архив номеров

АРХИВ НОМЕРОВ

ПОСЛЕДНИЕ КОММЕНТАРИИ

Каталог предприятий

    развернутьсвернуть

    ВОПРОС-ОТВЕТ

      Улон сюресэтӥ ӵошен вамышто

      2016.06.09 998 0
      Улон сюресэтӥ ӵошен вамышто

      Янаул ёросысь Конигово гуртын удмурт калык ог-огзэ гажаса но ог-огзылы юрттыса улэ. Соос ужын но, шутэтсконын но ӵош.

      Гуртлэн улоназ Валентина Шариповалэн но кужымез шӧдӥське. Со котькуд ужрадэз дасянэ, ортчытонэ мылысь-кыдысь пыриське. Кема аръёс ӵоже со Москва улосвылысь Ковровын улӥз ке но, Валентина Викторовна пиналэныз но, арлыдоеныз но огкыл шедьтэ. «Удмурт йылолъёсты гуртамы ортчытъяны тыршиськом. Вӧй, быдӟымнал, Выль ар, сабантуй но мукет шулдыръяськонъёсты шумпотыса ӵошен радъяськом», - вера зӥбыт сямо кышномурт. Валентина Викторовна мукетъёслэсь зарни киосыныз но висъяське вылэм. Солэн быдэстэм киужъёсыз адӟытонэ поттоно кадь. Яркыт тусо мулинеослэсь пужыятэмъёсыз синэз бордазы кыско. «Ас поннам пужыятӥсько», - ужъёссэ возьматыса вера Валя апай.  Нош пуштресэсь мочалкаоссэ ӵыжы-выжыосызлы но матысьёсызлы, пе, кузьмасько. Дорысьёссэ черсыса керттэм шуныт пӧзьы-ныросъёсыныз шумпоттэ на. Со сяна, Валя апай доры пырыкумы солэн будосъёсты утялтыны яратэмез но шӧдӥськиз. Уго корказьысен ик солэн вож эшъёсыз, вуэм куноосты пумитаса кадь, чорк-чорк сыло.

      Улонлэсь пӧртэм шӧмъёссэ веръям кышномурт туннэ Юля внучкаеныз, ӵужапаеныз (анаезлэн сузэрез) но солэн Таня нылызлэн кузпалыныз ӵош улэ. Аслэсьтыз анайзэ ыштэм Юля улонлэсь шунытсэ ӵужанаез бордысь шедьтэ.Солы со «мама» шуыса вазиське. Валя апай но внучкаез понна сюлмысьтыз тырше, солы кужымзэ, яратонзэ уг жаля. Юляен тодматскыны ӧз кылды ке но, со сярысь ми трос тунсыкозэ тодӥмы. Со, пе, чебер эктэ, крезьгуро инструментъёсын усто шудэ. Инмарен сётэм быгатонлыкъёссэ Юля Янаулысь искусствоосъя школаын будэтэ. Татын со эктонъя курсэз горд свидетельствоен йылпумъяз. Нош али фортепианоен шудыны ветлэ. Дышетскон юртазы ортчоно конкурсъёсы мыло-кыдо пыриське. Отын ӵемысь вормисе потэ. Уго Юля ваньмон дыръяз дораз но пианиноен, синтезаторен киоссэ волятэ. «Скрипкаен но шудыны дышетскыны мылкыдыз вань. Но, жаляса верано, Янаулын сыӵе луонлыкъёссы, пе, ӧвӧл», - вера Валя апай. Крезьгур дуннеен эшъяськись нылаш дышетсконын но «уг чуты». Куатетӥ классэ со ньыльёсын но витьёсын гинэ йылпумъяз. «Ковровысь бертыкумы, Юля удмурт кылэз уг но тоды вал. Нош али удмурт, башкир, англи кылъя урокъёсты ӟеч тодэ, нош ӟучсэ - ньыльлы», - вера Валя апай.

      Валентина Викторовна сюлэм шунытсэ нокинлы уг жаля. Биби ӵужапаез но сое шӧдытэк уг улы.  Укмыстон одӥг аресаз кошкем кышномуртлы даураз трос шуг-секытъёсты адӟыны, матысьёссэ ыштыны кылдэм. «Вань секыт ужез ми ужам. Валлэсь ужзэ но быдэсъям. Трос нуждаез (ёрмон) адӟим, сютэм улӥм, - синкыли пыр вера Биби песянай. - Гумырзэ сётэм ини мыным Инмар-атай». Кузпалызлы но солэн кык агайёсызлы ожысь бертыны кылдымтэ. 1924-тӥ арын Конигово гуртын вордӥськем Сардан Семёнович Быдӟым Атыкай ожын сӧсырмыны шедем но бурмымтэ. Сое 1943-тӥ арын сӥзьыл Киров улосвылысь Черкин гуртэ октӥллям. Биби песяйлэн секыт адӟонэз таин гинэ  бырымтэ. Пересьмон нуналъёсаз со Таня нылзэ ыштэм. Туннэ нуналэ Биби Шакирьяновнаен ӵош Иван эмеспиез улэ. Сизьымдон аресаз вамыштэм Иван Андреевич улонзэ гурт удысэз азинтонлы сӥзем. Ӟеч ужамзэ премиосын, кузьымъёсын пусйылӥллям. Али со юрт котырысьтыз чыры-пыры ужъёсты быдэсъя. Ӵошен сад-бакчаязы тыршо, курег-ӟазегъёс но мукет тылобурдоос утё.

      Марина НИКОЛАЕВА.

      Янаул ёрос.    

      Рубрики:

      Номер:

    • отправить другу
    • распечатать
    • Комментарии

      Имя
      E-mail
      Текст
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
       
      Отправить
      Сбросить