архив номеров

АРХИВ НОМЕРОВ

ПОСЛЕДНИЕ КОММЕНТАРИИ

Каталог предприятий

    развернутьсвернуть

    ВОПРОС-ОТВЕТ

      Адями чебер уженыз, музъем – будосэныз

      2013.12.05 1010 0
      Адями чебер уженыз, музъем – будосэныз

      Дунне вылэ нокин дано луыса уг вордӥськы. Адямиез ужъёсызъя, тыршемезъя, вормонъёсызъя дунъяло. Янаул ёросысь Вуж Варяш гуртысь Миншакир Шаритдинов гуртаз гинэ ӧвӧл, ёросаз одӥгез гажамон адями. Кызь арлы матэ гурт поселенилэн администрациеныз кивалтӥсь котьку ӟечсэ лэсьтон малпанъёсын уж дураз вамыштэ. Солэн калыкез, гуртэз понна лэсьтэм ужъёсыз лыдъяса быдтонтэм.

      - Мон калыкен ужаны дышемын ини. 16 ар ӵоже культура юртэн кивалтӥ, Ижевскысь культпросветучилищеын дышетски, режессурая ёзэтын тодон-валан басьтӥ. Вакытаз театр коллективен ужай, 2000-тӥ арын «Югдон» ансамбль кылдытӥ. Туннэ нуналэ но соин кивалтӥсько на, - вера Миншакир Шайсламович.

      Вуж Варяш гурт поселение ёросын одӥгез адӟем карымон поселениен лыдъяське. 12 ар ӵоже татын тылпу ӝутскымтэ, кышкыт йыружъёс луиллямтэ. Гуртъёс чылкытлыкенызы котьку висъясько: ульчаосысь ноку жуг-жаг уд адӟы, сюрес дуръёсын но жаг турынъёс уг будо. Кивалтэт но калык татын огкылысь кариськыса, тупаса уло но ужало.

      - Одӥг арын ми доры Благовещенск ёросысь 18 гурт поселениослэн администрациосынызы кивалтӥсьёс вуылӥзы. Соос Вуж Варяш, Наняды, Будья Варяш, Выль Варяш гуртъёстӥ ортчизы. Куноос гуртъёсмылэн чылкыт возиськемзылы паймизы, одӥг ке но жаго инты возьматыны куризы. Нош милям сыӵе интыосмы ик ӧвӧл. Ваньмыз со калыклэсь тыршемзэ возьматэ, - данъяське кивалтӥсь.

      Миншакир Шаритдиновлэн котькуд ужан арез тодаз кыльымон луэм. Туннэ кадь тодэ на со сюрес тупатэмъёссэс, асфальт вӧлдэмъёссэс, гуртазы газ, ву гумыос кыскемъёссэс. Вуж Варяшын почта ёзэт но Миншакир Шайсламовичлэн «бызьылэмез» улсын усьтӥськем. Куинь ар, пе, ветлоно луиз та уж сьӧрын. Али ке но гуртоосыз солы почта ёзэт усьтыны юрттэмез понна тау карон кылъёссэс верало. Уго тылэн, газэн пайдаяськем понна дун тырыны Янаулэ ветлонэз ӧвӧл ни, кредит тырон амалъёс но отын чакламын.

      Азьло ёрос центрысен Вуж Варяше автобусъёс но вылӥллямтэ. Та уж сьӧрын но кивалтӥсь трос ветлэм. Али дыре Янаулысен гуртэ котькуд нунал автобус вуылэ.

      - Милям гурт поселениямы тыршись калык улэ. Соос котькуд куронлы вазисько, ӵектэм ужез вакытаз быдэсто. Мон данъяськисько соосын. Милям ужтэк пукисьёс но ӧвӧл. Гурт хозяйствомы но ӟеч возиське. Ужасьёс дыраз уждун басьто. Гуртъёсын ӝутӥськисьёс но трос. Егит семьяос но гуртэ ик выжы лэзьыны тыршо, - шумпотонъёсыныз люкиське М. Шаритдинов.

      Туэ Котыр улосэз утён ар улсын гурт поселениын трос ужъёс быдэстэмын. Будья Варяшысь ульчаосы кык гудӟем гудэмын, ошмесъёс тупатэмын. Ваньмыз со калыклы пайдаяськон, каньыл улон кылдытон понна лэсьтэмын.

      Вуж Варяш гурт поселение ёросын радъяськоно конкурсъёсы но ӵем пыриське, отын вормонъёслы кузё луэ. Кылсярысь, «Лучший цветник», «Лучшее новогоднее оформление» ужрадъёсын варяшъёслы вуисьёс ик ӧвӧл.

      …Уно аръёс, трос пайдаё, ӟеч ужъёс. Со ваньмыз гурт калык понна лэсьтӥськемын. Миншакир Шайс­ламовичлэн ужъёсыз уно Данъян грамотаосын пусъемын. Соос пӧлысь тужгес бадӟымъёсыз – «СССР-ысь культурая отличник» но «БАССР-ысь культура удысысь дано ужась».

      Кема ӧвӧл Миншакир Шайсламович дано юбилейзэ пусйиз. Ас калыкез понна висись воргоронлы азьланяз выль вормонъёс но азинсконъёс сӥзиськом. Уго калыкын юнме вераллямтэ: «Адями чебер уженыз, музъем – будосэныз».

      Миляуша БУЛАТОВА.

      Рубрики:

      Номер:

    • отправить другу
    • распечатать
    • Комментарии

      Имя
      E-mail
      Текст
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
      Отправить
      Сбросить