Ужан аръёссэ Владимир Галиханович Каймашабаш школаысен кутскем. Кумертауысь физкультурая училищеез йылпумъяса, физкультурая но трудъя урокъёсты нуэм. Нош кык ар ужамез бере вордскем гуртаз выль школае ужаны бертэм. Физкультура но спорт понна сюлмыныз юн «висись» дышетӥсьлэн сюлмаськонэз трос пӧртэм луэ. Дышетӥсь пиналъёсты спортэн юн герӟаны, НВП-я тодон-валанзэс муромытыны, пиосты армие мыныны дасяны, ӟеч тодон-валан сётыны тырше.
- Ужан аръёсады берытскыкуды, ма тужгес тодады лыктэ? – юасько Владимир Галихановичлэсь.
- Выпускникъёсы шаермылэн пӧртэм сэрегъёсаз уло. Дышетоно предметъёсы физкультураен, спортэн герӟаськем бере, урокъёсам юн кариськоно вал. Спорт жалямез кулэ уг кары, ӵошатсконъёсын пиналъёс вань кужымзэс, быгатэмзэс возьматыны кулэ. Пыдын, куасэн бызьылонъя, ыбылӥськонъя ужрадъёсы пиналъёсты дасяку, нормативъёсты быдэстыны быгатонзы сярысь сюлмаськи. Пиналъёслэсь ӵошатсконъёсысь вормыса бертон мылкыдзэс пуромытыны тырши. Ужаны кутскем дырысеным трос вормонъёс луизы, пиналъёс республика, ёрос ӵошатсконъёсы пыриськылӥзы, – вера Владимир Галиханович.
Школаысь стендъёсын пӧртэм кубокъёс, лыдъяса быдтонтэм дипломъёс но грамотаос аръёсын люкам бадӟым вормонъёссы сярысь верало. Пиналъёс строевой дасьлыкъя, ыбылӥськонъя, полиатлонъя котьку нырысетӥос пӧлын луизы. Вуж Варяш школаез йылпумъям пиос пӧлын улонзэс военной училищеен, военнойёслэн уженызы герӟамъёс но вань. Армие ветлыса солдатъёслэн радазы луэм ушъямон пиос но трос. Сыӵе пиналъёсыныз дышетӥсь тужгес но данъяське. Аслыз но Владимир Галихановичлы пиослэн служба ортчоно интыосысьтызы командованилэсь тау карон гожтэтъёс вуылӥллям. Туала егит поколение армие мынонлы пумитъяське, пиос но азьвыл сямен солдат улонлэсь шӧмзэ веръяны уг дырто ни. Со дышетӥсез туж сюлэмшугъяськытэ.
- Армия пиослэсь ёзвиоссэс но пуш дуннезэс кыдатэ, зэмос пиосмурт луыны юрттӥсь школа луэ, - лыдъя Владимир Галиханович. Ас сярысьтыз ке верано, дышетӥсь тамак кысконлы, юонлы котьку пумит луэм, лябъёсты вӧсь карыны сётымтэ, дышетоно пиналъёсызлэсь но сое ик курем. Пиналъёс дышетӥсьсы сярысь шуизы:
«урокъёсын визьмо дышетӥсь, переменаын матысь эш», «курдаськомы ке но, гажаськомы», «аспӧртэм юморен, серекъятыны быгатӥсь дышетӥсь», «юн курыны но ӟеч дышетыны быгатэ», «зэмос дышетӥсь».
Владимир Галихановичлэн трос аръёс џоже дышетон удысын тыршемез пӧртэм Данъян грамотаосын пусъемын. Соос пӧлын ёросысь дышетон ёзэтлэн, военной комиссариатлэн, ёрос администрацилэн грамотаосыз но вань. Владимир Галиханович «Дышетон удысысь отличник» нимлы дано луэ. Нош 2013-тӥ арлэн гудырикошкон толэзяз Владимир Галихановичез «Почётный работник общего образования Российской Федерации» нимен пусйизы. Кема ӧвӧл дано дышетӥсез шутэтскыны келязы. Дышетэм пиналъёсыз, ӵошен ужам эшъёсыз, гуртоосыз понна со яркыт тылси выллем луэ. Сыӵе адямиос вань дыръя, котыр улон шуныт но югыт луэ, зэмос дышетӥсьлэн чебер пӧрмем улон но ужан сюресэныз гуртоосыз, матысьёсыз, дышетэм пиналъёсыз но эшъёсыз сюлмысь данъясько.
Ирина САМИГУЛОВА.
Оставить сообщение: