- Школаез йылпумъяды. Тӥ понна жингыртӥз берпуметӥез гырлы куара. Кызьы азинскиз азьпал сюресты?
- Башкир кун аграрной институтэ, ветеринарной медициная факультетэ дышетскыны пыри. 1995-2000-тӥ аръёс отын ортчизы.
- Нош малы гурт удысэн, пудо-животъёсын герӟаськем ӧрез бырйиды?
- Пичиысен пудо-животъёсты яратӥсько вал. Атай агрономлы дышетскемын, солэн выныз но сузэрез – пудо эмъясьёс. Соослэн ужзы мыным котьку кельше вал. Соослэсь адӟем кариськем, лэся.
- Студент аръёсады берытсконо ке, мар тужгес тодады кылиз?
- Спорт ӵошатсконъёс, пӧртэм олимпиадаос, семинаръёс али ке но тодам уло. Кызьы тодӥськоды, активистъёсты дышетӥсьёс ӝог синйылто. Одӥг пол мон доры дышетӥсе – РАН-ысь академик, профессор, Россиысь Естествознаниея академилэн ёзчиез-корреспондентэз Евгений Павлович Дементьев лыктӥз но дипломной уж гожтыны ӵектӥз. Ми дышетскыку яке ньыль экзамен сётоно вал, яке дипломной уж гожтоно. Мон бырйи кыкетӥзэ. «Применение тканевого препарата «Биостим» для выращивания телят» темая дипломной уж гожтӥ. Преддипломной практикаез «Дэменын» ортчи: олокӧня опытъёс, лабораторной ужъёс быдэстоно луиз. Вераны кулэ на производственной практика сярысь но. Сое мон Пермь шаерысь Чернушкаысь ветстанциын ортчи. Малы отчы мынӥ? Малы ке шуоно отын базазы, пудо эмчиоссы кужмоесь вал. Куать толэзь отын тырши: практикаелэн кык толэзез лабораториын ортчиз, ньылез – фермаосын. Ветстанциен кивалтӥсьлэн Владимир Биктимирович Галямшинлэн кичӧлтэмезъя, мон трос тодон-валан басьтӥ, узыр уж опыт люкай.
- Кияды – диплом. Вордскем палъёсады берытскиды-а?
- Бертыса Татышлы ёрос ветстанцие ужаны интыяськи, Ялгызнарат участокен кивалтӥсе юнматӥзы. Со арын ик сӥзьыл аграрной институтысь гожтэт вуиз. Аспирантурае дышетскыны пырыны ӧтизы. Кема малпаськыса ӧй пукы, шуркынмон толэзе экзаменъёс сётыны мынӥ. 2001-тӥ арын толшор толэзе аспирантурае зачислить каризы. 2003-тӥ арын 27-тӥ толсуре диссертациез защитить кари. Солэн темаез вал «Применение тканевого препарата «Биостим» с аэроионизацией воздуха для выращивания телят». 2004-тӥ арын 1-тӥ оштолэзе ветеринарной наукаосъя кандидатлэсь дипломзэ сётӥзы. Дышетскем интыям ик ужаны ӧтё вал. Но ӧнерчиос тырмымтэен, «Дэмен» СПК-е бертӥ. 2005-2007-тӥ аръёсы валтӥсь пудо эмъясьлэсь но валтӥсь зоотехниклэсь ужъёссэ быдэсъяй. Бӧрысь хозяйствоен кивалтӥсьлэн животноводствоя воштӥсез луи, собере - огъя юанъёсъя воштӥсез. 2008-тӥ арын БР-ысь Гурт хозяйствоя министерстволэн тау карон гожтэтэныз пусйизы. 2010-тӥ арын «Дэмен» СПК-лэн отчётно-выборной собранияз хозяйствоен кивалтӥсе бырйизы. Ньыль ар кивалтэм бере, 2014-тӥ арын, инвесторъёсын ужаны кутским.
- «Профессор» нимлы кузё луон понна, трос ужано, дыр. Сое котькинлы уг сёто ук…
- Мон трос лыдӟиськисько но гожъяськисько. 2003-2015-тӥ аръёсы огъя 25 статьяосы печатласькизы: 20-ез – российской изданиосын, 5-ез – иностранной. Соин мон Россиысь Естествознаниея Академие резюмеме келяно кариськи.
- Тыршемды юнме луымтэ. Тани мон азьын «26 отряд ФПС по РБ» ФГКУ-лэн тау карон гожтэтэз. Со 2015-тӥ арын тылпуэн нюръяськонлы сӥзем учениосын сётэмын. Тӥ шоры учкыса, малпан кылдэ: та адямилэн улоназ ваньмыз пӧрме, дыр, солы нокыӵе шуг-секытъёс кышкыт ӧвӧл. Озьы-а?
- Озьы. Вераме потэ на одӥгзэ – бадӟым уж быдэстыса вормон утон понна, юрттэт но кулэ. Тау кылъёсме верасько анай-атайлы. Соос котьку мынам малпанъёсылы, ужъёсылы дурбасьто, кенешен юртто. Кызьы шуо ӟучъёс: «Один в поле - не воин».
- Азьпалан кыӵе малпанъёсты?
- «Профессор» нимлы кузё луи бере, докторской диссертация борды басьтӥськыны малпасько.
- Тау, Рустам Ренатович. Малпанъёсты одно ик мед быдэсмозы.
- Тау.
Вераськиз Миляуша БУЛАТОВА.
Оставить сообщение: