«Асьмеос ваньмы вордӥськем шаеренымы данъяськиськомы. Нош та выллем шулдыръяськонъёс выжыосмес тодон но эскерон вылысь радъясько», - шуиз Кальтяй гурт поселениен кивалтӥсь Р. Н. Гарипов люкаськем калыклы вазиськыса. Та нуналэ соос пӧлын республикаысьтымы Культурая министерствоын но Калык творчествоя центрын ужасьёс но луизы. Уго таяз арын вязовкаос республикаысь 12 культура юртъёсын ӵош модельной культура юрт нимлы нюръяськозы. Конкурслэн куронъёсыз бадӟымесь. Соос пӧлысь одӥгезъя, кылсярысь, культура юртъёс шутэтскон ӝыт радъяны кулэ.
Лилиана но Фанил Нуриахметовъёс, Альфира Камалтдинова но Радис Гайниятов куноосты вордскем гуртсылэн гимнэныз пумитазы. Вязовка 1922-тӥ арын кылдэмын. Соку татчы Вылысь Татышлыысь Ахмадулла Насыров но Хазиахмат Галияхметов улыны выжизы. Туннэ татын улӥсьёс пӧлысь тросэз удмуртъёс. Гуртлэн историеныз та нуналэ тодматӥз Вязовка школаысь удмурт кылъя но литературая дышетӥсь Л. А. Хазипова. Куноосты пумитамзы бере, люкаськем калык пӧртэм шудон-ӵошатсконъёсын кужымзэ эскериз. Нош кинъёс ке ульчае пуктэм гур доры дыртӥзы. Татын ческыт табань пыжизы.
Вязовкаос кемаласен ни усто кырӟасьёсынызы данъясько. Туала егит кырӟасьёслэн – Альфира Камалтдиновалэн, Алёна Тимерхановалэн, Андрей Камалтдиновлэн, Дина Глимьяновалэн - сцена вылэ сюрессы вордскем гуртсылэн культура юртысеныз кутскиз. Нош туннэ татын соосты вошто мукетъёс, «Купанча», «Калинка», «Зоренька» вокал но эктон ансамбльёсы ветлӥсь пиналъёс сцена вылын паймымон чебер адӟисько. «Зоренька» ансамбль та нуналэ учкисьёслы эстон эктон но возьматӥз. Озьыен, татысь «Уӵы ныл» калык ансамбльлэн кылем арын Эстониын ортчем ӵыжы-выжы калыкъёслэн нуналъёсазы пыриськемез юнме луымтэ. Соос удмурт калык кырӟан-эктонъёсты возьматэмзы сяна, сьӧразы эстон лулчеберетлэсь люкетсэ но вайыны тыршиллям. Быдэс зал тыр люкаськем учкисьёс эктӥсьёслы зол кичабонъёс кузьмазы. «Зоренька» ансамбльлэн покчи группаяз ветлӥсь пиосты но татын шуныт пумитазы. Шӧдӥське, азьланяз соос сцена вылын тапыр-тапыр эктозы на. Нош татысь ӝужась кизили Радис Гайниятов шулдыр кырӟанъёсыныз паймытоз на, дыр.
Вязовка культура юртысь сцена вылын нылпиосынызы ӵош анай-атайёс но быгатонлыкъёссэс возьмато. Та нуналэ, кылсярысь, «Уӵы ныл» ансамбль «Кырӟаса, кырӟаса», «Быдӟымнал» композициосты возьматӥз, нош «Вуюись» нылкышно вокал ансамбль удмурт но ӟуч кырӟанъёсты куинь куараен быдэстӥз.
Концертэ Удмурт Элькунысь арганчи Иван Котельников но шумпотыса вуиз. Люкаськем калыкез со задор гуръёсын шулдыртӥз. Шутэтскон ӝытэз аспӧртэм гуръёсыныз-кырӟанъёсыныз узырмытӥзы на «Ӟеч малпанъёс» ансамбль, Алёна Тимерханова, Альфира Камалтдинова но Лилиана Нуриахметова.
Вязовкаысь кырӟась-эктӥсьёслы, татысь культура юртлэн ужезлы нимысьтыз кылдытэм комиссия ӟеч дунъет сётӥз. Удмурт калыклэн лулчеберетэз соослэн сюлмазы яркыт тылсиен ӝуатскиз.
Ольга НИГАМАТУЛЛИНА.
Татышлы ёрос.
Оставить сообщение: