2009-тӥ арын Ижкарын нырысьсэ бадӟым «Чакара» фестиваль ортчиз. Отчы шаермылэн пӧртэм сэрегъёсысьтыз – Удмуртилэн ёросъёсысьтыз, Башкортостанысь, Татарстанысь, Марий Элысь, Свердловск но Киров улосвылъёсысь, Пермь шаерысь - удмурт коллективъёс пыриськизы. Фестивальлэн валтӥсь ужпумез луиз вашкала кырӟанъёсты, эктонъёсты, сям-йылолъёсты утён но азинтон. «Чакара» вить ар ӵоже Удмурт Элькунын радъяськиз. Бӧрысь со республикаысьтымы Калтасы ёросысь Бадӟым Качакын, Пермь шаерысь Куеда ёросысь Бадӟым Гондырын ортчиз. Нош туэ «Чакара» Татарстанысь Кукморе вуиз.
Кукмор ёрос кунооссэ пильмо куазен ке но пумитаз, ӝытазе пилемъёс сьӧрысь яркыт шунды адӟиськиз. Фестивале лыктэм коллективъёсты ёросысь пӧртэм удмурт гуртъёсы интыязы. Табере со кык нунал кыстӥськиз угось. Нырысетӥ нуналэ ансамбльёс пӧртэм гуртъёсысь культура юртъёсын калыклы концерт возьматӥзы. Башкортостанысь кырӟасьёсты но отын шумпотыса пумитазы, тунсыкъяськыса учкизы.
Фестивале Россилэн 14 регионъёсысьтыз 45 коллективъёс вуэмын вал. Тямысэтӥ пӧсьтолэзе, фестивалез усьтыса, соосты но люкаськем калыкез бадӟым ужрадэн ӟечкыласа нырысь вераськиз Кукмор ёрос администрациен кивалтӥсь С. Д. Димитров.
Собере кыл сётӥськиз Удмурт Элькунысь йӧскалык политикая министрлэн нырысетӥ воштӥсезлы Павел Орловлы, Удмурт Элькунысь культурая но туризмъя министрлэн воштӥсезлы П. П. Даниловлы, Татарстанысь калыкъёслэн ассамблеязылэн исполнительной комитетэзлэн кивалтӥсезлы Н. В. Михайловлы, Камсьӧр удмуртъёслэн огазеяськонэнызы кивалтӥсьлы Ф. А. Чибышевалы. «Эн вунэтэ выжыостэс. Асьмелы йылолъёсмес утьыны тыршоно», - вераз Флюра Ахметовна.
«Чакара» фестивальын Башкортостаысь удмуртъёслэсь йылолъёссэс, кырӟан-эктонъёссэс возьматӥзы Татышлы ёросысь Вязовкаысь но Кызыл-Ярысь «Уӵы ныл» но «Марӟан», Янаул ёросысь Вуж Варяшысь но Андреевкаысь «Югдон» но «Зангари», Калтасы ёросысь Вылысь Тыхтемысь «Ингур» ансамбльёс, Татышлы ёросысь Выль Татышлыысь Алина но Линда Гильмановаос, Ермекей ёросысь Анастасия Вождаева но Анастасия Пургина. Со сяна, Кукмор ёросэ вуылӥзы на Янаул ёросысь удмурт огазеяськонэн кивалтӥсь Ю. С. Саитов, «Восток» но «АгроМ» хозяйствоосын кивалтӥсьёс В. К. Камиуллин но Р. Р. Шарафутдинов. Фестивале пыриськем кырӟась-эктӥсьёс но коллективъёс дипломъёсын но синпель кузьымъёсын данъямын.
Салимьян ГАРИФУЛЛИН,
Башкортостанысь делегациен кивалтӥсь.
2020.04.09
Художественный музей имени Михаила Нестерова вошёл в топ-5 музеев России2019.12.24
В Уфе состоялась традиционная Столичная ёлка для одарённых детей2019.09.03
В Башкирии стартует конкурс вокального творчества среди сельских поселений «Поющая деревня!»2019.06.21
"Ӟечбур, вордскем гуртэ!" ужрадын - Ирина Шайхлисламова "Берто али гуртам" кырӟанэн2019.05.07
Символ Всероссийского театрального марафона привезут в Уфу
Комментарии