icon_gotop
18+
autorisation
Войти | Регистрация
Время в Татышле
14:58
Sunday, 17 Октября
Рекламный баннер 990x90px top

«Выжы кыл» фестиваль – шуныт пумиськон

2016-04-14

Таӵе кылъёсын усьтӥськиз Екатеринбургын ортчем «Выжы кыл» региональной фестиваль. Туэ со витетӥ ползэ радъяськиз. Фестивале Удмурт Республикаысь, Татарстанысь, Башкортостанысь, Тюмень но Свердловск улосвылъёсысь творческой коллективъёс вуизы. Ужрадэз радъязы Свердловск улосвылысь удмуртъёслэн «Эгес» национально-культурной огазеяськонзы, Свердловск улосвылысь Калык творчествоя дворец но Вылысь Пышмаысь 25-тӥ номеро школа, кытын удмурт нылпиослы «Ваёбыж» воскресной класс ужа.

Фестивальын декоративно-прикладной искусствоя, «Эгеслэн» туспуктэмъёсызъя, Удмурт Республикаысь печатной изданиосъя адӟытон радъямын вал.

Свердловск музъем вылын 14 сюрслы матэ удмуртъёс уло. Вордӥськем палъёссылэсь, анай кылзылэсь мӧзмыса, та выллем ужрадъёсы соос шумпотыса вуо, пумиськонъёс радъямез понна «Эгеслы», солэн Дегтярскын, Режын, Ревдаын, Каменск-Уральскийын, Вылысь Пышмаын, Первоуральскын, Сысертьын, Первомайский но Дружинино посёлокъёсын, Стриганское селоын ужась 9 филиалъёсызлы тау кылъёссэс верало.

Ужрадэз усьтӥзы «Чингыли» нылпи коллектив но «Азвесь гур» фольклор ансамбль. Та ансамбльёсы ветлӥсьёс фестивалез ортчытыны спонсор юрттэт но возьматӥзы. Фестивальын Удмурт Республикаысь Правительствоен кивалтӥсьлэн Владимир Невоструевлэн ӟечкылан телеграммаез лыдӟемын вал. Озьы ик шуныт кылъёссэс веразы УР-ысь Йӧскалык политикая министерствоысь регионъёсысь общественной огазеяськонъёсын ужанъя ӧнерчи Флюра Чибышева, Свердловск улосвылысь огъя но профессиональной тодон-валан сётонъя министр Юрий Биктуганов, Свердловск улосвыллэн Губернаторезлэн администрациысьтыз Йӧскалык кусыпъёсъя управлениен кивалтӥсьлэн воштӥсез Анатолий Десятов, пӧртэм ведомствоосын кивалтӥсьёс но улосвылысь национально-культурной огазеяськонъёслэн директоръёссы но азьветлӥсьёссы.

Фестиваль тунсыко ортчиз. Сцена вылын асьсэлэсь быгатонлыкъёссэс усто возьматӥзы нимысьтыз кырӟасьёс но 15 фольклор ансамбльёс. Кыӵе гинэ кырӟанъёс ӧз чузъяське сцена вылысен! Капчи, задор эктонъёс учкисьёслэсь мылкыдъёссэс ӝутӥзы. Ансамбльёсын возьматэм вашкала удмурт йылолъёс котькинэ анай-атай юртазы, пичи гуртъёсы вуттӥзы, луоз. Ужрад фестивале вуэмъёсты ӟечкыланэн йылпумъяськиз. Соосты дипломъёсын но синпель кузьымъёсын данъязы.

Фестиваль арысь аре паськыта, сяськая. Оскиськом, вуоно арын со эшшо но трос эшъёссэ огазеялоз. Фестивалез ортчытыны юрттэт возьматӥсьёслы пумтэм тау кылъёсмес вераськом.

 Марина ЯГУТКИНА,

«Эгес» национально-культурной огазеяськонэн кивалтӥсь, Свердловск улосвыллэн губернаторез бордысь Калыкъёсын ужанъя консультативной Кенешлэн ёзчиез.

2013

Оставить сообщение:

НАШИ ПАРТНЕРЫ