Ныллэн кужымез чеберлыкез бордын

Чебер удмурт нылъёслэсь пӧртэм ӧрын быгатонлыксэс, чеберлыксэс, асьсэды сцена вылын чебер возьыны быгатэмзэс Россиысь удмурт диаспораосъя координатор, Ижевскысь камсьӧр удмуртъёслэн огазеяськонэнызы кивалтӥсь Ф. А. Чибышева, Вуж Варяш гурт поселенилэн администрациеныз кивалтӥсь М. Ш. Шаритдинов, Янаул ёросысь культурая управлениысь валтӥсь ӧнерчи Г. Р. Ханнанова, Татышлы ёросысь культурая управлениысь валтӥсь ӧнерчи, «Забава» ӟуч калык вокал ансамблен кивалтӥсь А. В. Гарифуллина но «Янаульские зори» газетлэн корреспондентэз И. Г. Шайхутдинов дунъязы.

Конкурсэз Вуж Варяшысь  «Югдон» калык фольклор ансамбль усьтӥз. Соосты сцена вылын воштӥзы чеберайёс. Конкурсэ вуизы Татышлы ёросысь Арибашысь Диана Гильмаутдинова, Выль Татышлыысь Анастасия Самигулова, Калмиярысь Екатерина Хайдаршина, Янаул ёросысь Шудекысь Яна Васиуллина, Вуж Варяшысь Диана Насибуллина, Вылысь Барабановкаысь Светлана Набиуллина, Барабановкаысь Аэлита Хамидуллина, Калтасы ёросысь Бадӟым Качакысь Марина Набиуллина. Удмурт чеберайёсты задор мылкыдын но зол кичабонъёсын пумитам бере, кыл сётӥськиз Вуж Варяш гурт поселенилэн администрациеныз кивалтӥсьлы Миншакир Шаритдиновлы. «Конкурсэ пыриськисьёс огзылэсь огзы чебересь. Нош туннэ соос пӧлысь тужгес чеберзэгес бырйыны кулэ», - шуиз со.

Чеберайёс учкисьёслы тужгес усьтӥськизы «Мон но мынам вордӥськем шаере» визитка пыр. Татын соослэн вордӥськем шаерзэс, анай-атайзэс мур гажамзы но яратэмзы шӧдӥськиз. Кылсярысь, Диана Гильмаутдиновалы ассэ возьматыны гуртоез Лилия Гараева юрттӥз. Со егит ныллы выжыысь выжые сётӥськись чеберъяськонъёссэ кузьмаз. Нош Яна Васиуллина кырӟаны-эктыны но арганэн шудыны, пе, яратӥсько. Удмурт Элькунысь Чупчи шур дурысь ныл улонзэ башкир удмурт пиен герӟам.

Куинетӥез конкурс «Песяйлэн шыкысысьтыз» нимаськиз. Татын нылъёслэсь удмурт калык дӥськутэз, удмурт калыклэсь историзэ, культуразэ но сям-йылолъёссэ, удмурт литературной кылэз тодэмзэс эскеризы. Котькудӥз нылаш вашкала удмурт дӥськут сярысь пыр-поч мадиз. Ку но кытын та дэремез дӥсязы, кыӵе чеберъяськонъёс нуллӥзы но трос мукет. Та конкурсын ик нылъёслы сям-йылолъёсты но тодазы ваёно луиз. Соос котькудзы шыкысысь йылолъёсын бумага поттылӥзы.

Кылсярысь, Д. Гильмаутдинова выль кенак пылатон сярысь мадиз, выль корка пырон нергеен А. Самигулова тодматӥз, Я. Васиуллина сюанлэн ортчемез сярысь мадиз, Д. Насибуллина кисьтонлэн радлыкеныз тодматӥз, С. Набиуллина армие келян сярысь вераз, Е. Хайдаршина кулэм уй потон нуналэ кызьы кулэмъёслэсь утиськыны валэктӥз, М. Набиуллина Быдӟымнал сярысь вераз, А. Хамидуллина вӧсьлэн радлыкеныз тодматӥз. Нылъёсмы чебер удмурт кылын вераськеменызы но паймытӥзы. Николай Байтеряковлэсь «Анныкей» кылбурзэ туж чебер, лад-лад но сюлэмез бугыртыса вераз Анастасия Самигулова. Нош Диана Насибуллина дышетӥсезлэн юрттэмезъя гожтэм кылбур чуръёсыныз тодматӥз.

