архив номеров

АРХИВ НОМЕРОВ

ПОСЛЕДНИЕ КОММЕНТАРИИ

Каталог предприятий

    развернутьсвернуть

    ВОПРОС-ОТВЕТ

    Добавить вопрос

    Имя
    E-mail
    Вопрос:
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
     
    Отправить

    ФОТОГАЛЕРЕЯ

    АНЕКДОТЫ

      Нылпиос тазалыко улонэн но спортэн эшъясько

      2017.05.25 303 0
      Нылпиос тазалыко улонэн но спортэн эшъясько

      Калтасы ёросысь Бадӟым Качак школа республикаысьтымы удмурт школаосысь пиналъёсты выльысь огинэ люказ. 21-тӥ куартолэзе татын 14-тӥ ползэ нылпиослэн гужем олимпи шудонзы ортчиз. Зэм, азьвыл аръёсын ӵошатыса, туэ отчы шӧдскымон ӧжытгес пиналъёс вуизы. Со нырысь ик герӟаськемын республикаысьтымы шор ёзо удмурт школаослэн лыдзы кулэсмемен. Но озьы ке но шӧдӥське: дышетскисьёс спортэн, тазалыко улонэн эшъясько. Черодысь олимпи шудон сое яркыт возьматӥз. Отчы кузёос сяна, Балтач ёросысь Асавка школаысь, Татышлы ёросысь Выль Татышлыысь но Улысь Балтачысь, Янаул ёросысь Вуж Варяшысь школаос пыриськизы. Туэ нылпиослы бызьылонын, кузьдалае тэтчанын, тупез лэзьянын но волейболын кужымзэс эскероно луиз.

      Бадӟым Качак школаын кема аръёс ӵоже ни спортэз азинтонлы бадӟым саклык висъяське. Татысь пиналъёс солэн пӧртэм видъёсаз ёрос, республика ӵошатсконъёсын вормисьёс пӧлын луо. Та нуналэ олимпи шудонэз усьтонэ школалэн кужмоосыз спортсменъёсыз пыриськизы. Тросэз соос шоры вожмаськыса, данъяськыса учкизы. Оло, чылкак та вакытэ мукет школаосысь пиналъёслэн соосты вормон, азьпала потон сярысь мылкыдзы кылдӥз. Ӵошатсконъёс кутскемлэсь азьвыл командаосты ӟечкыласа но ӟырдыт нюръяськонын вормон сӥзьыса вераськизы БР-ысь удмуртъёслэн национально-культурной центренызы кивалтӥсь С. Г. Гарифуллин, Бадӟым Качак гурт поселенилэн администрациеныз кивалтӥсь Г. Д. Хайдаршин, Бадӟым Качак школалэн директорез Д. Ш. Галиахметов. Со сяна, та нуналэ пиналъёсты вормонэ бурдъяса вазиськиз Бадӟым Качакысь В. А. Ильбаева. Со нырысетӥосаз нылпи олимпи шудонъёсы пыриськем. Интыысь нылъёслэн волейболъя командазылэн капитанэз вылэм.

      Олимпи шудонэз  60 метре бызьылонэн усьтӥзы. Нылъёс но пиос финише музъемез шӧдытэк бызё, кожалод. Соослы кужым ватсаса эшъёссы но тренеръёссы «висё». Тани стартэ султӥз Выль Татышлы школаысь Денис Риянов. Солы 60 метрез ортчыны 7 секундлэсь гинэ тросгес дыр кулэ луиз. Быгатоз меда кин ке сое азьпалтыны? Азьпалтыса верало, та нуналэ Денислы вуисьёс ӧз луэ. Со – зарни медальлэн кузёез. Нош кыкетӥ но куинетӥ интыосты Улысь Балтачысь И. Муллаяров но Выль Татышлыысь Я. Шайдуллин люкизы. Озьыен, вакчи сюресэз Татышлы ёросысь пиос ӝоггес ортчыны быгато. Нош нылъёс пӧлын кинъёс кужмогес? Таяз ӵошатсконын суред пӧртэмгес радъяськиз. Бадӟым Качакысь А. Гиндуллина вормонэз ас кияз кырмиз. Соин Выль Татышлыысь А. Садиевалы но Бадӟым Качакысь Д. Зайдуллиналы кыкетӥ но куинетӥ интыосын буйгатсконо луиз. Озьы ке но нылъёс нырзэс ӧз оше. Уго азьпалан соосты трос ӵошатсконъёс витё на.

      Табере кужымзэс эскеро кузьдалае тэтчасьёс. Пиос пӧлын нырысетӥ но кыкетӥ интыос понна нюръясько Выль Татышлыысь Я. Шайдуллин но Бадӟым Качакысь М. Паркутдинов. Пиос татын куинь пол кужымзэс возьматыны быгато. Кузьдалае тэтчаны устогес пӧрмыто вылэм выль татышлыос. Вераны кулэ, кыкетӥ интые потэм М. Паркутдиновлэсь лыдпусъёсызъя ӧжытлы бере кылиз Выль Татышлы школаысь Д. Риянов. Озьыен, со кузьдалае тэтчанын кыкетӥ медальзэ утӥз.

