icon_gotop
18+
autorisation
Войти | Регистрация
Время в Татышле
22:56
Sunday, 19 Сентября
Рекламный баннер 990x90px top

Куасэн ӝоггес бызьыло вязовкаос

2016-04-07

Ӵошатсконэ, азьвыл аръёсы сямен ик, Татышлы ёросысь куасчиос люкаськизы. Зэм, отчы Бурай, Янаул ёросъёсысь спортсменъёс но ӧтемын вал. Куазь урод луэмен, соос вуыны ӧз быгатэ. Но ӵошатсконэз радъясьёс оско, вуоно арын куас сюрес вылын пӧртэм ёросъёсысь спортсменъёс пумиськозы шуыса. Р. Б. Галямшинлэн кузьымез понна куасэн бызьылонэз арлы быдэ ортчытыны чакламын. Нош туэ куасчиосты ӟечкыланы вуизы БР-ысь удмуртъёслэн национально-культурной центренызы кивалтӥсь С. Г. Гарифуллин но солэн воштӥсез Д. М. Биктимиров, Татышлы ёросысь «Дэмен» СПК-ен кивалтӥсьлэн воштӥсез  Р. Р. Галямшин но БР-ысь удмуртъёслэн НКЦ-зылэн спортъя сектореныз кивалтӥсь А. И. Сабанчин. Куасчиослы соос капчи сюрес сӥзизы.

Ӵошатсконэз 4-6-тӥ классъёсын дышетскисьёс усьтӥзы. Нылъёс куас сюрес вылэ шаплы кошкизы. Шӧдӥське, спортлэн та видэзлэсь соос мӧзмемын ни. Ёросын куасэн ӵошатсконъёс ӵемысь уг ортчыло угось. Чылкак соин ик Р. Б. Галямшинлэн кузьымезлы куасэн бызьылонэз улӟытыны малпамын. Нылъёс пӧлын финише нырысетӥен вуиз Вязовкаысь Рената Нуриахметова. Со Улысь Балтач но Выль Татышлы школаосысь Виолетта Гузаероваез но Олеся Тубаеваез ӧжытлы бере кельтӥз. Нош пиос пӧлын Вязовкаысь Глеб Биктимировлы вуисьёс ӧз луэ. Со Кызыл-Ярысь Александр Шайсламовез но Ярослав Мукаевез азьпалтӥз. Со сяна, пиос пӧлын нырысетӥ но кыкетӥ интыос сётэмын на Вязовкаысь Валериан Гилимзяновлы но Выль Татышлыысь Данил Кабипяновлы.

Стартэ султӥзы 7-9-тӥ классъёсын дышетскись пиос. Соос котькудзы туннэ бадӟым вормонлы оско. Но финишын нош ик удалтӥз вязовкаослы. Отысь Марсель Минниахметов нырысетӥ интые потӥз. Нош гуртоосыз Ролан Хазипов но Владимир Шарапов кыкетӥ но куинетӥ интыосты люкизы.Таӵе вормон Вязовкаысь нылъёсты бурдъяз, кожалод. Отысь Наталия Манапова финише нырысетӥен вуиз, нош Александра Гарифьянова – куинетӥен. Кыкетӥ интыез Кызыл-Ярысь Виктория Зарипова басьтӥз.

Дасэтӥ-дас одӥгетӥ классъёсын дышетскисьёс пӧлын но вормон понна ӟырдыт нюръяськон мынӥз. Улысь Балтачысь Марс Зайдуллин куас сюрес вылэ султэмез бере ик зол кужымзэ возьматӥз. Соин тросэз учкисьёс солэн вормонэзлы оскизы. Марс соослэсь осконзэс быдэстӥз, финише нырысетӥен вуиз. Кыкетӥ но куинетӥ интыосы потӥзы Вязовкаысь Кирилл Рахимьянов но Улысь Балтачысь Влас Кайранов. Нош нылъёс пӧлын куас сюрес вылын тужгес шаплы луиз Вязовкаысь Марианна Аллаярова. Солэсь берегес кылизы Улысь Балтач школаысь Янна Шайсламова но Валерия Губаева.

Бадӟымъёс пӧлын но куас сюрес вылын зэмос нюръяськон мынӥз. Стартын – 18-40 аресъем куасчиос. Физкультурая дышетӥсьёс куас сюрес вылтӥ ӝог ширто. Вязовкаысь Руслан Нуриахметовлы дор пал инкуазез юрттӥз, лэся, финише со нырысетӥен вуиз. Нош кыкетӥ интые потӥз Улысь Балтачысь  Юрий Губаев. Ньыльдон ареслэсь бадӟымъёс пӧлын но физкультурая дышетӥсьёс кужымзэс мертазы. Татын выльысь вязовкаослы удалтӥз – нырысетӥ интые потӥз Яков Бадамшин. Кыкетӥ вуиз Улысь Балтачысь Радмир Губаев. 

Куас сюрес вылын вормисьёсты медальёсын, данъян грамотаосын но синпель кузьымъёсын данъязы. Соосты басьтон сярысь Ренат Биктимирович но солэн Рустам пиез сюлмаськизы. Со сяна, ӵошатсконэз ортчытыны коньдонэн Динар Биктимиров юрттӥз. Табере со арлы быдэ куасчиосты Ренат Биктимирович Галямшинлэн призэзлы ӵошатсконэ «Косая степь» шутэтскон базаяз возьма. 

Ольга НИГАМАТУЛЛИНА.   

2316

Оставить сообщение:

НАШИ ПАРТНЕРЫ