Тазалыкез утён
Тазалыкез утён удысын берло аръёсы шӧдскымон воштӥськонъёс луизы. Табере шаерысьтымы калык кемагес улэ. Сюлэм висёнэн курадӟисьёслы но ӟеч юрттэт возьматыны луонлык кылдӥз. Озьы ке но азьланяз быдэстоно ужъёс трос на.
Владимир Путинлэн верамезъя, туннэ та удысын страховой принципе выжон ужпумез эскероно. ОМС система калыклы дун тырытэк эмъяськыны луонлык мед кылдытоз. Нош эмчи мед тодоз быдэстэм ужзэ кызьы дунъямзэс. Пӧртэм висёнъёсты шараян вылысь, 2015-тӥарысен нылпиос но быдэ вуымтэос арлы быдэ диспансеризация ортчыны кулэ, нош бадӟымъёс – куинь арлы одӥг пол.
Дышетон
Владимир Путинлэн кылъёсызъя, вуоно арын школаез йылпумъясьёсты воштӥськонъёс витьыны быгатозы. Табере соослэсь визьзэс выльысь сочинение пыр «сынаны» малпало. Вылӥяке мукет пӧртэм дышетскон юртъёсы пырыку, огъя кун экзаменъёсын ӵош соослэсь но йылпумъянъёссэс учкыны, пе, кулэ.
- Шаерысьтымы школаос нылпиослы тодон-валан сётон сяна, соосты визьноданы но кулэ, - вераз президент. – Школаын тросэз дышетӥсен герӟаськемын. Туннэ со туала техникаен пайдаяськыны, тазалыксы ляб луэм пиналъёсын ужаны быгатыны кулэ.
Россилэн Президентэз мукетыз пумысен но бадӟым кылпум ӝутӥз. Солэн верамезъя, туннэ тросаз школаосын кык сменаен дышетсконо луо. Нош матысь вить-куать ар куспын нылпиослэн лыдзы миллионлы йылоз. Соин Владимир Путин нылпи садъёсты ӝутон борды мур малпаськонэн кутскыны куре. Азьланяз, пе, соосты покчиёзо школа интые кутыны мед луоз.
- Со нылпи садъёсты ӝутонлэсь дунзэ будэтыны кулэ ӧвӧл. Соин, оло, нылпи садэз но покчиёзо школаез одӥг липет улэ пыртон сярысь но малпаськоно, - пусйиз В. В. Путин.
Дышетонэн валче спортэз азинтон сярысь но, пе, вунэтоно ӧвӧл. Президент азьланяз но калыке тазалыко улонэз вӧлмытыны куре. Со понна ик шаерамы спортэн герӟаськем ужрадъёс ортчыло. Владимир Владимирович оске: нылпиосты тазалыко улонэн эшъяськытыны вуоно арын ортчоно Тол олимпиада но юрттоз. Нош спорт пиналъёслэн дышетсконзылы уз люкеты, соос ог-огзэс ватсало гинэ уга.
Экономика
ВВП-лэн быдӟалаезъя, Путинлэн верамезъя, Россия дуннеысь вить азьмынӥсь шаеръёс пӧлы пыре. Нош ужлэн ӝоглыкезъя асьмеос трослы бере кылиськом.Соин азьланяз уж дурын туала технологиосты паськыт вӧлмытоно, ужасьёслэсь тодон-валанзэс будэтон сярысь сюлмаськоно, ӟеч инвестиционной климат кылдытоно.
Трудовой миграция
Арысь аре Россиын палэнысь вуэм ужасьёслэн лыдзы йылэ. Соосын сэрен шаерамы кышкыт учыръёс но кылдыло. Соин РФ-лэн Президентэз азьланяз уж сётӥсьёсты кунгож сьӧрысь ужасьёссы понна кыл юн кутытыны куре. Со сяна, палэнысь лыктэмъёс налог но мукет выллем тыриськонъёслэсь палэнскыны кулэ ӧвӧл. «Асьмеос азьвыл Совето Союзысь республикаосын кусыпъёсмес быдтыны ум быгатӥське. Но шаермылэсь ӟечыксэ утёно, - вера Президент. – Соин мигрантъёслэсь малы но кӧня дырлы шаерамы вуэмзэ кунмы тодыны кулэ».
АПК
«Шаермылэн бадӟым ужпумез - гурт улонлэсь но ужлэсь данзэ ӝутон. Гурт удысэз азинтонлы трос коньдон быдтэмын. Татын азьпала ӟеч вамышъёс шӧдӥсько. Озьы асьмеос шаермес пӧртэм вузъёсын тырмытыны быгатӥмы. Гурт калыклы со понна бадӟым тау, - вера Владимир Путин. – Табере гурт калыклы ӟеч инфраструктура кылдытон сярысь сюлмаськоно. Сое АПК-ез азинтон сярысь кун программае воштӥськонъёс пыртыку но лыдэ басьтоно».
Дасяз
Ольга НИГАМАТУЛЛИНА.
Оставить сообщение: