Тодмо гожъяськисьёс куное вуылӥзы

Ульфат Бадретдиновлэн творчествоезлы сӥзем презентация возьматон, кылбуръёссэ лыдӟон, «Ӵушъял веньёстэк вордӥське» книгаезлы анализ лэсьтон, пумиськонэз кемалы тодэ кыльымон каризы. Лыдӟисьёс писательлы пӧртэм юанъёс сётъязы, кылдытэм геройёсыз пумысен вераськизы-кенешизы. Ульфат Шайхутдинович произведениосыз пумысен малпанъёссэ шара вераз, котькуд юанлы пыр-поч валэктон сётӥз. Люза Бадретдиновалэн творчествоезлы сӥзем вераськон но тунсыко пӧрмиз.

- Кырӟанъёслы пӧрмем кылбуръёс, кызьы соос пӧрмо но калыке вӧлмо? Выль кылъёс, кызьы соос улонэ пыӵало? Гожъяськон мылкыд, кызьы со вордске? – та выллем юанъёслы Люза Геннадьевна валэктон сётӥз. Куноос дорамы кузьымъёсын вуиллям. Авторъёслэн выль книгаоссы автографенызы библиотекае но пумиськонэ лыктэмъёс кие кылизы. Со сяна, «Удмуртия» издательствоен поттэм выль книгаосты басьтыны луиз. Пумиськонэ Янаул ёросысь удмурт школаосысь дышетӥсьёс, дышетскисьёс, библиотекаосын ужасьёс лыктӥзы. Соос тодмо писательёсын кенешыны, выль ужъёсынызы тодматскыны но удмурт литература сярысь лулысь-сюлмысь вераськыны быгатӥзы. Ужрадэ Баш­кортостанысь удмуртъёслэн НКЦ- енызы кивалтӥсьлэн Янаул ёросъя воштӥсез Ю. С. Саитов но пыриськиз. Библиотекаын пумиськон мур пуштросо но пайдаё пӧрмиз, лыктэмъёслы шуныт мылкыд кузьмаз.

Вероника ФАЙЗУЛЛИНА.

Янаул ёрос.