Улон шулдыр ожмаськонтэк

Быдӟым Вормонлы сӥзем куинь этапен фестивалез быдэс шаерын пусъёзы. Солэн нырысетӥэтапез ку­арусён-толсур толэзьёсы ёросъёсысь котькуд гурт поселениосын радъясь­коз. Кыкетӥез - региональной этап - 2013-2014-тӥаръёсы азинскоз. Бадӟым ужрад 2015-тӥарысь Вормон Нуналэ Москва городын йылпумъяськоз. Га­ла-концертэ, туспуктӥсьёслэн но ки­башлыослэн адӟытоназы регионъёсын вормисе потэмъёс пыриськозы.

Татышлы ёросын «Салют По­беды» фестиваль 12-тӥшуркынмонэ усьтӥськиз. Нырысетӥ вамышсэ со Улысь Балтач культура юртысен лэсьтӥз. Кышкыт аръёсты, оже бы­ремъёсты тодэ ваёнлы сӥзем ужрадэз усьтонэ ёрос Кенешлэн секретарез Р. Г. Рахимов но ёросысь ветеранъ­ёслэн кенешенызы кивалтӥсь Р. А. Фагаманов пыриськизы.

- Вормон Нунал – бадӟым празд­ник. Сое пичиос но, бадӟымъёс но шумпотыса витё, пусъё. Со нуналэн герӟаськемын асьме странамылэн историез, ӵыжы-выжыосмылэн ортчем сюрессы. «Салют Победы» Быдӟым Атыкай ож аръёсты тодэ ваён, егитъ­ёслэсь вордскем шаерез гажан мыл­кыдзэс ӝутон вылысь радъяське, - вераз Радик Галимзянович.

Рустем Абутамович концертэ лю­каськемъёслы ӟечкылан кылъёсын вазиськиз. Фестивалез со Быдӟым Атыкай ожын вормонлы 70 ар тырмон­лы сӥзем ужрадлэн нырысетӥ яркыт сиеныз нимаз.

«Салют Победы» калык твор­чествоя фестиваль трос учкисьё­сты люказ. Ужрадэз Улысь Балтач культура юртын, Бигиней, Кызыл-Яр, Кыткы-Елга гуртъёсысь клубъёсын ужасьёс, Улысь Балтач школаын ды­шетскисьёс шулдыртӥзы. Усто быга­тонлыкъёсынызы, лулысь-сюлмысь тыршеменызы соос котькинлы капчи мылкыд кузьмазы.

Миляуша БУЛАТОВА.

Татышлы ёрос.