icon_gotop
18+
autorisation
Войти | Регистрация
Время в Татышле
23:10
Четверг, 28 Октября
Рекламный баннер 990x90px top

Вылезлы дышетэ нылпи творчествоя фестиваль

2016-03-31

Деловой шудон

«Нырысетӥяз нылпи творчествоя фестивальын но «Деловой шудон» тазьы радъяськиз. Котькуд школаысь команда ас понназ шудӥз», - ортчем аръёсазы берыктӥськыса кадь верало дышетӥсьёс. Школалэн коридораз котькуд командалы нимысьтыз ӝӧк дасяллям.  Пиналъёс визитказэс возьматэмзы бере, кыл сётӥськиз Бадӟым Качак школаысь удмурт кылъя но литературая дышетӥсьлы В. М. Набиевалы. Со нылпиослэсь пӧртэм ласянь быгатонлыкъёссэс сыназ. Нырысь, кылсярысь, дышетӥсь пиналъёслэсь мадиськонъёсты тодэмзэс эскериз. Нош собере одӥг буквалэсь кутскись кылъёслэсь текст, пе, малпано. Пиналъёс дышетӥсьлэсь куронъёссэ синмаськымон быдэстӥзы.

Туэ нылпи творчествоя фестиваль Кинолэн арезлы сӥземын вал. Соин «Деловой шудонын» пӧртэм киноос, актёръёс пумысен юанъёс луизы. Жаляса верано, татын удмурт кылын киноос сярысь кылпум ӧз поттэ. «Деловой шудон» нылпиослэсь крезьгурез валамзэс но пӧртэм калык эктонъёсты быдэстыны быгатэмзэс эскеронэн йылпумъяськиз. Татын шӧдӥськиз: пинал удмурт усточиосмылэн пельёсазы гондыр пукымтэ. Соос крезьгурез но ӟеч валало, эктыны но йӧндыро. «Деловой шудон» бере командаосты пӧртэм номициосысь грамотаосын данъязы.

Татышлы ёросысь Улысь Балтачысь вуэм командаез, кылсярысь, «Тужгес аспӧртэмез»  номинациын вормисен лыдъязы, арибашъёсты – «Тужгес тунсыкоез», уразгильдыосты – «Тужгес кылбурась», калмияръёсты – «Тужгес шаплы», выль татышлыосты – «Тужгес чебер эктӥсьёс», кызыл-яръёсты - «Тужгес устоосыз», Балтач ёросысь асавкаосты – «Сям-йылолэз утисьёс», Янаул ёросысь сандугачъёсты – «Ас кылзэс гажась», вуж варяшъёсты – «Тужгес малпаськись», каймашабашъёсты – «Усто кылбур лыдӟись», кузёосты - «Тужгес эшлыкоез». 

Мастерскойынужан

Бадӟым Качак школаын 10-тӥ классын дышетскись Марина Набиуллина пӧртэм тусо лентаосын пужыятӥськыны яратэ. «Школаямы азьло таӵе кружок ужаз. Собере ачим интернетысь учкыса пужыятӥськыны дышетски», - шуэ со. Та нуналэ Марина быгатонлыкеныз эшъёсыныз люкиськыны малпам. Ӵошен соос роза сяськалэсь пичи панно кылдытӥзы. Куд-ог нылъёслэн та уж борды нырысьсэ басьтӥськемзы шӧдӥськиз. Нош кинъёс ке веньёсын, лентаосын кемалась ужамын ни. Озьы ке но ӧнерчи  нылъёсты ог-огзылэсь висъяны уг дырты, ваньзы, пе, соос устоесь. Но панноез тужгес чебер пӧрмиз Вуж Варяшысь Милена Зайнуллиналэн.

Суредаськисьёс йырзэс ӝутытэк ужало. Дырын-дырын висъетазы пырасьёс но уг люкето кадь соослы. Нылпиос куинь арбериослэсь натюрморт кылдытон бордын тыршо. «Инкуазез котьку суредаськом. Таӵеез борды шергес кутскиськом, - вера дышетӥсьсы Альфия Сабирзяновна Тимирзянова. - Горшокез музейысь поттӥм». Туннэ нылъёс яке пиос чебергес суредасько меда? Мастерскойын ужан возьматӥз: натюрмортсы чебергес пӧрме нылъёслэн. Та нуналэ Уразгильдыысь Елена Шарафисламовалы вуисьёс ӧз луэ. 

Азьвыл аръёсы школаын дышетскись пиос трос тыршизы пу вылэ пӧртэм суредъёс кылдытон бордын. Нош туннэ та удыслы ӧжытгес саклык висъяське. «Выжигатель гуртысь мырдэм утчаса шедьтӥмы. Школаямы со ӧвӧл ни», - верало куд-огез дышетӥсьёс. Пу вылэ пужыятӥськисьёс доры пырыса пайми: татын нылъёс но шаплы ужало.  Улысь Балтачысь Виктория Гильмиярова но Уразгильдыысь Милена Гарифуллина пиослэсь номырин бере уг кылё. Азьвыл ноку, пе, таӵе ужен выреммы ӧй вал. «Тунсыко», - верало нылъёс. Миленалэн ужез мастерскоязы тужгес устоен лыдъямын. Со сяна, татын нырысетӥ инты сётэмын Бадӟым Качакысь Роман Атнабаевлы.  Вераны кулэ, нылпиосты пу вылэ пужыятыны интыысь школаысь дышетӥсь  Лилия Салимзяновна Морозова дышетэ. Солэн тросэз ужъёсыз та нуналэ дасям адӟытонын но возьматэмын вал.

Одӥгаз висъетысь ӝӧк вылэ трос валъёс интыямын. Оло тросэз ӧй но оскысалзы, соос нылпиослэн киосынызы лэсьтэмын шуыса. Валъёсты ог-огзылэсь висъяны ик секыт. Пиналъёслэн тросэзлэн таӵе ужез адӟемзы вылымтэ на. «Кельшиз татын ужаны. Сюйзы ӟеч дасямын, комокез ӧвӧл», - верало дышетскисьёс. Ӝӧк вылысь тужгес чебер валлэн кузёосыз луизы Сандугач школаысь Кирилл Кунакбаев но Бадӟым Качакысь Стас Бакирбаев. «Валъёсты вольытэсь мед луозы шуыса верай вал, - шуиз пиналъёслы дышетӥсьсы. – Мӧзмыт тусоесь медаз луэ».

Крестикен пужыятӥськонын нылъёс тыршыса ужало, ки улазы пӧртэм тусо чебересь сяськаос ӝужало. Соос тужгес яркытэсь пӧрмизы Выль Татышлы школаын дышетскись Ника Муллаяровалэн но Улысь Балтачысь Инесса Зидымаковалэн. Нылъёсты пужыятӥськыны дышетӥзы Анастасия Каматдинова но Евгения Атнабаева. Нылъёс – Бадӟым Качак школаысь 10-тӥ классын дышетскисьёс.

Гожъяськисьёс, дышетӥсьсылэн Виолетта Набиевалэн кылъёсызъя,  кык бордгазет дасяны малпало. Одӥгез Кинолэн арезлы, пе, сӥземын луоз, кыкетӥез – тулыслы, нылпи творчествоя фестивальлы. Пиналъёс мылкыдзэс кылбур чуръёс, зарисовкаос пыр усьто. Гожъяськись нылъёс пӧлысь газетмылэсь юнкоръёссэ но тодмамы. Дышетӥсьсы тужгес устоен лыдъяз Вуж Варяш школаысь пинал автормылэсь – Диана Насибуллиналэсь – ужзэ.

«Чузъяськы, удмурт крезьгур!»

 Нылпи творчествоя фестивальлэн берпуметӥ люкетэз гуртысь культура юртын азинтӥськиз. Пинал кырӟась-эктӥсьёсты, сцена вылысь ӝужась кизилиосты учкыны трос калык люкаськиз. Концертэз Бадӟым Качакысь пӧртэм классъёсын дышетскисьёс усьтӥзы. Собере кыл сётӥськиз куноослы. Вераны кулэ, концертэ котькуд школа кык номерен вуиз. Озьы сцена вылысен эктон, кырӟан гуръёс чузъяськизы, серемес сценкаос возьматӥськизы. Та вакытэ республикаямы пӧртэм калыкъёслэн эшъяськыса улэмзы шӧдӥськиз: ӟуч кырӟанъёсты воштӥзы бигер кылысь берыктэм кылбуръёс, удмурт эктонъёсты пор тапыртонъёс. Тани сцена вылэ потӥз Асавкаысь Луиза Минниахметова. Со Чингиз Айтматовлэсь «Материнское поле» повестезлэсь люкетсэ лыдӟиз. Та вакытэ тросэзлэн учкисьёслэн синкылиоссы но быльыразы, дыр. Вераны кулэ, Луиза та чуръёссэ лыдӟыса, ёросазы «Живая классика» конкурсын нырысетӥ инты басьтӥз. Нылпи творчествоя фестивальын но солы удалтӥз. Луиза Минниахметова «Кылбур» номинациын вормисе потӥз. Нош оген кырӟасьёс пӧлын сцена вылын яркытгес адӟиськиз Улысь Балтач школаысь Яна Фазлыева.

Удмурт пиналъёсмы пӧлын трос вылэм эктонэн эшъяськисьёс. Соос котькудзы сцена вылын аспӧртэм чебер адӟиськизы. Соин, вылды, вормисьёсты быръён но секытэн сётӥськиз. Оген эктӥсьёс пӧлын Выль Татышлы школаысь Ника Муллаяровалы вуисьёс ӧз луэ. Сцена вылын со бубыли сямен поръяз, учкисьёслы удмурт калык эктонэз мур гажан мылкыд пыӵатӥз. Коллективен эктӥсьёс пӧлын нырысетӥ инты сётэмын Уразгильды школаысь пиналъёслэн пор эктонзылы. Соослэн серемес сценказы но тужгес устоен лыдъямын.

Бадӟым Качакысь культура юртлэн сценаез пиналъёс пӧлын трос  выль кизилиосты кенжытӥз. Соин та нуналэ котькин ассэ вормисен лыдъяз. Соос вормонлэн пумитаз вамыштыны дӥсьтӥзы ни угось.

Нылпи творчествоя фестиваль дискотекаен йылпумъяськиз. Пиналъёс эктон гурен лэйкаса, эшъяськон кусыпъёссэс юнматӥзы. Та вакытэ соос лушкемен шуизы: «Тау тӥледлы, пумиськонмес радъясьёс!»

   

          Ольга НИГАМАТУЛЛИНА.

2719

Оставить сообщение:

НАШИ ПАРТНЕРЫ