Россиысь кун кивалтэт гурт удысысь вуз поттӥсьёслы юрттонэз бадӟым ужпумен лыдъя. Озьы арысь аре выль программаос дасясько. Соос пӧлысь котькудӥз гуртын ужась калыклы каньыл улон кылдытон сярысь малпанэн лэсьтӥське. Уго соослэн тыршеменызы, кылсярысь, кылем арын Россиын 44,5 млн тонна ю тысь, 35,8 млн тонна гордкушман, 2,4 млн тонна картофка, 13,7 млн тонна йӧл вузамын. Нош ю тысь огъя 70,9 млн тонна октэмын. Таиз арысь 4-тӥ коньывуонозь шаерамы 80 млн тонна ю-нянь дасямын. Та лыдпусъёс сьӧрын Башкортостан Республикаысь гурт хозяйствоослэн но бадӟым ужзы шӧдӥське. Татысь бусы ужасьёсын, кылсярысь, кылем арын 1672,2 сюрс тонна (лыдпусъёс gks.ru сайтысь басьтэмын) ю тысь дасямын. Нош туэ та лыдпус шӧдскымон тросгес. Озьы ке но инкуазь ассэ зол шӧдытӥз.
Пудо вордон ласянь но Россиын бадӟым ужъёс нуисько. Шаерамы 20 миллион сюро пудоос лыдъясько. Та удысэз азинтон но гурт хозяйтвоослы пудо сиён ласянь юрттэт возьматон вылысь, Россиысь Правительство регионъёслы 11,8 миллиард манет тыр субсидиосты люкиз. Солэсь 2,291 миллиард манетсэ курегпузэн вуз карисьёс шӧдозы. Нош тылобурдо вордӥсьлы 3,837 манетэз кошкоз, 5,672 миллиард манетэз – парсь утисьёслы. «Гурт удысын вуз поттӥсьёс та ласянь юрттэтлы юн кулэясько, - пусйиз Россия Федерациысь гурт хозяйствоя министр Николай Фёдоров. - 2012-тӥ арысь кыкетӥ паларын но таиз арысь нырысетӥ паларын пудо сиёнлы дунъёс будӥзы, нош парсь но тылобурдо сӥльлэсь дасям вузъёслэн – усизы. Соин та удысъёс ӧжыт «чутыны» кутскизы».
Та выллем программаослэсь ӟечлыксэс гурт хозяйствоос но, фермеръёс но ас вылазы шӧдытэк уг уло. Со сяна, агропромышленной комплексысь азинсконъёс трос инвесторъёсты бордазы кыскыны быгатӥзы. Озьы шаерамы выль уж интыос кылдо, улон юртъёс, сюресъёс ӝутӥсько.
Ольга НИГАМАТУЛЛИНА.
Оставить сообщение: