icon_gotop
18+
autorisation
Войти | Регистрация
Время в Татышле
05:19
Пятница, 29 Марта
Рекламный баннер 990x90px top

Вунонтэм аръёс но малпанъёс

13:26 13.02.2014

Служба сюрес вуттӥз Афганистанэ

Татышлы ёросысь Бигиней гуртын вордскыса будэм Евгений Гильфановлэн службаез Афган ож аръёсы тупам. 1986-тӥ арын со Родинамес утисьёслэн радазы султэм. Учебкаез Туркмениын, Каракум пустыняын, ортчем. Со танкъёсты нуллэм, механик-водитель вылэм. «Гужем 28-34, интыен-интыен 50 градусъем пустыняын лумбытэн вутэк, сиёнтэк ортчытэм нуналъёс но луизы. Сыӵе эскеронъёсъя ик валатскимы, милемыз оже дасяло шуыса. Учебкалэн берпуметӥ нуналъёсаз Афганистанэ мынон сярысь ивортӥзы», - тодаз вае Евгений Петрович.

Афган музъеме вуонэз сярысь солдат куректымтэ. Пичи дыръяз войнаен шудыса будэм пияшлы зэмос оже пыриськон тунсыко потэм. 15 солдатъёсты нимысьтыз разведовательной батальонэ бырйиллям. Евгений Гильфанов но соос пӧлын луэм. Афганистанэ вуытозязы солдатъёсты отысь калыкъёслэн сям-йылолъёсынызы, вераськон амалъёсынызы, тунсыкъяськонъёсынызы тодматӥллям. Разведчикъёс особистъёсын, ожмаськонэ пыриськисьтэм калыкен кусып возиллям. «Афган калыкен кусып возимы ке но, соослы ваньзэ оскыны уг луы вал. Кин тодэ, кыӵе соослэн малпанъёссы? Нуназе ӵошен чай юод, нош уйин соос ыбылыны но быгато вал. Талибъёс пальпотэмез, серекъямез уг валало вал. Со понна соку ик вийыны дась вал соос», - вера Е. Гильфанов.

Разведкаын

«Тани милемыз, разведчикъёсты, вертолётэн кыӵе ке но гурезе вуттӥзы. Татын ми караванэз витьыны, пе, кулэ. Бӧрысь – эскероно. Нош ку со караван татӥ ортчоз, тодмо ӧвӧл. Соку Афганистанысь Иранэ наркотик, пыӵал тӥрлык ӵем потто вал. Законэз тӥясьёс шедё ке, соосты дивизие вуттӥськом вал. Вераны кулэ, милям ужмы особистъёстэк пайдаё ӧй луысал. Соос интыосты умой тодэмен, сюресъёсын уг янгышало вал. Куддыр ог-огеныд вераськытэк, вырӟылытэк пукон дыръёс но луылӥзы», - ортчем аръёссэ тодаз вае ветеран.

«Таӵе учыр но вал, - веранзэ азьланьтэ Евгений Гильфанов. – Кыдёкын ӧвӧл душманъёс танкез, пе, пуштытӥллям. Милемлы отчы мыныны ӵектӥзы. Син азе кӧшкемыт суред «вӧлдӥськиз». Тани одӥгез эше киосаз сапег кутыса бызе, басьты, пе. Мон нокыӵе кариськытэк сапегъёс борды кыстӥськи. Огдырлы шоканэ ик пытсаськиз, сюлэм но дугдӥз кадь. Сапегъёсты киысьтым уськытӥ: пуштэм танкысь солдатлэн пыдъёсыз отын вылэм. Таӵеез куке вунэтод шат?»

Чикчиран. Кандагар. Герат

Та интыосын Евгений Петровичез тодаз кылем кышкыт суредъёс, ноку вунонтэм малпанъёсыз, бурмисьтэм «яраосыз» герӟало. Кӧня вир кисьтӥськемын? Кӧня егит солдатлэн улонэз пыраклы чигемын? «Чикчиранын мон нырысьсэ бадӟым боевой действиын луи. Батальонмес душманъёс киултӥллям вал, соосты мозмытыны мынӥмы. Котырак ыбылӥсько, пуляос шуласа лобо. Афганистанын милям «дедъёс», «ветеранъёс» ӧй вал. Котькудмы понна ми сюлмысь, асьмелэн улонмы сярысь малпаськытэк ожмаським. Ма ӵектэмын, сое одно ик быдэстоно вал», - вера Евгений Петрович.

Кандагарын ожмаськемзэ но со уз вунэты. Татын тросэз солдатъёс тупаса улӥсь калыкъёсты душман ки улӥсь мозмытон понна улонэн люкиськоно луиллям.

Гератын Евгений Петрович ранение басьтэм. Паллян пыдаз осколок шедем солдатэз госпитале келяллям. Вирзэ трос ыштэмен, солэн яраез ӝог бурмымтэ. «1988-тӥар, куартолэзь. Службалэн берпуметӥ нуналъёсаз ми командующиез Борис Громовез сопровождать кариськом вал. Перестрелкае шедим. Роталэн ӝыныез гинэ отысь улэп потӥз. Тросэз пиос, улонэн люкиськыса, вордскем палъёсазы цинк гробын бертӥзы», - вера Е. Гильфанов.

- Нош дорысьёсты тодӥзы-а секыт югдуре шедемды сярысь?- юаны дыртӥсько Евгений агайлэсь.

- Зэмзэ ке верано, матысьёслы гожтэт ыстэме ик уг поты вал: война сярысь анайлы гожтонэз капчи шат? Доре гожтэт кык толэзьлэсь кема вуылӥз. Куддыр почтаен самолётэз но инмысь ыбыса уськыто вал. Соку ини ыстэм гожтэт но ыше. Гожтэтъёс кема вуымтэен, анай ёросысь военкоматэ но вазиськылэм. Бырыны шедем шуыса малпам, лэся.

Кандагарын, Гератын луэм боевой действиосы пыриськемез понна, солдатэз «За боевые заслуги» но «За отвагу» медальёсын пусйизы.

Вордӥськем шаер

Самолётъёс луымтэен, бертон нуналзэ Евгений Петрович кык толэзьлэсь ятыр витёно луэм. 1988-тӥ арысь пӧсьтолэзе со вордскем палъёсаз вуэм. Кематэк солдатлэн каньыл улон сярысь сайкыт малпанъёсыз тӧлӟиллям. «Перестройка вакыт. Гуртын номыр ӧвӧл. Афганистанын милемлы каньыл улон сярысь верало вал. Котькытын льготаос луозы, улон интыен юрттозы шуыса оскытӥзы. Вордӥськем шаере бертыса улыны кутски – чылкак мукет суред», - куректыса вера Евгений Гильфанов.

Евгений Петровичлэн Афган ожысь берытскем дырысеныз 26 ар ортчемын ни. Со ялан улон юрт сярысь малпанъёсын улэ. Та муген со кытчы гинэ вуылымтэ, кинлы гинэ вазиськымтэ, котькытын «ӧжыт витёно луоз», пе, шуо. Егит дыръяз секытлыкъёсты пыр потэм воргорон ӟечезлы осконзэ уг ышты. Матысь дыре интыысь кивалтэт солэсь семьязэ выль юртэн шумпоттоз шуыса улэ.

Миляуша БУЛАТОВА.

Татышлы ёрос.

5863

Оставить сообщение: