icon_gotop
18+
autorisation
Войти | Регистрация
Время в Татышле
04:57
Пятница, 29 Марта
Рекламный баннер 990x90px top

Ӵошен ортчем шудо сюрес

09:47 31.03.2016

Витьтон ньыль ар ӵошен улэм кузпалъёслэн – Биктимир но Адия Рахимовъёслэн – тодазы ваёно минутъёссы уно. Соослэн улон сюрессы юн герӟаськемын вордӥськем Вуж Варяш гуртэнызы. Татын соос ужаны но, улыны но дышетскиллям. Пичи дырзы война аръёсы тупам кузпалъёслэн улонзы капчиен ортчем уд шуы. Кыӵе гинэ секытлыкъёс пыр соос потӥллямтэ!

Биктимир агайлы вордӥськем дырысеныз одӥг арня гинэ вылэм, атайзэ оже басьтӥллям. Отысь со берытскымтэ ни, кулэмез сярысь похоронкаез гинэ вуэм. Пияшлы улоназ атай шунытэз валаны гожтымтэ. Семьяяз со пичиез пинал ке но вылэм, улонлэн секытлыкъёсыныз вазь пумиськем. Сизьым классэ йылпумъяса, Ямады гуртысь МТС-ын прицепщик луыса ужаны кутскем. Кык ар ужамез бере, Ямады гуртын дас классъем школа усьтӥськем. Пияш номыр шоры учкытэк дышетсконзэ азьланьтыны мылкыд карем.

Дышетсконзэ йылпумъям пияшлы гуртысь культура юртэн кивалтыны оскиллям.

- Лулысь-сюлмысь кутски уже борды. Калыкен ужаны мыным туж кельше вал. Кӧня концертъёс возьматӥмы меда?! Бускель гуртъёстӥ но концертъёсын, спектакльёсын ветлылӥмы, - тодаз вае Биктимир песятай.

1960-1962-тӥ аръёс но Биктимир Рахимович понна вунонтэм луо. Соку со шаермес утисьёслэн радазы луэм. Отысь бертыса, водительлы дышетскем. Арлэсь кема гинэ ужам выль быръем ужаз, сое берен Вуж Варяшысь культура юртэ ужаны вазиллям, нош ик кивалтӥсе.

- Соку мон Дуванысь сельхозтехникумын дышетскисько вал, зоотехниклы. Бӧрысь сельсоветэн кивалтӥсе пуктӥзы, та ужам 7 ар ӵоже ужай. Со аръёсы сельсоветлэн юртэз Месягутово гуртын вал. Мон ужаку сое Вуж Варяше выжтон сярысь сюлмаськыса трос бызьылоно луи. 1972-тӥ арысь тулыспал толэзьысен Вуж Варяш гурт поселение кылдӥз,  - вера Биктимир песятай.

Бӧрысь кызь куинь арзэ Биктимир Рахимович гурт удыслы сӥзем, зоотехник луыса ужам, вить ар скал вордон фермаен кивалтэм, кык ар – парсь фермаен.

- Мон гурт хозяйствоын ужаку пудо трос вал: 1200 йырлэсь трос ыж, 1000-лэсь трос парсь, 100 йырлэсь трос вал лыдъяськизы, - тодаз вае Биктимир песятай. – Азьло ужаны туж секыт вал, пудо сиён ласянь но шугъяськимы. Тодам на, кызьы Абзелил ёросысь куро ворттӥммы.

Адия Миншатовналэн но пичи дырыз курытэн тодаз кылемын. Бусыын турын октэмзэс, арамзэс тодаз вайыкуз, синкылиосыз ик быльырскизы.

Кызь вить ар ӵоже Адия песянай культура юртын уборщица луыса ужам. Бӧрысь гурт хозяйствоын тыршем.

- Колхозын мон разнорабочей луыса ветлӥ. Отысен ик пенсие потӥ, - вера Адия Меншатовна.

Рахимов кузпалъёс ортчем сюрессы сярысь дугдытэк вераны-мадьыны быгато, но верамазы валтӥсь инты басьто ужам аръёссы. Бамъёсысьтызы кисыриоссы но, киосысьтызы мозольёссы но соослы секыт уж аръёссэс тодазы вайыто, лэся. Кузпалъёс котьку гидкуа тыр пудо утиллям. Туннэ соослэн кужымзы скал вордыны уг ке но тырмы, песятаен песянай чипы-курег, ыж вордо, тулыс ӟазег пи басьто, бакча емыш будэто.

Рахимовъёслэн пизы семьяеныз Ижевскын улэ. Анай-атай юртаз Рафаэль, кузпалыныз но кык пиосыныз, ӵем вуылыны тырше. Соосты татын котьку витё, шумпотыса, шуныт пумитало.

Адия песянайлэн но Биктимир песятайлэн улоназы пӧртэм дыръёссы луиллям. Соос шумпотонъёссэс но, шуг-секытъёссэс но шори люкылӥллям. Котьку ог-огзылы кужмо пыкет луиллям. Ӵошен ортчем улон сюрессэс кузпалъёс шудоен лыдъяло.

Миляуша БУЛАТОВА.

Янаул ёрос.

7490

Оставить сообщение: