Башкортостанлы федерал квота 4770 адямилы ӵоша. Тужгес трос калыкез пумиталоз Стерлитамак город – 240 адями. Нош Салават 230-зэ интыялоз. Нефтекамск, Октябрьский городъёсы 210 адями вуоз, Кумертауэ - 140, Сибае, Белебее, Ишимбае – 120. Белорецк, Бирск, Благовещенск, Дюртюли, Мелеуз, Туймазы, Учалы но Янаул ёросъёсы 110 адями келямын луоз. Баймак, Давлекан ёросъёс 100 адямиез интыяны быгатэмзы сярысь ивортӥзы. Мукет гурт ёросъёсы 50-60 беженецъёс лыктозы. Янаул ёрос, кылсярысь, соосты «Юность» ФОК-е, 101-тӥномеро профессиональной лицее, ёрос эмъюртэ интыялоз. Со сяна, огшоры калык но улон интыен юрттыны мылкыдзэ шарая.
Огдырлы висъям интыосын улӥсьёслы одӥг адями понна нуналаз 800 манет коньдон висъяськоз. Таӵе мугъёслы быдтэм коньдонэз республикалы азьланяз федерал бюджетысь берыктозы.
- Улон интыосын тырмытон сяна, Украинаысь вуэм калыклы ужаны луонлыкъёс кылдытоно. Соос ужаса асьсэды коньдонэн тырмытыны мед быгатозы, - шуиз Рустэм Хамитов город но ёрос администрациосын кивалтӥсьёслы вазиськыса.
Рустэм Хамитов пусйиз, 70 ар талэсь азьвыл Быдӟым Атыкай ож вакытэ тылӝулэсь пегӟыса шаерамы олокӧня сю сюрс адями вуиз.
Украинаысь вуэм калыкез пумитанэн, соосты интыянэн герӟаськем ужъёсын БР-ысь Правительстволэн вице-премьерез Лилия Гумероваен кивалтоно штаб ужалоз. Со сяна, котькуд ёросъёсын но городъёсын со понна нимысьтыз юнматэм адямиос луозы.
- Республикаын миграциен герӟаськем ужъёс котьку ӟырдыт мыно, арлы быдэ олокӧня дас сюрсэн адямиос кошко-берто, - шуиз Рустэм Хамитов. – Республикамы со ласянь ужъёссэ ӟеч быдэстэ. Соин вить сюрс адями соос пӧлын мултэс уз луы. Оскиськом, палэнысь вуэм калыкен ужан кивалтэтлы шугъяськонъёс уз кылдыты.
Дасямын сайтъёсысь материалъёсъя.
Оставить сообщение: