icon_gotop
18+
autorisation
Войти | Регистрация
Время в Татышле
06:51
Понедельник, 26 Июля
Рекламный баннер 990x90px top

Ӝӧксы узыр сиён-юонэн, шулдыръяськонзы - ӟеч мылкыдо калыкен

2016-03-17

12-тӥ южтолэзе соос ваньзы Ташкичиысь культура юрт азе люкаськизы. Отын Вӧй келян ортчиз. «Масленица едет, масленица едет», - чузъяськизы котыре куараос. Культура юрт азе дӧдьыен валэн егитъёс вуизы. Вӧй келянэз усьтыса вераськизы БР-ысь удмуртъёслэн НКЦ-енызы кивалтӥсь, «Ошмес» газетлэн валтӥсь редакторез С. Г. Гарифуллин, Базитамак гурт поселенилэн администрациеныз кивалтӥсь А. Х. Мусабиров, Илиш ёросысь культурая ёзэтэн кивалтӥсь Р. Н. Гумеров. «Тӥляд нылпиосты медаз вунэтэ удмурт кылзэс, мед утёзы сям-йылолъёсты», - вераз люкаськем калыклы вазиськыса Раиль Наилевич. Ташкичиын арлы быдэ ке но Вӧй келян ортчыто, туэ отчы тужгес трос калык люкаськиз. Ужрадэз дасясьёс соослы ивортӥллям: ташкичиос доры Татышлы ёросысь куноос, пе, вуозы. Улысь Балтачысь Алик Кайрановез учкисьёс зол кичабонъёсын пумитазы. Кырӟасьлы арган гурен Выль Татышлы культура юртын ужась Александр Галиев юрттӥз.

Шулдыръяськонэз Ташкичиысь покчи классъёсын дышетскисьёс «Как встала я ранёшенько» кырӟанэн азинтӥзы. Нош удмурт калык кырӟанъёсты быдэстӥз Ташкичиысь «Пинал сюлэмъёс» ансамбль. Со сяна, татчы шумпотыса вуиллям Итеевоысь куноос. Соослэн «Шулдыръёс» удмурт калык фольклор ансамбльзы учкисьёслы чебер гуръёсты кузьмаз. Кема кыстӥськиз гурт калыклэн кужмыныз дасям  концерт. Трос вылэм татын усто кырӟасьёс но эктӥсьёс. Покчиёзо школаын дышетскисьёс но калык азьын асьсэды паймымон чебер возё.

Кырӟан-эктонъёсты пӧртэм шудонъёс воштӥзы. Учкисьёс соос пӧлысь котькудаз мыло-кыдо пыриськизы. Тани нылкышноос но пиосмуртъёс пуэз бычкыен вандонын кужымзэс эскеро, нош палэнынгес кинъёс ке песьтэрен жугисько. Нылпиослэн но мӧзмыны дырзы ӧвӧл, соос гурезьысь нискылало, писпу вайёсы ошем ческыт кузьымъёслы сузьтӥсько. Шулдыръяськон куролэсь мунё котырын кырӟан-эктонэн, кузь ӝӧк сьӧрын табанен, пӧртэм пыжиськемъёсын чай юонэн йылпумъяськиз. Ташкичиослэн Вӧйлы быдэс гуртэн дасям ӝӧксы, ужрадзы сямен ик, узыр но чебер пӧрмиз.

Ольга НИГАМАТУЛЛИНА.   

*     *     *

Янаул ёросысь Вуж Варяш гурт поселенилэн одӥгаз шулдыр гуртаз, Нанядыын, 7-тӥ южтолэзе удмурт калыкез огинэ люказ НКЦ-лэн ужрадэз - Вӧй дыр шутэтскон. Празднике трос калык люкаськиз. Кузь сюресэз лёгаса Нанядые вуиз Татышлы ёросысь Кызыл-Яр гуртысь «Марӟан» калык ансамбль. Озьы ик Янаул ёросысь бускель гуртъёсысь – Шудекысь, Каймашабашысь, Вылысь Барабановкаысь, Барабановкаысь, Андреевкаысь но Вуж Варяшысь - куать удмурт коллективъёс лыктэмын вал. Туж шумпотыса пумитазы нанядыос ӧтем кунооссэс. Вӧй шутэтсконэз ортчытон понна вань мылкыдзэс соос понӥзы. Гуртысь воргоронъёс урамын, тылскем вылын, ӟазег сӥлен ӝук пӧзьтӥзы. Сцена вылэ тубыса куриськиз Валерий Лукманов. Вӧсяськем ӝукен вань куноосты сектазы.

Ужрадэз усьтыса вераськизы Янаул ёрослэн тӧроез Ильшат Вазигатов, Вуж Варяш гурт поселенилэн администрациеныз кивалтӥсь Миншакир Шаритдинов но БР-ысь удмуртъёслэн НКЦ-енызы кивалтӥсьлэн Янаул ёросъя воштӥсез Юрис Саитов. Озьы ик куное вуэмын вал БР-ысь удмуртъёслэн НКЦ-енызы кивалтӥсь Салимьян Гарифуллин но Янаул ёросысь культурая управлениен кивалтӥсь Ринат Ибрагимов.

Ужрадэз концертной программа шулдыртӥз. Сценаез усьтӥзы кузёос – Наняды гуртысь «Инвожо» коллективлэн арлыдо кырӟасьёсыз. Куноос но ужрадэ чебересь, сюлэмез бугыртӥсь кырӟанъёсынызы но капчи эктонъёсынызы вуиллям. Празднике вуэмъёслы быгатонлыкъёссэ возьматӥз Вуж Варяш гуртысь «Югдон» калык фольклор коллектив но. Сцена вылын тулыслэсь вуэмзэ возьматӥз Тулыс апай. Со празднике саламен вуэм – ю тысь ваем. Таиз ар ю-нянен узыр мед луоз шуыса, со тысьёссэ «Колхоз Восток» СПК-лэн агрономезлы сётӥз. Агрономлы шуд усиз куро мунёез ӝуатыны.

Пичиос но, бадӟымъёс но гурезьёсы нискыланы дыртӥзы. Егитъёс чебермам валэн кырӟаса ветлӥзы. Ужрадын пӧртэм ӵошатсконъёс но радъямын вал. Кин мешокен тэтчаз, кин горшоке бодыен сюрыны тыршиз, нош туж тунсыкоез луиз гозы кыскон. Котькуд шудонъёсын вормисьёслы кузьымъёс дасямын вал. Шудыса, кырӟаса- шулдыръяськыса жадемъёсты ческыт пӧръёсын, пӧсь табанен но чаен куноязы. Ӝӧк сьӧрын вераськыса но кырӟаса пуконъёс кема кыстӥськизы. Та нуналэ калык сюлмысьтыз шутэтскиз. Удмурт гуръёс пеймытозь кылӥськизы на.

Озьыен, улон азьлань мынэ, калыкмы ужаны но, шутэтскыны но быгатэ. Азьланяз но сям-йылолъёсты вунэтытэк, удмурт калык праздникъёсты ортчытыны мед быгатомы. Ӵыжы-выжыосмес вунэтоно ӧвӧл.

     Марина ХИСАМУТДИНОВА,

  Вуж Варяшысь библиотекарь.

1282

Оставить сообщение:

НАШИ ПАРТНЕРЫ