Кырӟазы но эктӥзы, кылбуръёс веразы, куаш поттыса ужазы

Ужрадэз усьтыса, Сандугач школаен кивалтӥсь Ильшат Миргалиев вераськиз, со лыктэм куноослы, пиналъёслы тау кылъёссэ вераз. Янаул ёросысь дышетонъя управлениен кивалтӥсь Артур Шарафисламов, Сандугач гурт поселенилэн администрациеныз кивалтӥсь Тимерзян Куснияров, БР-ысь удмуртъёслэн НКЦ-енызы кивалтӥсьлэн воштӥсез Юрис Саитов, историко-культурной центрен кивалтӥсь Ирина Самигулова Сандугач школалэсь ӟеч ужъёссэ, дышетӥсьёслэсь но дышетскисьёслэсь вормонъёсэс пусйизы.

«Ӟечбур, ойдо эшъяськом!»

Командаос визиткаоссэс возьматӥзы. Кутскиз «Ӟечбур, ойдо эшъяськом!» шудон. Со туж тунсыко, аспӧртэм ортчиз. Фестивале лыктэм нылъёс но пиос, положенилэн куронэзъя, бӧрсязы туспуктэмъёссэс вайыны кулэ вал. Соосты ӝӧк вылэ тыризы. Пиналъёс отысь одӥг фотоез бырйылӥзы но туспуктэмлэсь кузёзэ кругысь шедьтыса, тодматскизы, эшъяськизы, ог-огзылы пальпотон кузьмазы.

«Мар? Кытын? Ку?»

Тазьы нимаськиз деловой шудон. Сое удмурт кылъя дышетӥсь Людмила Тимиршина нуиз. Командаослы дас юанъёс дасямын вал. Татын пиналъёслы пӧсяно луиз, йырмульыоссэс соос зол бергатӥзы. Удмурт веросъёсты, гожъясьёсты, тодосчиосты но нылпиос тодыны кулэ вал, удмурт литературая урокъёсын дышетскем кылбуръёсты но соослы азьланьтыны куризы. Незнайка, Дюймовочка сярысь лыдӟемзэс, произведениослэсь жанръёссэс тодэмзэс но эскеризы. Физикаен герӟаськем юан, мадиськон но соослы дасяллям.

Котькинлэн тодэмез потэ, кыӵе команда кужмогес луиз меда? Юанъёслы шонер валэктонъёс сётъяллям Каймашабаш но Максим школаосысь нылпиос. Соослэн командаоссы нырысетӥ интыын луизы. Кыкетӥ интые потӥзы асавкаос. Куинетӥ интыез бадӟым качакъёс но сандугачъёс люкизы. Улысь балтачъёсты «Самая сплочённая команда» номинациен пусйизы, уразгильдыосты - «Находчивость» номинациен, выль тазларъёсты – «Командный дух» номинациен, выль татышлыосты - «Эрудит» номинациен, вуж варяшъёсты - «Знатоки своего языка» номинациен.

Пиналъёс– усточиос, котьмалы быгатӥсьёс

Ужрадлэн кыкетӥ люкетаз пиналъёс пӧртэм висъетъёсы интыяськизы. Соос понна сизьым мастерскойёс ужазы: бисерен ужан (кивалтӥсез Л. Ф. Султанахметова), квиллинг (Р. Ф. Султанова), макаронэн лэсьтӥськон (С. З. Куснимарданова), декупаж (Г. М. Алексеева), пул вылын пужыятон (Л. И. Юзеева), курикен керттӥськон (Л. А. Ямаева), литературая творчество (Л. В. Тимиршина).

Бисерен лэсьтӥськон висъетэ 11 нылъёс люкаськиллям. Татын туж шыпыт, усточиос йырзэс но ӝутытэк ужало. «Роза сяська тупатыны дышетскиськом», - вера Лира Фаязовна.

Лидия Алексеевнаен кивалтоно мастерское курикен керттӥськыны яратӥсьёс люкаськиллям. Соос сяськаос пӧрмытыны мылкыд кариллям.

- Мон фестивале нырысьсэ вуи. Киужен вырыны яратӥсько бере, соин та мастерскоез бырйи. Клевер сяськае усто пӧрмоз шуса малпасько, - вера Касияровоысь дас аресъем Азалина.

Макаронэн лэсьтӥськон висъетысь пиосты адӟо шуыса уг малпаськы вал: татын ньыль пиос но одӥг нылаш пуко. Дышетӥсьсы Светлана Зиннатовна ужзэ видеоматериал возьматон бордысен кутскиз. Макем тунсыко! Макаронлэсь кыӵе гинэ арбериос уг пӧрмытъяло вылэм. Туннэ пиналъёс кампет тырон лэсьто.

Квиллингез 10 нылъёс бырйиллям. Пул вылэ пужыятонэн тунсыкъяськисьёс рамкаос тупатоно. Декупажен тунсыкъяськисьёс кагаз салфеткаоссэс кесяса пул вылэ, пластиклэсь тусьтые лякыло. Туж чебересь панно пӧрмыто.

Гожъяськыны яратӥсьёс тямыс кузя люкаськиллям. Дышетӥсьсы Людмила Валиевна соослы синквейн сярысь, сое гожтон амалъёсты валэктэ: «Синквейн – со вить чурен кылбур, кылдэмын США-ын. 1-тӥ чур валэктэ темаез, со одӥг кыллэсь - существительнойлэсь – сылэ, 2-тӥез чур – кык кыллэсь (прилагательной+прилагательной), 3-тӥез чур – куинь глаголъёслэсь, 4-тӥез чур – ньыль кылъёслэсь, возьматэ авторлэсь темая малпанзэ, 5-тӥез чур – одӥг кыл-резюме, пуштросэзъя темаез валэктӥсь кыл (существительной)». Нылпиослы ӵектэм уж мыным но туж тунсыко потӥз пиналъёсын ӵош малпаськи. Таӵе синквейн пӧрмытӥ:

Фестиваль

Шулдыр, тунсыко

Малпаськытэ, ужатэ, тодматэ

Выль эшъёс шедьтон инты

Эшъяськон.

Пиналъёс ужзэс ӝӧг быдэстӥзы, соос та нуналлы сӥзем, нылпи творчествоя фестивален герӟаськем темалы кылбуръёс, веросъёс малпаны но вуизы.

Дыр вуиз сцена вылысь усточиосты учкыны. «Жингырты, талант!» нимаськиз ужрадлэн куинетӥ люкетэз. Сценкаос но нылпиос дасяллям, кылбуръёс но дышетӥллям, кырӟан-эктонъёс но бӧрсязы «ваиллям». Огзылэсь огзы соос талантоесь! Кинлы нырысетӥ инты сётыны ик паймод

Вормисьёсты данъян

Декупаж

Уразгильдыысь Вероника Суюндуковалэн ужезлы 1-тӥ инты сётэмын, Улысь Балтачысь Анастасия Гузаировалэн ужезлы – 2-тӥ инты, Сандугачысь Аделина Мардамшиналэн ужезлы – 3-тӥ инты. Бадӟым Качакысь Роман Атнабаевлэн ужез «Оригинальность» номинациен пусъемын.

Макаронэн лэсьтӥськон

Татын Каймашабашысь Кирилл Пуринлы вуисьёс ӧз луэ. Ужзэ со ӝог быдэстӥз, чебер но пӧрмытӥз. Вуж Варяшысь Александр Галимзянов 2-тӥ интыын, Асвкаысь Ильназ Хатипов – 3-тӥ.

Литературая творчество

Вуж Варяшысь Диана Насибуллина 1-тӥ интылы кузё луиз, Бадӟым Качак школаысь Мирослав Паркутдинов – 2-тӥ интылы, Улысь Балтач школаысь Виктория Гильмиярова – 3-тӥ интылы. Сандугач школаысь Ким Абдуллин «Юный лирик» номинациен пусъемын, Выль Татышлы школаысь Ольга Ахметзянова – «Острое перо» номинациен, Выль Тазлар школаысь Светлана Садыкова – «Юный прозаик» номинациен, Уразгильдыысь Диана Шайсламова – «Хранитель удмуртского языка» номинациен.

Пул вылын пужыятон

Татын вормисе потӥз Улысь Балтач школаысь Дени Кайранов., 2-тӥ интыын Выль Татышлы школаысь Роман Ахметзянов, 3-тӥ – Асавкаысь Кирилл Галиев.

Квиллинг

Уразгильдыысь Карина Зайнокова 1-тӥ интыын луиз, Сандугачысь Эмма Мардамшина – 2-тӥ интыын, Вуж Варяшысь Милена Зайнуллина – 3-тӥ интыын.

Курикен керттӥськон

Уразгильдыысь Дарья Садриевалы 1-тӥ инты сётэмын, Бадӟым Качакысь Дарья Гадыршиналы – 2-тӥ инты, Улысь Балтачысь Малена Нигаевалы – 3-тӥ инты.

Бисерен ужан

Вуж Варяшысь Алина Набиуллина 1-тӥ интыын луиз, Уразгильдыысь Регина Фазлытдинова – 2-тӥ интыын, Выль Тазларысь Виктория Шартдинова – 3-тӥ интыын.

«Жингырты, талант!»

Татын вормисьёсты куинь ӧръёсъя бырйизы. Эктонын нырысетӥ интые потӥзы асавкаос, 2-тӥ – выль татышлыос, 3-тӥ – бадӟым качакъёс. Кырӟанын вормисе потӥз Сандугач школа, 2-тӥ но 3-тӥ интыосын – Максим но Улысь Балтач школаос. Сценка возьматонын висъяськизы уразгильдыос, каймашабашъёс - кыкетӥ, вуж варяшъёс - куинетӥ. Тужгес усто кылбур лыдӟиз Выль Татышлы школаысь Ольга Ахметзянова, 2-тӥ интыын – Вуж Варяшысь Алина Набиуллина. Выль Тазлар школалэсь командазэ «Самые юные таланты» номинациысь дипломен пусйизы. Вераны кулэ, та нуналэ одӥг пинал но данъян грамотатэк ӧз кыльы, Сандугач школаын ужасьёсты но котькудзэс дипломъёсын пусйизы.

Малпанъёс, мылкыданъёс

Фестиваль огшокчемскын кадь ортчиз. Солэн радлыкез сярысь Сандугач школаын ужасьёс пыр-поч малпаськиллям. Коридорын нылпиослэн ужъёсынызы адӟытон радъямын вал. Та нунал понна соослы «5+». Куноос но, сандугачъёс но ужрад пумысен ӟеч малпанъёссэс веразы.

- Нылпи творчествоя республика фестиваль – мон понна выль ужрад. Азьвыл мынам татчы пыриськеме ӧй вал на. Мыным туж кельшиз. Татын нылпиослэн быгатонлыкъёссы шараясько, фестиваль эшъяськыны юрттэ. Ужрадэз ортчытыны юрттэмзы понна Сандугач гурт поселенилэн администрациезлы, «Агро М» но «Ужара» гурт хозяйствоослы тау кылъёсме верасько, - шуиз школалэн директорез Ильшат Зайкатович.

Миляуша БУЛАТОВА.

Янаул ёрос.