Школазэ йылпумъяса, ассэ улонысь шедьтоз

Максимлэн нырысетӥез малпанэз быдэсмемын ик шуыны луоз, малы ке шуоно со ньыльёслы но витьёслы гинэ дышетске. Соин пӧртэм предметъёсъя ёрос олимпиадаосы ӵемысь кужымзэ эскерыны ветлэ. Йырвизьзэ сынам сяна, лул-мугорзэ но кыдатыны уг вунэты. Пыдын бызьылэ, куас вылэ но султэ. Со сяна, Максим лыдӟиськыны яратэ. Ми вуылон нуналэ но со Ульфат Бадретдиновлэсь «Ӵушъял вордӥське веньёстэк» книгазэ лыдӟе вал.

«Максим - атаезлэн бур киыз. Корка, мунчо вутыкузы соос котьку ӵошен ужазы но ужало. Тыршись пияш анаен песяезлы но юрттӥськыны дыр шедьтэ», - вера школаысь удмурт кылъя но литературая дышетӥсь Земфира Ибраева.

Оскиськом, азьпалан Максимлэн мукет малпанъёсыз но улонэ пыӵалозы. 

Марина НИКОЛАЕВА.

Янаул ёрос.