icon_gotop
18+
autorisation
Войти | Регистрация
Время в Татышле
11:18
Четверг, 29 Июля
Рекламный баннер 990x90px top

Семья - нылпилэн кӧкыез

2016-03-31

Одӥгзэ ужрадмес ми песянайёслы но ӵужанайёслы сӥзимы. Отчы Выль Татышлы гуртысь Рима Дельмышева Яна внучкаеныз но Бальзюгаысь Ифира Гильфанова Аня внучкаеныз пыриськизы. Рима Намиевна кема аръёс ӵоже Выль Татышлы гуртысь школаын пиналъёсты дышетӥз. Кема ӧвӧл дышетӥсь шутэтскыны потӥз. Станислав пиеныз но Люба кенэныз соос тупаса но учкымон уло. Яна внучкаез но солэн Павлик внукез песяйзылэн шумпотонэз луо. Рима Намиевна нылпиосызлы котьку юрттыны тырше. Яна внучказэ лыдӟиськыны, кырӟаны-эктыны дышетэ. Пичи Павликез утён сярысь но сюлмаське. Ужрадамы Яна туж чебер удмурт кырӟан кырӟаз. Со сяна, со ас сярысьтыз но песяез сярысь мадьыкуз шуиз: «Песяе но мон – бадӟым эшъёс. Мынам песяе тужгес чебер но визьмо. Мон сое яратӥсько». Пичи нылашлэн верамез ваньзэ валэктэ, солэн кылъёсаз песяйзэ мур гажамез шӧдӥське. Шулдыр удмурт кырӟан кузьмамзы сяна, Рима Намиевна но Яна ческыт удмурт пӧръёс пӧраса лыктӥллям .

Ифира Гильфанова - егит песянай. Солэн Аня внучкаезлы кематэк ньыль арес тырмоз. Али дыре Ифира Сайфутдиновналэн Вячеслав пиез но Айгуль кенэз Чайковский городын уло но ужало. Соос Татышлы ёросысь Бальзюга гуртэ анай-атайзы, песяйзы доры ӵемысь бертыло. Пичи Аня ӟуч но удмурт кылъёсын умой вераське. Ужрадмес шулдыртыса со кылбуръёс  вераз, кырӟаз но эктӥз. Пичи нылаш ушъяськыны но вутскиз: мынам, пе, кык песяе сяна, песятае, ӵужанае но ӵужатае вань. Вераны кулэ, Гильфановъёслэн семьяязы куинь поколение тупаса улэ. Алик кузпалызлэн анаез но соосын артэ улэ. Пичи Аня трос дыръя гуртэ кыльыса кунояське, песянайёссэ но песятайзэ шумпоттэ.

Ужрадамы Ифира Сайфутдиновналэн Айгуль кенэз но лыктӥз. Соослэн ог-огзэс валаса улэмзы, шунытэсь кусыпъёссы шоразы учкыса ик тодмо. Ифира Сайфутдиновна, Айгуль но Аня удмурт пыжиськемъёсын шумпоттӥзы.

Пумиськонамы вуэм Выль Татышлыысь но Бальзюгаысь песяйёслэн семьяосазы нылпиоссылы пичиысен визьнод сётон сярысь сюлмасько. Киужъёсын выронлы, сям-йылолъёсты утёнлы но бадӟым саклык висъяло.

Ужрадмес чай юыса, шуныт вераськыса йылпумъямы. Пичи нылъёс но куспазы эшъяськизы, пумиськонмы шуныт но тодэ кыльымон пӧрмиз.

        Ирина Самигулова,

       БР-ысь удмуртъёслэн историяя но культурая центренызы кивалтӥсь.

1254

Оставить сообщение:

НАШИ ПАРТНЕРЫ