icon_gotop
18+
autorisation
Войти | Регистрация
Время в Татышле
04:24
Пятница, 29 Марта
Рекламный баннер 990x90px top

Одӥг гердэ биниськемын

08:23 21.04.2016

Дас куинь ар ӵоже гурт поселенилэн администрациеныз Валентина Жумашевна Васиуллина кивалтӥз. Кышномурт лул-сюлэмзэ сётыса тыршиз, гурт калыклы каньыл улыны луонлыкъёс мед луозы шуыса. Али дыре но пенсиысь кышномурт гуртоосыз сярысь сюлмаськыса улэ. 2015-тӥ арысь куарусён толэзьысен гурт поселенилэн администрациеныз Инзиля Галихановна Минликаева кивалтэ.

Шады шур дурысь Шудек гурт. Паймымон шулдыресь татын ульчаос! Гуртэ вуисьёсты пумитаса сямен сыло огзылэсь огзы чебересь коркаос. Вуж юртъёсты татысь шер пумиталод. Сюресъёс асфальтэн шобыртэмын, нокыӵе зоро-кото нуналъёс уг люкето машинаен ветлӥсьёслы капка азязы вуыны. Гуртэ пырыку паллян палан выль микрорайон кылдэмын.

- Сюресъёсмы милям умоесь, куинь гуртъёсы но газ, ву пыремын, ульчаос югдытэмын. Вераны кулэ, Можгаын гинэ ву гумыос пайдаяськыны уг ярало ни, калык гудӟемъёсысь, скважинаосысь вуэн пайдаяськоно луэ. Выль кылдэм микрорайон сярысь ке верано,отын сюлэсь ятыр выль юртъёс ӝутӥсько. Та дыре отысь сюресъёсы гравий киськан, ульчаосты югдытон сярысь сюлмаськиськом. Шумпотымон, Шудекысь культура юртмы табере газэн шунтӥське. Со бордын модельной библиотека ужа, - вера Инзиля Галихановна.

Шудекысь культура юртын ноку куараос уг чалмытско. Нуназе отчы шумпотыса вуо пиналъёс. Культура юртэн кивалтӥсьлэн Валерий Нигиевлэн кичӧлтэмезъя, татын театральной, вокальной, танцевальной, шашкиен, шахматэн но доминоен шудонъя кружокъёс ужало. Духовой оркестр кылдытэмын. Арлыдоослэн «Тюрагай» фольклор ансамбльзы азинлыко ужа, гуртысь одӥг ужрад но соостэк уг ортчы. Арлыдзы шоры учкытэк, тюрагайёс Нефтекамскын, Ижевскын, бускель ёросъёсын ортчем ужрадъёсы но трос пол вуылӥзы ни. В. Нигиев - усто арганчи, со арганэн шудыны мылкыд карись пиналъёсын пукыны но дыр шедьтэ. Со сяна, культура юртын нылкышноослэн «Зангари» но нылпиослэн «Солнышко» ансамбльёссы кылдытэмын. Соосын культура юртысь худрук Ангелина Менгафарова кивалтэ. Фойеын гуртысь егит анайёслэн Диана Гатауллиналэн но Диана Ганиуллиналэн киужъёсынызы адӟытон радъямын.

Библиотекаен кивалтӥсьлэн Ольга Мухаметшиналэн кылъёсызъя, библиотекаын 12 сюрслэсь ятыр пӧртэм книгаос но газет-журналъёс лыдъясько. Лыдӟиськыны мылкыд карисьёслэн лыдзы ӧжыт шуыны уг луы.

- Гуртоосмы шумпотыса библиотекае вуыло, тужгес но тол ӝытъёсы. Библиотека бордын «Оптимист» клуб ужа. Отчы пыриськисьёсын ӵош пӧртэм ужрадъёс радъяськом. Кылсярысь, кема ӧвӧл Тазалыклэн нуналэзлы сӥзем флешмоб ортчытӥм. Ужрад туж тунсыко пӧрмиз: тужгес пичи участникмылы 2 арес вал, тужгес бадӟымезлы – 69 арес, - вера библиотекаен кивалтӥсь.

Гурт сяськая но бадӟыма бере, иське, егитъёс татысь кошкыны уг дырто. Соослэн выжызы вордскем музъемазы бурмемын. Егит семьяос асьсэлы выль юрт ӝутон сярысь сюлмасько. Кылем арын Шудекын выль юртэ улыны выжиллям 7 семьяос, Можгаын но Кониговоын – быдэн 1 семья. Гурт поселениын «Социальное развитие села», «Улучшение жилищных условий» программаос азинлыко ужало.

Кылем арын «Реальные дела» проект улсын Шудек школалэсь укнооссэ, ӧсъёссэ выльдӥзы. Татын 56 пинал тодон-валан басьтэ. Можгаысь но Кониговоысь нылпиосты автобусэн нулло.

Шудекъёслэн вуз карон юртсы но аспӧртэм, шуыны луоз. Со городъёсысь супермаркетъёслэсь номырин уг висъяськы. Кызь арлы матэ ужбергатон удысын тыршись Лира но Леонид Валиевъёслэн магазиназы гурт калык шумпотыса вуэ. «Магазинмы туж узыр. Сиён-юон-а, хозяйственной вузъёс-а кулэ – ваньмыз вань. Одӥг арбери понна гинэ Янаулэ уд мыны ук. Вузъёслэн ӟечлыксы пумысен но ӝожтӥськоно ум луиське», - малпанъёссэс шараяло басьяськисьёс.

Шудек гурт поселениын арлэн котькыӵе вакытаз улон «пӧзе». Калык сям-йылолъёсты утёнлы, азинтонлы сӥзем ужрадъёс ноку палэнэ уг кылё.

- Калык котьма борды шумпотыса басьтӥське – ужаны но, шулдыръяськыны но. Выль ар праздник азьын лымылэсь лэсьтэм фигуркаослы конкурс ялэмын вал. Котькуд гурт ульчаостӥ ортчы - ваньзы мар ке но тупатӥллям вал! Гуртъёс выжыкыл дуннелы пӧрмиллям кожалод, - шуэ Инзиля Галихановна.

Можга гуртын улӥсьёс ваньмон, шутэтскон дырзэс клубын пайдаё ортчыто. Татысь «Инвожо» фольклор ансамбле арлыдоос мылысь-кыдысь пырисько. Клубен кивалтӥсь Альмира Апсаликова каникул нуналъёсы нылпиос понна тунсыко конкурсъёс, шудонъёс ортчытон сярысь сюлмаське.

Шудекын фельдшерско-акушерской пункт ужа. Отчы куинь гуртъёсысь арлыдоос ӵем вазисько. Висисьёс но пичи нуныос доры ФАП-ын ужасьёс асьсэос вуыло.

Та куинь гуртъёсын улӥсьёс пӧлын Янаулэ, Нефтекамске ветлыса ужасьёс вань. Сюлэсь ятыр ужасьёс «Победа» ООО-ын тыршо. Кужмо, пыд йылаз йыгмыт сылӥсь, азинскись хозяйство луэмен, калык ужлы ёрмыса уг улы. Кызьы пусъё гуртын улӥсьёс, соослэн уждун ласянь шугъяськонъёссы ӧвӧл. Фермаосын туала улонлэн куронъёсызлы тупась ужан тӥрлыкъёс юнматэмын. Азьло скал кыскисьёс йӧлзэс ведраосы тырыса поттало ке вал, али йӧл гумыос кузя кошке. Югыт, шуныт фермаосын  ужасьёслы вань луонлыкъёс кылдытэмын.

Нош сюлмаськонъёс сярысь ке верано, гуртын нылпи сад ӧвӧл. Уж дуразы дыртӥсь анай-атайёс нылпиоссэс Янаулысь нылпи садъёсы нуллоно луо.

- Гуртамы нылпи сад луысал ке, школаын дышетскисьёслэн лыдзы ӧй кулэсмысал, - шуэ Инзиля Галихановна. – Нылпиослэн пичиысен городысь нылпи садэ ветлэмзы анай кылэз дышетон бордын но шӧдӥське. Отын соос ӟуч сямен верасько. Нырысетӥ классэ лыктэм пиналлы удмурт кылэз дышетон секытэн сётӥське.

Зэм, Конигово, Шудек урамъёстӥ ортчыса ми валамы, макем тыршись калык татын улэ. Тулыс нырысетӥ вамышъёссэ гинэ лэсьтэ на, зоро нуналъёс но шундыё нуналъёслэсь трос пумисько, озьы ке но адямиос юртъер котырзэс утялтӥллям ни, нокытысь жуг-жагез уд адӟы, капка азьёс ӵужылэмын. Таӵе шулдыресь гуртъёсы сюлэм выльысь куриське. Огкылын вераса, Шудек гурт поселениын тупаса уло. Калыклэн куронъёсыз, ӵектонъёсыз эскериськытэк уг кылё: интыысь кивалтэт но калык одӥг гердэ биниськемын.

Миляуша БУЛАТОВА.

Янаул ёрос.

6167

Оставить сообщение: