архив номеров

АРХИВ НОМЕРОВ

ПОСЛЕДНИЕ КОММЕНТАРИИ

Каталог предприятий

    развернутьсвернуть

    ВОПРОС-ОТВЕТ

      Пудо сиён ке ӟеч, скал но йӧло-вӧё

      2014.03.20 1609 0
      Пудо сиён ке ӟеч, скал но йӧло-вӧё

      Кылем арын Башкортостан Республикаысь гурт удысэз азинтонлы сизьым миллиард манетлы матэ кун юрттэт возьматэмын. Со сяна, гурт калык «500 ферм» программалэсь но ӟечлыксэ шӧдӥз ни. Уго ар но ӝыны дыр куспын та программа улсын республикаысь 130-лэсь ятыр фермаос тупатэмын яке ӝутэмын. Со йӧл дасянлэсь ӟечлыксэ шӧдскымон ӝутӥз. Озьыен, хозяйствоослэн табышсы но будӥз. Соин, вылды, программае пырыны мылкыд карисьёслэн лыдзы йылэ. Тросаз гурт хозяйствоосын арлы йылпумъянъёс лэсьтон собраниосын со сярысь но кылпум ӝутылӥзы.

      Татышлы ёросысь «Рассвет» АО-ын кылем арын тупатӥськон ужъёсты ик та кун программая быдэстӥзы ни. Соос Кызыл-Яр фермалэсь одӥг корпуссэ выльдӥзы.

      Кылем арын рассветъёс одӥг гектар музъемысь огъя 19,5 центнер ю тысь но пудо сиён басьтӥзы. Ёросысь мукет хозяйствоосын ӵошатыса, та лыдпус шӧдскымон вылӥынгес луэ. Но рассветъёслэн ю тысьсы 2012-тӥ арлэсь трослы ӧжытгес люкаськем. Озьы ке но со йӧл дасяназы ӧз шӧдӥськы, та ласянь лыдпусъ­ёс йылӥзы гинэ. Со сяна, солэн ӟечлыкез но туж вылӥын лыдъяське. Татын туннэ котькуд скалзылэсь шор лыдын 5440 килограмм йӧл дасяло (2012-тӥ арын – 5396 кг).

      Берло аръёсы «Агро-Танып» СПК-ын но котькуд гужем ӝутӥськон-тупатӥськон ужъёс нуисько. Кылем арын таныпъёс машинно-тракторной мастерскойлэсь липетсэ, кунян утён гидзэс тупатӥзы но мукет чыры-пыры ужъёсты быдэстӥзы. Нош тужгес секыт йӧтӥз, вылды, куайытоно пудоослы нимысьтыз гид тупатон. Таныпъёс сое быдэсак туала куронъёсъя ужаны тыршизы. Нош туэ соос кысконо скалъёсты выль юртэн шумпоттыны малпало. Со понна огъя 10 млн коньдон кулэ луоз. Солэсь куать миллионзэ хозяйство ачиз поттыны малпа, нош кылемез пумысен «500 ферм» программалы оско. Татын тодо угось: быдтэм коньдон азьланяз ӟеч табышен берыктӥськоз. Таныпъёс сое арлы быдэ сямен ас вылазы шӧдо. Кылем арын соослэн, кылсярысь, йӧлзылэн бадӟым люкетэз вылӥ сортэн кошкиз. Озьы таныпъёс йӧллэсь 16 млн 493 сюрс манет табыш пыртӥзы. Со огъя поттэм коньдонзылэн 69 процентэз луэ.

      Кылем арын татын ужасьёслэсь уждунзэс но 18 процентлы будэтыны быгатӥллям. Озьы скал кыскисьёслэн уждунзылэн шор быдӟалаез 9417 манетлы ӵошаз, кунян утисьёслэн – 6994 манетлы, трактористъёслэн 7151 манетлы. Со сяна, та лыдпусъёс вӧзы пӧртэм коньдон премиос ватсаськизы на. Нош «Агрофирма «Дэмен» СПК-ын та ласянь секытгес йӧтӥз. Хозяйствоен кивалтӥсь Рустэм Ренатович Галямшин со пумысен шуиз:

      - Тросгес коньдон ке быдтӥськом, уждун но ӧжытгес басьтӥськом. Соин хозяйствоын котькуд удысын коньдонэз шыръяны тыршоно, ужлэсь ӟечлыксэ будэтоно.

      Кылем арын татысь ужасьёслэсь тыршемзэс дунъяны огъя куать миллионлэсь ятыр коньдон висъяллям. Со сяна, уждун чотын турын, сӥль, чечы, кунян сётъяллям. Со куинь миллион манетлэсь ятыр усем. Дэменъёслы ар секытэн ке но сётӥськиз, соос азязы пуктэм ужпумъёссэс быдэстыны быгатӥзы. Озьы ке но собраниын фуражзылэн тырмымтэез пумысен сюлмаськонзэс веразы. Уго татын ю тысьсы центнерысьтыз шор лыдын 12,4 центнер гинэ усиз. Зэм, кылем арын та лыдпусъёс нокинэ ӧз шумпоттэ. Сиёнлэн ӟечлыкенызы ик, оло, герӟаськемын дэменъёслэн йӧл кысконзылэн быдӟалаез но, ӟечлыкез но. Кылем арын соос трос йӧлзэс нырысетӥно кыкетӥ сортэн келязы. Со хозяйстволы трос ыштонъёс ваиз. Соин, вылды, хозяйствоен кивалтӥсь но собраниын азьланяз ужлэсь ӟечлыксэ ӝутон ласянь трос пол кылпум ӝутылӥз. Со сяна, таиз арысен соослэн уж дуразы шӧдскымон воштӥськонъёс луозы – ужзэс нуыны Уфаысь инвестор юрттоз. Соослэсь кужымзэс дэменъёс та нуналъёсы ик шӧдӥзы ни – пудоосты ӟеч сиёнэн сюдыса, йӧл кысконлэн быдӟалаез нуналысь нуналэ йылэ. Озьыен, хозяйстволэн кассаяз но тросгес коньдон пыре. Со уждунлы но тырмыны кулэ. Татын азьланез сярысь но сюлмасько ни – дэменъёс элитной кидыс басьтыны малпало, удобрени­ен но кулэяськонъёссыя тырмытозы. Со сяна, скалъёсты искусственной амалэн бызьылытон бордын ужало ни. Озьы ке но хозяйствоез коньдонэн гинэ азьлане уд нуы, калыклэн тыршемез но кулэ. Янаул но Калтасы ёросъёсысь «Победа» ООО-осын но сое азьвылгес ни шӧдӥзы. Секыт югдуре шедем хозяйствоосты инвестор Агрохолдинг «Кристалл» ООО ас бурд улаз басьтӥз. Кылем арын Янаул ёросысь победаослэн валче ужзы ӟеч пӧрмиз. Соос ю тысь октонын но, пудо вордонын но азинлыко тыршизы. Со понна инвестор устооссэ ужасьёсты, кылсярысь, холодильникен, телевизорен, планшетной компьютеръёсын но мукет дуно кузьымъёсын данъяз. Нош бусы ужъёс вакытэ столовойын дун тырытэк нуналаз кык пол пӧсь сиёнэн сюдӥзы. Фермаын ужасьёс но воштӥськонъёсты шӧдӥзы – табере соосты уж дуразы «вахта» нуллэ. Хозяйствоязы выль «ГАЗель» микро­автобус басьтӥзы.

      Татын хозяйствозылэн вуоноез сярысь но сюлмасько. Озьы Шудек школалы кылем арын «Кристалл» крезьгуро оборудование сётӥз, нош устоосыз 20 дышетскисьёс толшор - куарусён толэзьёсы 1000 манетэн «стипендия» басьтылӥзы. Нош туэ гурт удысъя пӧртэм дышетскон юртъёсы пырем студентъёсты шумпоттыны малпало. Зэм, со понна дышетсконэз йылпумъямзы бере соослы «Победа» ООО-е ужаны берытсконо луоз.

      Кылем арысь оштолэзе Калтасы ёросысь «Кизили» СПК-ын ужасьёс но мур малпаськонэ усизы. Соосты гуртазы инвесторъёслэн вуэмзы туж шугъяськытӥз. Нош туннэ та выллем воштӥськонъёслы, оло, тросэз шумпото ни, дыр. Инвесторъёс вуыку, хозяйствоын 245 йыр пудоос лыдъяськизы. Нош туннэ соос «Победа» ООО-ын (озьы нимаське табере хозяйствозы) 700 йырлы вуизы ни. Нуналлы быдэ кык тонналэсь трос вылӥсортэн йӧл вузало. Со понна гужем трос пудо сиён дасязы. Со сяна, татын пудоослэсь выжызэс воштон сярысь но уг вунэ­то. Нош туэ «500 ферм» программае пырыса фермазэс выльдон сярысь малпасько. Ужасьёссылы но уждунзэс дыраз тырон, ужзэс капчиятон сярысь сюлмасько.Озьы калык но, оло, берен гуртэ берытскон сярысь малпаськоз…

      …Пӧртэм хозяйствоос, пӧртэм югдур. Но соос пӧлысь котькудаз гурт калыклэн сюлмысь тыршемез, азьланяз но кунмылэн юрттэт возьматэмезлы оскемез шӧдӥське.

      Дасяз Ольга НИГАМАТУЛЛИНА.

      Номер:

    • отправить другу
    • распечатать
    • Комментарии

      Имя
      E-mail
      Текст
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
      Отправить
      Сбросить