icon_gotop
18+
autorisation
Войти | Регистрация
Время в Татышле
14:35
Вторник, 19 Октября
Рекламный баннер 990x90px top

Нылпи куара – юртлэн шулдырез

2016-03-24

Шаерамы «Анаймурт капитал» кун программа азинлыко ужа. Нылпи юртысь пиналъёсты семьяосы интыянлы но бадӟым саклык висъяське. Вераны кулэ, берло дыре нылпи юртысь пинал басьтэм семьяослэн лыдзы трослы йылэмын.

Толсур толэзе Бурай ёросысь Алтау гуртысь Дуся но Айвар Ялаловъёс семьяязы куинь нылпи басьтӥзы. Трос нылпиё семьяын будэм кузпалъёслэн сюлэмзы озьы ӵектэм, вылды.

- Таӵе малпанмы кемалась вань вал. Дыр шедьтӥськымтэмы, лэся, малпанмес быдэстыны. Мар гондыръёс кадь улод?! Кинлы ке шуд, шумпотон кузьманы быгатыкумы, нылпи басьтом шуимы. Тямысэтӥ толсурысен Эвелина, Аделина но Руслан милемын уло. Анай, атай шуыса вазисько, - вера Дуся Ялалова. – Нылъёс Бурай школаын дышетско. Кузпалы соосты нунал дышетскыны машинаен нуллэ. Пимы пичи на, мон соин пукисько. Нылпиосмылы милемын туж кельше, гуртэз но асьсэлэн кадь адӟо. Асьсэлы эшъёс но шедьтӥзы ни.

Нырысь кузпалъёс кык пинал басьтыны малпало вылэм. Нылпи юртэ мыныса, соос одӥг семьяысь куинь нылпиосты бырйиллям. Ёросазы та дырозь куинь нылпи басьтэм семьяос ӧвӧл на вылэм.

Дуся апай 28 ар ӵоже нылпи садэн кивалтӥсь луыса ужам, бӧрысь школаын дышетэм. Со ик юрттӥз, дыр, кышномуртлы улоназ сыӵе бадӟым вамыш лэсьтыны. Нылпи юртысь пинал басьтыны котькин соглаш уз луы угось.

Эвелина но Аделина тыршыса дышетско, пӧртэм ужрадъёсы пырисько, эктыны, кырӟаны ярато. Гуртысь одӥг ужрад но соостэк уг ортчы.

- Ёросын радъяськись ӵошатсконъёсы но пыриськиськом. Кылсярысь, кема ӧвӧл «Мама, папа, я – спортивная семья» шудонын кужыммес мертамы. Вормисе ӧм ке но потэ, отысь ӝутскем мылкыдын бертӥмы, - вера анаймурт. – Милям одӥг бадӟым малпанмы – азьпалан но ӵошен, тазалыкен улыны.

Ялаловъёс шудо анай-атай луон сяна, ӵужай но ӵужатай луо, соослэн кык внукъёссы будо ни. Дуся апайлэн но Айвар агайлэн асьсэлэн вордэм нылзы семьяеныз палэнын улэ. Шутэтскон нуналъёслы быдэ соос атай юртазы берто. Ӵошен шулдыръяськыса, ог-огзылы юрттӥськыса ортчыто нуналъёссэс.

Миляуша НИГАМАТУЛЛИНА.

Бурай ёрос. 

2281

Оставить сообщение:

НАШИ ПАРТНЕРЫ