Аспӧртэм омыро Селигер

Та выллем форуме пияш нырысьсэ пыриськиз. Вылӥ дышетскон юртэзлэн ректо­ратэз сое отчы дышетсконын басьтэм вормонъёсыз но пӧртэм ужрадъёсы мыло-кы­до пыриськемез понна келяз. «Селигер» Казаньысь Энер­гетикая кун университетысь студентлэн лул-сюлмаз мур пытьы кельтӥз.

- Ми сизьым нунал ӵоже пӧртэм темаосъя дыше­тон курсъёсы но лекциосы ветлӥмы, ужрадъёсы пырись­кимы. Мынам быръем ӧре ЖКХ-ен герӟаськемын вал, - вера Александр Набиоков. - Со «Все дома» нимаськиз. Ужрадэ вуэмъёслы нимысь­тыз футболкаос, бейджикъёс сётъязы. Дисциплина туж чурыт вал. Кылсярысь, ӝыт построение ӝегатскыса вуид ке (со дыре Россилэн гим­нэз чузъяське), бейджикад одно ик пась лэсьтозы. Куинь пась люкаськемын ке - до­рад ширтод. Бертон сюресэд сярысь ачид сюлмаськоно луод: нокин, номыре уз ва­лэкты ни. Пӧламы сыӵеос но луизы. Селигерын ортчытэм нуналъёсты мон ноку уг вунэ­ты. Татын трос пыласькимы, байдаркаосын уямы, пляж­ной футболэн но волейболэн шудӥмы, Нилова Пустынь монастыре пырамы. Челя­бинскысь, Омскысь, Екате­ринбургысь, Тюменьысь трос выль эшъёс шедьтӥ. Тодмо рок-группаос концертъёс возьматӥзы.

«Селигер» форуме пы­риськисьёс асьсэлэсь про­граммаоссэс, проектъёссэс возьматыны быгато. Со понна татын вань луонлыкъёс кыл­дытэмын. Форуме лыктыны мылкыд карисьёс котьку трос луо. Татчы вуэмъёслы сертификатъёс сётъяло.

Мынам выльысь отчы вуылэме потэ. Селигер ты кунооссэ чебер инкуазь су­редъёсыныз паймытэ. Со легендаослы, преданиос­лы узыр. Татын улӥсьёслэн кылъёссыя, сям-йылолъёсыз сяна, тылэн аспӧртэм лулыз, аураез, пе, вань. Оло соин но, дыр, сюлэм ялан Селигере куриське. Малпасько, мыным отчы вуылыны кылдоз на.

Эльмира СИТДИКОВА.