      Нылъёс пӧлын выльысь А. Гиндуллиналы вуисьёс ӧз луэ. Со бызьылонын но шаплыгес вылэм, тэтчанын но кыдёкегес «лобе». Нош кыкетӥ но куинетӥ интыос понна нюръяськизы Выль Татышлы школаысь нылъёс А. Садиева но Н. Муллаярова. Ангелина таяз ӵошатсконын но, нырысетӥяз сямен ик, азьвесь медаль утӥз.

      Тупез лэзьянын пиос пӧлын Вуж Варяш школаысь С. Низамутдиновлы вуисьёс ӧз луэ. Солэн тупез 66.82 метре «лобӟиз». Станиславлы со зарни лыдпус луиз. Ӵошатсконын кыкетӥ но куинетӥ интыосты Бадӟым Качакысь И. Галиуллин но Вуж Варяшысь ик Н. Саитдинов люкизы. Нылъёс пӧлын удалтӥз Выль Татышлы школаысь Р. Латиповалы но Ж. Кабиоковалы. Соос нырысетӥ но куинетӥ интыосын луизы. Нош кыкетӥ интыын – Бадӟым Качакысь А. Шарипова.

      Табере дыр вуиз эстафеталы. Отчы котькуд командаысь кык ныл но кык пи пыриськиз. Нырысетӥ этапын пиос бызизы. Финише нырысетӥ вуизы выль татышлыос. Соос мукетъёсаз этапъёсын но кужмогес адӟиськизы. Соин мукет командаослэн выль татышлыос сьӧры уиськыны ӟигарзы ӧз тырмы. Кыкетӥ но куинетӥ интыосты люкизы Бадӟым Качакысь но Вуж Варяшысь командаос.  

      Республикаысьтымы удмурт школаосын пиос пӧлын бызьылонын зэмзэ ик Выль Татышлыысь пиналъёслы вуисьёс вылӥллямтэ. Сюрс метре бызьылонын сое яркыт возьматӥз та школаысь Р. Ахметзянов. Финише со эшъёссэ трослы азьпалтыса вуиз. Кыкетӥ но куинетӥ интыосын луизы Вуж Варяшысь Р. Минигараев но Бадӟым Качакысь Р. Кузяхметов.

      Нылъёс 500 метре бызьылонын кужымзэс эскеризы. Татын шаплыгес луизы Выль Татышлыысь А. Васильева, Улысь Балтачысь Л. Шайсламова но М. Хайдарова.

      Олимпи шудонэз волейболэн йылпумъязы. Та нуналэ нылъёсты но пиосты инкуазь ӧз жаля – командаос зор улын шудоно луизы. Озьы ке но шудонъёс кыказ ик площадкаын тунсыко мынӥзы. Пиос пӧлын кужмогес адӟиськизы Улысь Балтачысь, Бадӟым Качакысь но Выль Татышлыысь командаос. Жаляса верано, Асавкаын нылпиос ӧжыт луэмен, ӵошатсконэ соос командазэс пуктыны ӧз быгатэ. Куинетӥ инты понна нюръяськонын Выль Татышлыысь но Вуж Варяшысь пиос пумиськизы. Площадкаын татышлыослы удалтӥз – соос куинетӥ интыын. Нош нырысетӥ инты понна Улысь Балтачысь но Бадӟым Качакысь командаос нюръясько. Кузёослы вормон борды ӝабырскыны ӧз кылды, куноос кужмогес луизы.

      Нылъёс пӧлын волейбол площадкаын куинь командаос пумиськизы. Татчы бадӟым вормонлы осконэн вуиллям Выль Татышлыысь нылъёс. Площадкаын нырысь Улысь Балтачысь но Бадӟым Качакысь командаос пумиськизы. Куноос 2:1 лыдпусэн азьпала потӥзы. Кузёосты Выль Татышлыысь команда но азьпалтӥз. Берлояз шудонын Татышлы ёросысь командаос пумиськизы. Ёрос ӵошатсконъёсын соос трос пол ог-огзылы пумит нюръяськизы ни. Отын кужмогес луо выль татышлыос. Нош татын нырысетӥ партиын азьпалан мыно улысь балтачъёс. Кыкетӥяз но куинетӥяз партиосын выль татышлыос шудон борды золгес басьтӥськизы, лэся. Вормонэз соос ас киязы кельтӥзы.

      Олипи шудонлы огъя йылпумъян лэсьтыса, ӵошатсконъёсын азьпала потӥзы Выль Татышлыысь нылъёс но пиос. Соос – нылпиослэн гужем олимпи шудонзылэн кубокезлэн кузёосыз. Ӵошатсконын кыкетӥ но куинетӥ интыосты люкизы Бадӟым Качакысь но Улысь Балтачысь командаос. Вормисьёс дипломъёсын но медальёсын данъямын.  

      Ольга НИГАМАТУЛЛИНА.

      Рубрики:

      Номер:

    • отправить другу
    • распечатать
    • Комментарии

      Имя
      E-mail
      Текст
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
      Отправить
      Сбросить

    Свежий номер

    Факты

    ПАРТНЕРЫ

    Поздравления

    Гороскоп