гуртлэсь 220-230 иськемын. Одӥг нунал куспын мыныса но уд вуы. Куд-ог дыръя уробоос но, пе, куажгало, тӥясько. Сыӵе дыръёс но луиллям: гуртоос уробооссэс куштыса, берен буш вал вылын берытскылӥллям.

Одӥг пол Уразбай Кандиев тракторен, дӧдьы кыскыса, фронтэ мынӥсьёсты Алкиное нуэм. Дӧдьылэн сюлыз пулэсь луэм бере, со воксё вужтӥськыса бырем, пе. Бертыку­зы дӧдьызэс Бирск вӧзысь гуртэ кельтӥллям. Ӵуказеяз берен мыны­са, дӧдьызэс тупатӥллям. Вераны кулэ, гуртысь воргоронъёс соослы юрттӥллям, тодмотэм адямиос шу­ыса улӥллямтэ, кузнечной цехын дӧдьы сюлэз «кышъяллям». Йырын малпан кылдэ: азьло макем тупаса улӥллям адямиос. Соин но, дыр, огъя кужымен тушмонэз вормыны быгатӥллям. Калыкын шуо: «Оген писпуэз тӧл но капчиен погыртэ, нош дэмен луыку нокыӵе тӧл но кышкыт ӧвӧл».

Троссэ фронтовикъёсты военной сборъёсы гуртысь Кунафия апай нул­лэ. Озьы, одӥг толэзь куспын гуртэ нылкышноос но быдэ вуымтэ пиос гинэ кылизы. Соос мар карыны ик уг тодо, кыӵе уж борды басьтӥськыны паймыса уло. Кинэ бригадире пуктод, кинэ – конюхе? Кин гыроз-кизёз? Кин сќриськем уробоосты, валъёслэсь сиес-тӥрлыксэс тупатъялоз? Кин тракторе пуксёз?

Ожмаськонэ мынымтэ Тэмыр колхоз ужъёсты радъян сярысь сюлмаське. Уго со пичиысен ик котьма ужлы дышыса будэмын, солэн котькыӵе ужлы киыз мынэ. Тужгес но яратоно ужез – лэсьтӥськон. Колхоз кылдэм бере ик, 1930-тӥарын, со строительной бригадаен кивалтыны кутскиз. Фронтэ басьтытозязы мар гинэ ӧз ӝуты. Бадӟым Качакысь се­милетней школаез ӝутонэ но Тэмыр трос кужымзэ понӥз. Уж борды рос-прос басьтӥськись воргоронэз усто ужамез понна 1935-тӥарын Москвае ВДНХ-е лэзизы. Отысь со трос чер­тежъёс ваиз. 1937-тӥарын Куразово гуртэ слесарной мастерской усьто. Отын но Тэмыр ужа, советской арми­лы куасъёс лэсьтэ. Гуртаз со – гажа­но адями. Адямиосын пумиськыкуз, со котьку вазиське, ӟечъяськытэк уг ортчы.Со котькинлы юрттыны, визь-кенеш сётыны дась. Ӝожтӥськид ке, соку ик буйгатоз, кыллы кисыяз пыраса уз улы.

Гуртысь воргоронъёс ож лудын. Тэмыр уйёсты но кӧлытэк ортчытъя, ялан малпаське: бусы ужъёсты но дыраз быдэстоно, фермаез но эскеро­но, валъёсты но утялтоно. Тупатъян ужъёс но трос люкаськемын. Ярам, колхозэн кивалтӥсьсы воргорон. Ба­кирбай Кунакбаев пересь ке но, ужез радъяны быгатэ.

Коньывуон толэзьлэн пумаз Тэмырез нош ик военкоматэ ӧтизы. Отысь со повесткаен бертӥз. Келясь­кыкуз со юн-юн вераз: «Марьям, пио­сыз ноку но мурт кышно вылэ эн сёты. Мурт кышно вылэ пыр но тыл вылэ пыр, шуо». Марьям ньыль пиосыныз но кык висись пересь воргоронъёсын огназ кылӥз.

Дмитрий НАСЫРОВ.

Калтасы ёросысь Покчи Качак гурт.