архив номеров

АРХИВ НОМЕРОВ

ПОСЛЕДНИЕ КОММЕНТАРИИ

Каталог предприятий

    развернутьсвернуть

    ВОПРОС-ОТВЕТ

    Добавить вопрос

    Имя
    E-mail
    Вопрос:
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
    Отправить

    ФОТОГАЛЕРЕЯ

    АНЕКДОТЫ

      Ас калыксэ вылӥе ӝутӥсь но данъясь

      2014.04.03 654 0
      Ас калыксэ вылӥе ӝутӥсь но данъясь

      Удмурт калык пӧлын но тодосчиосмы трос. Соос пӧлысь котькудӥз кулэ но данъяськымон уж бордын выре,сое сэрттон-пертчон вылысь, выль малпанъёс утча. Асьмелэн тодосчиосмы пӧлысь одӥгез тужгес гажаноез но дунъямонэз – Людмила Степановна Христолюбова. 26-тӥ южтолэзе Удмурт шаерысь Удмурт историяя, кылъя но литературая институтын, Дэри ёросын, Ижкарын, мукет каръёсын но гуртъёсын Людмила Степановналы сӥзьыса, пӧртэм ужадъёс ортчылӥзы. Та нуналэ тодосчи 75 арес тырмон юбилейзэ пусйиз.

      Людмила Степановна Кионгуртын (али дыре та гурт быремын ни, нош туннэ нуналэ со луысал на ке, Завьял ёросэ пырысал) вордскемын. Семьяязы соос вить нылпи вылӥллям, анай-атайзы нылпиоссэс адями радэ поттыны тыршиллям. Гуртсы удмурто-ӟучо луэмысь, Людмила Степановна пичиысен ик кык кыллы дышыса будэм. Со дорысьтыз нырысьсэ кошкем 1953-тӥарын, Можга педучилищее дышетскыны пырем бераз. Сое йылпумъяса, 1957-тӥ арын Иж ёросысь Вуж Сентег школаын покчи класъёсты дышетон бордын ужам. Нош ар ортчыса, егит дышетӥсь Удмурт кун педагогикая институтысь соку гинэ усьтӥськем историяя но филологияя факультетэ дышетскыны пырем. Нош берло сое ӟеч дышетскемез понна институтэ дышетӥсь луыса ужаны кельтӥллям.

      Студент дыръяз со институтын дышетӥсь Иван Васильевич Таракановен (туннэ нуналэ – асьмелэн тодмо кылъя тодосчимы, профессор, филологияя доктор) пумиськылэм. Со егит нылашлы азьпалан дышетскыны, этнография удысын ужан борды кариськон сярысь малпаськыны ӵектэм, малы ке шуоно асьмелэн удмурт этнографъёсмы чик ӧвӧл на, пе. Соку таӵе удыс сярысь Людмила Степановна трос ик уг тоды вылэм, соин сыӵе уж борды кутӥськон сярысь мылкыдыз ляб луэм. Нош лекциослы дасяськон понна, со библиотекае ӵемысь ветлэм, соку этнографияя литература сярысь тунсыкъяськыса юам. Отын, пе, та удысъя книгаос но статьяос трос ӧй вал на. Азьпалан дышетскон понна солы кулэ вылэм программа, кудзэ курыса со Москвае этнографияя институтэ гожтэм. Дасяськем бераз отчы ик аспирантурае дышетскыны пырем. «Семейные обряды удмуртов: свадьба, родины, похороны (Опыт количественной характеристики)» диссертацизэ туж тодмо этнографлэн В.В. Пименовлэн кивалтэмез улсын гожтэм но 1971-тӥ арын сое утем.

      Людмила Степановна 1970-тӥ арын Москваысь бертыса туннэ нуналозь Удмурт институтын тырше. Со тодосчи луыса ужамез сяна, этнографияя но этносоциологияя секторлэн кивалтӥсез, институтлэн учёной секретарез вал. Солэн эскерем темаосыз туж пӧртэмесь но паськыт: вашкала но али дыр улон, удмурт этнографилэн азинскемез, историография, этносоциология, этнокультурной но кылъя воштӥськонъес, этнографиын выль уже кутон амалъёс но туж трос мукетъёсыз. Та темаосъя гожтэм ужъёсыз: «Удмурты: Этносоциологические очерки» (Ижевск, 1976; огъя мукет авторен), «Семейные обряды удмуртов: Традиции и процессы обновления» (Ижевск, 1984), «Народы Поволжья и Приуралья: Коми. Марийцы. Мордва. Удмурты», серия «Народы и культуры» (М., 2000; огъя мукет авторен).

      Туннэ нуналэ Л.С. Христолюбова туж тодмо тудосчи, сое но солэсь ужъёссэ данъяло асьме дорын но кунгож сьӧрын, мӧйы тодосчиос но егитъёсыз. Солэн 200-лэсь трос наука удысын гожтэм книгаосыз но статьяосыз потэмын. Тросэз эскерем ужъёсыз воксё выль темаос луо, кудъёсызъя татчыозь номыр но утчамын-поттэмын ӧй вал. Соос пӧлы пыре «Учёные – удмурты» библиографической справочник (Ижевск, 1997; 860 б.).

      Берло аръёсы со удмурт кышномуртъёслэсь кӧня ке даур ӵоже азинскем улон сюрессэс эскериз. Людмила Степановна удмурт нылкышноослэсь биографиоссэс люказ, соослэсь улэм-вылэм историзэс, ужын тыршемзэс но вормонъёссэс эскериз. Таӵе эскерон ужъёссэ йылпумъяса, со «Удмуртские женщины. ХХ век. Биографический справочник» (Ижевск, 2002) но «Женщина в удмуртском обществе. ХVIII -начало XXI в» справочник поттӥз (Ижевск, 2006). Нош ӝоген удмурт кышномуртъёс-трактористкаос сярысь выль книгаез потоз – та темая туннэ нуналозь нокинлэн ужез поттэмын ӧй на вал.

      Котькуд лыдӟисьлы тодмо луо солэн книгаосыз: «История этнографии удмуртов: Краткий историографический очерк с библиографией» (Ижевск, 1984; огъя мукет авторен); «Этнография удмуртов» (Ижевск, 1991; огъя мукет авторен, 2 пол поттэмын, ватсаса 1997-тӥарын); «Калык сямъёсты чакласа» (Ижевск, 1995).

      Тодосчиослы тодмо, туж ик капчиен уг сетӥськы мукет коллегаосын огъя мае ке гожтон уж. Сыӵе эскеронъёсты быдэстыку, ог-огедлы юрттон, малпанъёсты шараян, мукетъёсын ӵош огдыре ужез йылпумъян но огсюлмысь тыршон сямъёс туж кулэ луо. Л.С. Христолюбова но одӥг гинэ огъя быдэстэм энциклопедиос но монографиос бордын ужамын ӧвӧл. Тани соос пӧлын луись ужъёс: «Удмурты: историко-этнографические очерки» монография (Ижевск, 1993); «Удмуртская Республика» (Ижевск, 2000); «Удмуртская мифология» (Ижевск, 2003); «Феномен Удмуртии» 9 томен (10 ста­тьязэ гожтэм, кӧня ке томзэ люкасез но 9-тӥтомезлэн научной редакторез) энциклопедиос; поръёслэн, мордваослэн но удмуртъёслэн вашкала культураоссыя финской энциклопедия (Marit, morvalaiset ja udmurtit. Perinteisen kulttuurin tietosanakirja / Päätoimittaja Ildiko Lehtinen. Suomalaisen Kirjallisuuden Seura. Helsinki, 2005) (Людмила Степановна 21 статьязэ гожтэм).

      Туннэ нуналозь Л.С. Христолюбовалэн улон сюресэз синмаськымон. Со – вылӥдунъям тодосчи, калыкын тыршись, история наукаосъя кандидат, валтӥсь этнограф, трос пӧртэм дуно нимъёс но премиос басьтэм адями. Людмила Степановна – туж кужмо сямо кышномурт, кыл кутыны быгатӥсь, секыт уж борды капчиен кутскыса сое быдэстӥсь но вуттӥсь, огъя ужлы вань мылкыдзэ сётыса тыршись, оскымон адями, котьку юрттыны дась, ас калыксэ вылӥе ӝутыны но данъяны тыршись.

      Гажано юбилярмылы сюлмысь ӟечкыланъёс вераськом, юн тазалык, малпам ужъёссэ капчиен быдэстыны луонлык но кузь улон сӥзиськом.

      Татьяна МИННИЯХМЕТОВА,

      философияя доктор.

      Инсбрук.

      Номер:

    • отправить другу
    • распечатать
    • Комментарии

      Имя
      E-mail
      Текст
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
      Отправить
      Сбросить

    Свежий номер

    Факты

    ПАРТНЕРЫ

    Поздравления

    Гороскоп