Кыӵе выльдӥськонъёс луозы огъя кун экзаменын?

Россия Федерациысь котькуд шор ёзо школаосын общественной наблюдате­льёс пукозы: экзамен сётон интыосы видеонаблюдениос юнматӥськозы, экзаменъ­ёслэсь ортчемзэс «федерал наблюдательёс» эскерозы. Куд-ог регионъёсын, кисыын нуллон телефонъёсын пайдаяськыны луонтэм вылысь, глушительёс пуктозы.

«Котькуд экзамен сётон интые видеонаблюдениос, видеофиксациос юнматӥмы ке, анай-атайёс но нылпиоссылэсь ужамъёссэс меӵак эфирын эскерыны быгатозы. Соин сыӵе арбериос котькуд школаын луозы. Ваньзы куронъёсты тӥятэк экзамен сётыны дышизы ке, эскерон арбериосын пайдаяськонэз уз луы», - вераз РФ-ысь дышетонъя но наукая министр Дмитрий Ливанов.

Выльдӥськонъёс сярысь. Нырысетӥез: азьвыл ЕГЭ-лэн баллъёсыныз кык ар пайдаяськыны луэ ке вал, табере соосты ньыль ар уже кутыны луоз.

Озьыен, выпускникъёслэн ньыль пол вузъёсы пырыны луонлыкъёссы кылдозы. Кыкетӥез: ЕГЭ-е дасяськон курсъёс радъямын луозы. Льготаоссы луэм нылпиослэн курсъёсы вуылэмзы понна, кунмы коньдон юрттэт возьматоз. Куинетӥез: быдэсросси олимпиадаосын вормисе потэмъёсты, калыккуспо олимпи­адаосы пыриськемъёсты вылӥдышетскон юртъёсы экзаменъёстэк кутозы. Соос документъёссэс одӥг вузэ гинэ сётыны быгатозы. Ньылетӥез: кун юрттэт возьматэм улсын, вылӥдышетскон юртъёсын тодон-валан басьтыны быгатозы сӧсыр нылпиос, I но II группаосысь сӧсыръёс, военной действиосын сӧсырмемъёс. Витетӥез: ЕГЭ-лэн вариантъёсыз азьвыл сямен зонаосъя (Центр, Урал, Сибирь, Дальний Восток) уз люкиське, часовой поясъёсъя люкемын луозы.

2014-тӥарын Рособрнадзор, куронъёсты тӥясьёсын нюръяськон вылысь, социальной сетьёсын кусып юнматоз. Соос пӧлын луозы «ВКонтакте», «Одноклассники», «Мой мир» сетьёс. Озьыен, туэ экзамен заданиосты интернет бамъёсысь шедьтыны уз луы. Ӵошен ужан пайдаё луоз: ЕГЭ-лэн йыл­пумъянъёсызъя нылпиослэн зэмос тодон-валанъёссы шараяськозы.

Рособрнадзор ивортэ: анай-атайёслы, дышетӥсьёслы, дышетскисьёслы ЕГЭ-лэн но ГИА-лэн заданиоссы сярысь интернетэ потэм иворъёслы осконо ӧвӧл. Сыӵе ялонъёс арлы быдэ сямен пумисько. Оскисьёс берло асьсэос ик ӝоже усё. Юнме шорысь коньдонзэс кисьто уга.

Туннэ нуналэ итоговой со­чинение сярысь но вераськонъёс паськыт вӧлмемын. Та сярысь РФ-лэн Президентэз Владимир Путин Федерал Собранилы Вазиськоназ ивортӥз. «2015-тӥ арын школаез йылпумъясьёс сочинение гожтозы. Солэн ӟечлыкез вылӥдышетскон юртэ пырыку одно ик лыдэ басьтӥськоз», - пусйиз Президент.

Дасяз

Зинира САДЕРТДИНОВА.