архив номеров

АРХИВ НОМЕРОВ

ПОСЛЕДНИЕ КОММЕНТАРИИ

Каталог предприятий

    развернутьсвернуть

    ВОПРОС-ОТВЕТ

      Улон бугор азьлань питыра

      2017.03.02 585 0
      Улон бугор азьлань питыра

      Капчи-а гуртын улонэз, ужанэз? Та юанлы одӥг гинэ веран куриське кадь: секыт. Но пӧламы вань сыӵе адямиос, кинъёс городын улонэз син азязы но пуктыны уг быгато. Соосты музъем бордаз кыске. Сыӵеос пӧлы ик пыртыны луэ Башкортостан Республикаысь гурт удысысь сӥё-дано ужасез, Янаул ёросысь «Дружба» СПК-ен кивалтӥсез Ралиф Шайдуллинэз. Куке но Ралиф Пайритдинович «синъёс кышкало, киос ужало» веранэз палэнтыса, улонзэ но ужзэ гурт хозяйствоен герӟам.

      Ралиф Шайдуллинэн ми Шудекын, дораз, пумиським. Лымшор вакытэ. Со гидаз пудоосыз котырын берга вал. Солы кузпалыз Эмма Кабировна юрттӥське. Кузпалъёс кык скал вордо, ошъёссы но вань, даслы матэ ыжъёссы лыдъясько, ӟеч выжыысь валъёс но утё. Кивалтӥсь дырыз кысык шуыса ӧз улы, милемыз ческыт чаен кунояны но, вераськыны но дыр шедьтӥз.

      - Шудек - вордӥськем гуртэ, - вераськонмес кутскыса шуиз Ралиф Пайритдинович. – Татын будӥ, татын ик улӥсько. Школа бере армие басьтӥзы, служба аръёсы Узбекистанын ортчизы, Новои городын. Собере уж сюресэ кемалы «Победа» колхозэн герӟаськиз: 20 ар пудо врачын тырши. Та ӧнерелы Кушнаренковоысь сельхозтехникумын тодон-валан басьтӥ.

      Ужаз солэн пӧртэм дыръёсыз луиллям, дыр. Секытлыкъёс но, шуг-секытъёс но ужзэ ӟеч тодӥсь ӧнерчиез кышкатӥллямтэ.

      - Шумпотӥсько, мыным Сагитьян Тимирович Исламовен ужаны кылдӥз. Со кужмо, ужзэ гажась кивалтӥсь вал. Солэн сётэм кенешъёсыз улонам юрттӥзы. Бадӟым тау солы, - вера Ралиф Пайритдинович.

      Сюрес нуэ Сусады-Эбалаке

      Ёрос кивалтэт но, гурт калык но Ралиф Шайдуллинлэн ужезлы котьку вылӥ дунъет сётӥллям. 2007-тӥ арын 22-тӥ толшоре сое «Дружба» СПК-е кивалтӥсе юнматӥллям. Хозяйстволэн правлениез Сусады-Эбалак гуртэ интыяськемын.

      - Дас ар ортчыса но кошкем, - шуэ Ралиф Пайритдинович. Нош хозяйствоен кивалтӥсе пуктэмзэс, нырысетӥ уж нуналъёссэ со толон кадь гинэ потэ.

      - Хозяйство секыт югдуре шедемын вал. Дыраз уждун тыриллямтэ бере, калыклы вазиськонэз но капчи ӧй вал. Ужасьёс нырысь уг оско вал, хозяйство пыд йылаз султоз, дыраз уждун басьтыса ужаломы шуыса, - вера Ралиф Пайритдинович. – Ужаны кутскем бере ик 52 йыр ӟеч выжыысь скал, 3 комбайн (огез - пудо сиён дасян, кыкез – ю тысь октон), Т-150 трактор басьтӥм. Озьы каллен ужлэн ӧраз пыри.

      Быдэсак ужаз пырыса тыршемез юнме луымтэ, кема но дыр ортчымтэ, «Дружба» пыд йылаз йыгмыт султэм. Ужась киослэн тырмымтэзы пумысен но сюлмаськонэз луымтэ, Нефтекамск, Янаул городъёс матын ке но. Дружбаос асьсэ кужыменызы фермаоссэс тупатӥллям.

      Хозяйстволэн 5103 гектар музъемез, со пӧлысь 3403 гектар – гыроно-кизёноез, 297 гектарын - турын, 1313 гектар – пудо возьман интыос. 2016-тӥ арын 1455 гектар музъемысь 25194 центнер тысё культураос октэмын. Ю тысьлэн удалтонлыкез гектарысьтыз шорлыдын 17,3 центнер усем. 600 тонна турын дасямын, 2600 тонна сенаж понэмын, 2730 тонна – силос.

      Фермаосын 506 йыр сюро пудо лыдъяське, со пӧлысь 200-эз – кысконо скалъёс. Ар ӵоже хозяйствоын 8105 центнер йӧл дасямын. 2015-тӥ арен ӵошатоно ке, 679 центнерлы тросгес. Араз одӥг скаллэсь 4052 килограмм йӧл кыскемын. 184 кунян вордӥськемын. Ар ӵоже «Дружба» СПК аслаз вузъёсыныз 33 млн 717 сюрс манет табыш поттэм. 2015-тӥ арын та лыдпус 2 млн манетлы ӧжытгес вылэм.

      - Асьмеос тыршиськом ке но, кун юрттэттэк чик уг луы. Субсидиосын пайдаяськиськом. Туэ ю тысь октон комбайн басьтыны малпаськом, - вера кивалтӥсь.

      Юн тыбыр пыкет – семья

      Уж дурын кыӵе дыръёс гинэ уг луо. Вормонъёсын ӵош шуг-секытъёс но пумисько. Гурт хозяйствоен кивалтӥсьлы тужгес но секыт йӧтэ, дыр. Уката ик бусы ужъёс вакытэ. Ралиф Пайритдиновичлэн вазь ӵукна кошкыса бер ӝытозь ужаз ӝегатскем дыръёсыз трос пумисько. Соку ини дорысь ужъёс кузпаллэн пельпумъёсаз усё.

      - Толалтэ шутэтскыны но, юрт котырысь ужъёсты быдэстыны но, пудоос доры потаны но вакыт шеде, - пальпотэ Р. П. Шайдуллин. - Гужем нырысетӥ интыын – уж.

      - Кизён дырысен сӥзьылозь, пудо лагерьысь фермаосы бертытозь, дорлы вакытэз ӧвӧл, - ватса кузпалыз Эмма Кабировна.

      Кузпалъёс 1990-тӥ арысен улон сюрес кузя ваче ки вамышто, шумпотонъёссэс шори люко, секытлыкъёс кылдыку ог-огзылы юн тыбыр пыкет луо. Соослэн куинь нылпиоссы. Кристина нылзы анаезлэсь уж сюрессэ быръем, Эмма Кабировна - Шудек гуртысь фельдшер. Кристина медакадемиез йылпумъям, терапевт луыса ужа. Со аслаз семьяеныз улэ ни. Та дыре пичи нуныеныз пуке. Родион пизы автомеханиклы дышетскем. Нош Раиль Нефтекамскысь машиностроительной колледжын тодон-валан басьтэ.

      «Валъёсты туж яратӥсько»

      Ралиф Пайритдиновичлэсь тунсыкъяськонъёсыз сярысь юай.

      - Валъёсты туж яратӥсько, - шуиз со. Валъёс сярысь веракуз, солэн синъёсаз яркытэсь тылгизьыос ӝуатскизы, кожалод. Соос сярысь кивалтӥсь дугдылытэк мадьыны-вераны быгатэ. Шайдуллинъёслэн архивазы валэн ӵошатсконъёсын лэсьтылэм туспуктэмъёссы туж трос.

      - Ветврач луыса ужаку, хозяйствое ӟеч выжыысь валъёс басьтӥм. Сагитьян Тимирович но валъёсты туж яратэ. Кӧня сабантуйёсы ӵошатскыны вуылӥм меда? Вераны шуг, трос ӵошатсконъёсты пыр потӥ. Пиосме но дышетӥ, али но соос валъёсты утялтыны юрттӥсько, - вера Ралиф Пайритдинович.

      - Кышкыт учыръёсы но шедьылэмзы вань. Вал вылысь усён нуналазы пиос ум пуксиське ни шуо вал но, ӵуказеяз ик верам кылзэс вунэто, - вера Эмма Кабировна. – Вал вылын ворттылон – тунсыко, со дыре ик кышкыт хобби.

      Кышкыт, уг луы, уз пӧр-мы шуыса улӥд ке, нуналъёс бездыт тусо луо, дыр. Секытлыкъёсын пумиськытэк улон сюрес уг азинскы. Соосты ортчем бере, одно ик вормон тонэ вите. Улон бугор дугдыса уг улы, азьлань питыра, шумпотонъёс, вормонъёс, выль ужъёс вайыса.

            Миляуша БУЛАТОВА.

      Янаул ёрос.

      Рубрики:

      Номер:

    • отправить другу
    • распечатать
    • Комментарии

      Имя
      E-mail
      Текст
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
      Отправить
      Сбросить

    ОБЪЯВЛЕНИЯ

    ПАРТНЕРЫ