Вашкала дырысен удмурт калык сиён-юон пӧраны быгатонлыкъёсыныз данъяськылӥз. Тани туннэ но нылъёс пӧртэм удмурт пӧръёсын вуиллям. Нырез бичатӥсь пӧръёслэн –кальга ныролэн, табаньлэн, зыретлэн, пельняньлэн, перепечлэн - ческыт зынзы котыре лӧсъяськиз. Жюри соослэсь удалтэм пӧръёссэс вылӥ дунъяз. Сиён-юон пӧран сяна, чеберайёсмы киужъёсын вырыны но туж шаплыесь вылӥллям. Соослэн киужъёсынызы быдэстэм адӟытон туж узыр но чебер пӧрмем.

Нош макем чебер кырӟало но шаплы экто вылэм асьме нылъёсмы! Со сяна, крезьгуро инструментъёсын шудыны но йӧндыро. Кылсярысь, Диана Гильмаутдинова ачиз гитараен шудыса кырӟаз. Оглом вераса, творческой конкурс туж усто пӧрмиз. Таин чеберайёслэсь быгатонлыкъёссэс эскерон йылпумъяськиз. Жюри йылпумъянъёс лэсьтытозь, учкисьёслы нимысьтыз концерт возьматӥзы.

Тани вуиз тужгес но шурдыт вакыт. Котькинлэн ӝоггес йылпумъянъёсты тодэмез потэ. Кыл сётӥськиз Г. Р. Ханнановалы. Со тужгес пинал чебераез Светлана Набиуллинаез кузьымен пусйиз. «Приз зрительских симпатий» номинациын вормисе потӥз Марина Набиуллина. Солы кузьым басьтыны юрттӥз Янаул городысь «Хозяйка» магазинлэн кузёез Инна Нургалиева. Со сяна, Гульнара Раулевна Диана Гильмаутдиноваез «За преемственность поколений», Аэлита Хамидуллинаез «За сохранение народных традиций», Екатерина Хайдаршинаез «За артистичность» номинациосысь дипломъёсын но нимысьтыз кузьымъёсын пусйиз. Нош кин куинетӥ интые потӥз? Куинетӥ степенё дипломен Анастасия Самигуловаез пусйизы. Кыкетӥ но нырысетӥ интыосты люкизы Светлана Набиуллина но Яна Васиуллина. Гран-приез Вуж Варяшысь чеберай Диана Насибуллина басьтӥз.Со сяна, Янаулысь «Цветы» магазинлэн кузёез Вероника Белова солы сертификат кузьмаз на.  

Та нуналэ БР-ысь удмуртъёслэн НКЦ-енызы кивалтӥсь С. Г. Гарифуллин Тау карон гожтэтъёсын вуэм. Салимьян Гарифуллинович соосты Вуж Варяш гурт поселенилэн администрациеныз кивалтӥсьлы М. Шаритдиновлы, татысь культура юртысь коллективлы но Илиш ёросысь Верхнеяркеевоысь культурая дворецысь методистлы С. Шайдуллиналы сётӥз. Со сяна, Юрис Саитовез вордӥськем нуналэныз ӟечкылаз.

БР-ысь удмуртъёслэн НКЦ-енызы кивалтӥсьлэн воштӥсез Ю. С. Саитов Башкортостанысь Калыкъёслэн эшъяськон юртысьтызы вуэм гожтэтэн тодматӥз. Отын ужрадлэн кулэлыкез, удмурт калыклэсь культуразэ азинтонын но утёнын бадӟым люкет пыртэмез пусъемын. Со сяна, ужрад, пе, зэмос узыр праздник. Юрис Саитович озьы ик «Чеберина-2016» конкурсэз радъяны юрттӥсьёслы тау карон кылъёссэ вераз.              

Марина НИКОЛАЕВА.

Янаул ёрос.