icon_gotop
18+
autorisation
Войти | Регистрация
Время в Татышле
14:28
Пятница, 29 Марта
Рекламный баннер 990x90px top

Лулчеберетлэн зарни сиосыз

09:54 03.04.2014

Марафонэз радъяло БР-ысь Лулчеберетъя министерство, Калык творчествоя республика центр, «Культурный мир Башкортостана» интернет-портал, ёросъёсысь но городъёсысь администрациос.

Адямилэн улонэз, калык верамъя, вордӥськем шаер но лулчеберет бордысен кутске: шаередлэсь историзэ тодон но гажан, калык сям-йылолъёсты утён но азинтон бордысен. Кылсярысь, нуны веттась шудо анаймуртлэн мытэм гуръёсыз. Со ӧвӧл шат лулчеберетлэн одӥгез люкетэз? Шулдыр крезьгур, кырӟан пыр пинал лулчеберетлэсь сиоссэ «шӧмъя», дуннеез валаны, матысьёссэ тодманы дыше.

Лулчеберетлэн арезлэн инъетэз – со калык творчество пытьыос кузя вамышъяса, сям-йылолъёслэсь «зарни» пырыоссэ люкан но выль талантъёсты, усточиосты шараян но будэтон.

«Культурная столица Башкортостана» марафон куинь толэзь ӵоже 15 ёросъёсты ортчиз. Котькуд муниципал огазеяськон, Лулчеберетлэн арезлы сӥзем штандартэз возьыкуз, лулчеберетлэн шоркарезлы пӧрмылӥз. Та нуналъёсы пӧртэм ужрадъёс ортчылӥзы. Табере марафонлэн пытьыосыз кузя ортчоме удмуртъёс улоно ёросъёстӥ. Вакчияк тодматскоме Лулчеберетлэн арезлы сӥзем ужрадъёсын.

Нырысь Лулчеберетлэн арезлэсь штандартсэ Бирск ёрос басьтӥз. Нош 4-тӥ тулыспалэ благовещенскъёс Лулчеберетлэн арезлэн эмблемаеныз штандартэз Бурай ёросэ вуттӥзы (со сярысь газет бамъёсы гожъямы ни). Лулчеберетлэн арезлы сӥзем штандартэз бурайёс Кушнаренко ёросэ келязы.

7-тӥ тулыспалэ Сочи Тол олимпи шудонъёслэн шоркарзы луиз, нош Кушнаренко та ӝытэ лулчеберетлэн шоркарезлы пӧрмиз. Бадӟым концертэ люкаськем калык аспӧртэм сиослэсь пӧрмем крезьгур вылын лэйказ, кожалод. Учкисьёс ёросысь образцовой коллективъёсты, калык ансамбльёсты но нимысьтыз кырӟась-эктӥсьёсты шуныт пумитазы.

Ужрадлы тужгес аспӧртэм шӧм пыртӥзы «Соловушки» (кивалтӥсез Г. Ханнанова), «Яшьлек» (Р. Салахов), «Сан­дугач» (Ф. Нуриуллин), «Италмас» (Ф. Шаймутдинова), «Иштекэй» (Р. Салахов) фольклор коллективъёс но калык ин­струментъёсъя ансамбль.

Учкисьёс кужмо кичабонъёссэс кузьмазы марафонлэсь эстафетазэ вуттэм куноослы – Бурай культура юртысь «Дуслык» но «Эдельвейс» калык ансамбльёслы.

Вить нунал куспын штандарт ёросысь гурт поселениосы но вуылӥз. Та нуналъёсы гуртъёсын Лулчеберетлэн арезлы сӥзем уно ужрадъёс ортчизы.

12-тӥ тулыспал толэзе «Культурная столица Башкортостана» марафон Илиш ёросэ вуиз. Ужрад кибашлыослэн ужъёсынызы адӟытон бордысен кутскиз. Отын ёросын улӥсь калыкъёслэн туннэ нуналозь возиськем ужан тӥрлыкъёссы, дӥськутъёссы возьматэмын вал. Адӟытонын калык пӧръёсын, сиён-юонъёс но тодматскыны луиз.

Ёросын Лулчеберетлэсь арзэ усьтыса, БР-ысь культурая министр А. Шафикова шуиз: «Илиш музъем республикамы но шаермы понна трос таланто, котьмалы усто адямиосты будэтӥз. Татын лулчеберетлы сӥзем ужрадъёс котьку вылӥ дунъет сётымон ортчо».

Праздникез шулдыртыса, сцена вылын кырӟазы-эктӥзы ёросысь «калык» но «образцовой» нимъёслы кузё луэм коллективъёс но нимысьтыз кырӟасьёс. Учкисьёс кема чабизы на сцена вылысь усточиослы.

Марафонлэн штандартэз ёросын арня ӵоже улӥз. Со нуналъёсы ёросысь котькуд гурт поселениосын крезьгурен герӟаськем ужрадъёс луизы.

25-тӥ тулыспалэ арлэн тодметэныз штандарт калтасы музъеме вуиз. Ужрад «Вӧй келян» калык праздникен тупаз. Та нуналэ калтасыос Лулчеберетлэсь арзэ яркыт фейерверкен усьтӥзы. Чылкытлыклэсь но ӟечлыклэсь тодметъёссэ пусйыса, инме тӧдьы дыдыкъёс лобизы. Пӧртэм номеръёсын но жанръёсын тырмем концерт про­грамма учкисьёсты искусство дуннее вуттӥз. Зэмос кизили выллем сцена вылын пиштӥзы ёросысь «Холмичи» образовой театр, «Эрви» калык эктон ансамбль, «Сударушка», «Ший онгыр» калык вокал ансамбльёс, «Ингур» калык коллектив, «Зангари» вокал ансамбль но мукетъёс.

Калык творчествоя республика центрлэн филиалэныз кивалтӥсь А. Антипин, Калтасы ёрос администрациен кивалтӥсьлэн воштӥсезлы Д. Сайфугалиевлы вазиськыса, ёросын культуралэсь ӟеч азинскемзэ пусйиз, вуоноын но та ӧрез кужмо азинтыны куриз.

Лулчеберетлы сӥзем марафон улсын, ёросын «Час детского смеха» ужрад но «Папа, мама, я – музыкальная семья», «Калтасинский район – территория творчества» фестиваль-конкурсъёс радъяськизы.

28-тӥ тулыспалэ «Культурная столица Башкортостана» республика марафонлэсь эстафетазэ калтасыос татыш­лыослы сётӥзы. Ужрадэ Калык творчествоя республика центрлэн генеральной директорез Б. Ишбердин но пырись­киз. Со татышлыослы БР-ысь культурая министрлэсь А. Шафиковалэсь ӟечкылан кылъёссэ вуттӥз. Нырысь куноос Вылысь Татышлыысь шаертодонъя но историяя музеен, Нылпи творчествоя центрен тодматскизы. Бӧрысь ужрад Выль Татышлыысь культура юртын азинскиз. Татын куноосты «Вӧй келян» праздник вите вал. Татышлыос куноосты ческыт табанен, пӧсь чаен пумитазы-куноязы. Бӧрысь ужрадэз «Культура – сокровище человеческой души» концерт азьланьтӥз. Лулчеберетэн герӟаськем коллективъёс быгатонлыкъёссэс усто возьматэмен, та нуналэ учкисьёс выжыкыл дуннеын поръязы: яркыт тусо дӥськутъёс, задор эктонъёс, шулдыр кырӟанъёс, сюлэмез бугыртӥсь калык крезьгуръёс.

Татышлы музъем таланто адямиосыныз узыр. Лулчеберетлы сӥзем котькуд ужрадлы татын бадӟым саклык висъясь­ке. Туннэ нуналэ ёросын 20 культура юртъёс лыдъясько, 21 клубъёс, 28 библиотекаос, 2 шаертодонъя но историяя музейёс, Искусствоя школа но солэн вить филиалъёсыз. Татысь 14 коллективъёс «калык» нимлы кузё луэмын, ку­атез – «образцовой». Ваньзы соос республика но калыккуспо ужрадъёсы азинлыко пыриськыса, бадӟымесь вормонъёс уто. Татышлы музъемын вордӥськем А. Атнабаевлэн, З. Атнабаевалэн, С. Фатхутдиновлэн, Х. Фархилэн, М. Гариповлэн но мукетъёслэн нимъёссы котыре паськыт вӧлмемын.

Арлэн тодметэныз штандарт Балтач ёросэ 14-тӥ южтолэзе вуиз. Бадӟым ужрадэ 700- лэсь ятыр адямиос пырись­кизы, соос пӧлын луизы ёрос администрациен кивалтӥсь Р. Галлямов, «Роза ветров» калыккуспо конкурсын Гран- при басьтэм «Зульфия» эктон коллектив (кивалтӥсез Р. Хасанова),«Озон кой» республика конкурсын Гран-при утэм Р. Ахметова, «Туган тел» республика конкурсын вормись Р. Халиков. Ужрад улсын ёросысь Культура юртын «Со­звездие талантов» концерт радъяськиз. Отын пӧртэм калыккуспо, республика, ёрос конкурсъёсын вормисьёс бы­гатонлыкъёссэс возьматӥзы.

Янаул ёрос лулчеберет ужрадъёслы сӥзем марафонлэсь эстафетазэ вокалистъёслэн Радик Гареев нимо республика конкурсэнызы пумитаз. Конкурс ёросын ньылетӥ ползэ радъяськиз. Туэ ужрадэ республикалэн уйпал-шундыпуксёнпал ёросъёсысьтыз сяна, лымшорпал люкетаз улӥсьёс но пыриськизы. Ёросысь искусство юртын ӵукнаысен крезьгур жингыраз. Ӝытпал Гала-концерт ортчиз. Ужрад трос выль нимъёсты шараяз. Сцена вылэ потэм котькуд адями та нуналэ Радик Гареевлы тупаны тыршиз. Тросэз солэн репертуарысьтыз кырӟанъёсты быдэстӥзы. Тулыс выллем ик яркыт пӧрмиз концерт.

Лулчеберетлэн арезлы сӥзем эмблемаен штандарт Янаул ёросын тямыс нунал ӵоже «кунояз». Та нуналъёсы ёрос лулчеберетлы сӥзем ужрадъёслы узыр луиз.

Республикаысь уйпал- шундыпуксёнпал ёросъёстӥ ортчем марафонлэн эстафетаез Нефтекамскын «Ритмы времени Большого Урала» нылпиослэн калыккуспо бальной но эстрадной эктонъёссыя фестиваленызы йылпумъяськиз. Та фестиваль нырысьсэ 1993-тӥ арын радъяськиз. Со «Ритмы времени» нимаськиз. 1995-тӥ арын фестиваль республика ужрадлы пӧрмиз, 1997-тӥ арын – «Ритмы времени Большого Урала» калыккуспо фестивальлы. Туэ ужрадэ Бурай, Балтач, Киги, Мишкино ёросъёсысь но республикалэн 10 городъёсысьтыз 600-лэсь трос 9-16 аресъем нылпиос вуизы. Фестиваль куинь нунал ӵоже кыстӥськиз. Эктӥсь усточиосты учкыны 2000 адями лыктӥз.

…Нунал бӧрсьы нунал – лулчеберетлы сӥзем марафон но, ар но йылпумъяськозы. Нош крезьгур дунне котьку калык пӧлын улоз. Лулчеберетлы азинсконъёс сётозы будӥсь талантъёс.

Ирина САМИГУЛОВА,

Миляуша БУЛАТОВА.

8996

Оставить сообщение: