архив номеров

АРХИВ НОМЕРОВ

ПОСЛЕДНИЕ КОММЕНТАРИИ

Каталог предприятий

    развернутьсвернуть

    ВОПРОС-ОТВЕТ

      Гуртмы медаз «куасьмы» шур ву сямен

      2015.03.12 1005 0
      Гуртмы медаз «куасьмы»  шур ву сямен

      Каллен гинэ вамышъясько вордскем гуртэлэн урамтӥз. Пыд улын лымы ӟукыртэ. Кезьыт! Урамын чус. Коркаос шераллям: пересь песятайлэн ымысьтыз пиньёсыз выллем. Син азе гинэ пуктыны кылем на гуртэлэсь азьло туссэ.

      Сюлэмылы но, мылкыды­лы но шуг. Анайтэк, атайтэк кылёнэз секыт, нош гуртэд но ке быриз? Вазись но уз луы ни ук. Вормыны луоз-а таӵе кышкыт иворез?! Макем чебер но шулдыр гурт бырыны кулэ шат? Кытчы пыризы татын вордскем но будэм нылпиос? Кытчы соос пазьгиськизы? Кытчы палэнэ выжы лэзизы? Юн луоз меда выжызы?

      Котыр утчаськисько но чиньыосам лыдъясько, кӧня нылпиос будӥзы Шордин урамын: та коркан – вить пиос, кыкетӥяз – ньыль, куинетӥяз – куать. Азьлань­гес мынӥсько, та юртын – ньыль пи но кык ныл вал, нош таяз – кык пи но куинь ныл, сояз – тямыс пиналъёс. Кытын соос туннэ? Паймымон югдур.

      Калыкын шуо: «Юоно ош­месэд но гудӟемед (колодча­ед) куасьмизы ке, эн возьма ни азьпала мынӥсь улостэ». Та веранэн сэрен, йырын мал­пан кылдэ: оло Юг шурмылэсь ӵыпетсэ лэзьыку ик зыл-зыл кошкиз меда Бигиней гурт­лэн вань шудэз но луонлыкъ­ёсыз?!

      Ӵыпет. Вуко. Соос ӧвӧл ни. Пичи шурмы гинэ, секыт­лыкъёслы пумитъяськыса, мискинь кадь читыр-чутыр бызе но бызе кыдёке-кы­дёке. Син азе пуксе Юг шу­рысь тымет. Кӧня калыкез со сюдӥз, утиз, либатӥз, бордаз но кыскылӥз! Малы меда вакытаз нокин ӵыпетэз вы­льысь улӟытон сярысь куара ӧз потты? Вал уробоен, пы­дын, тачкаен ӵыпыса, вить арыкетӥ ӵашетыса виясь луиз вал та прудмы. Бӧрысь ини тракторез уже кыскизы, ӵыписькон уж соин капчияз. Со тракторен кема аръёс ӵоже ужаз Гарифуллин Латип агай. Кытчы, кыӵе уже гинэ сое ӧз косъялэ, воргорон котьку вутскылӥз. Аръёс ортчемъя, техника кужмояз, адямиос но трослы азьпала учкисесь луизы, нош тымет лэсьтыны ӧз ворме. Кужым­зы ӧз тырмы-а, дыр, кулэ ӧз каре-а, оло нош куронэн кивалтэтлы вазиськыны ӧз дӥсьтэ?

      Ӵыпет лэземын. Вуко дуг­дэмын. Шур куасьмон югдуре вуэмын. Яра кӧня ке посадка мерттӥзы. Вакытаз вукоямы кызьлы матэ гуртъёсысь пызь изӥсьёс ветлылӥзы. Та ӵыпетмы ик электричество но сётэ вал.

      Уз ни уялэ ву вылын юсьёс, уз ни будэ вусяська­ос, шунды пуксьыку ву вылын чиляса чабакъёс но уз ни шудэ. Озьы ик «куасьмоз» меда гуртэ? Уз ни жингыртэ шат ульчаосын но школаын пинал куараос? Эх, тодоно вал гуртэлэсь азьпал улонзэ, кыӵе луэмзэ. Огез ке но егит адями ӝутоз-а гуртэз пала синъёссэ? Сёты, Инмаре, ку­жым татын улӥсь адямиослы азьпал сюрессэс йыг-йыг лёганы.

      Лилия ГАРАЕВА.

      Татышлы ёросысь Арибаш гурт.

      Рубрики:

      Номер:

    • отправить другу
    • распечатать
    • Комментарии

      Имя
      E-mail
      Текст
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
      Отправить
      Сбросить