icon_gotop
18+
autorisation
Войти | Регистрация
Время в Татышле
19:34
Вторник, 3 Августа
Рекламный баннер 990x90px top

Шутэтскон ӧвӧл со, мугорез кыдатон

2016-03-17

Фитнес-клуб

Ермекей ёросысь Купченеевоысь Римма Константинова 36 ар ӵоже гуртысьтызы нылпиосты дышетӥз, школаен кивалтӥз. Пенсие потэмез бере, Римма Раилевна сокем трос ваньмон дырызлы паймыны кутскиз. Нош дышетон аръёсаз нунал но уг тырмы вал кадь ужъёссэ быдэстыны. Табере дыр туж кема, пе, ортчылэ. Тужгес зол со шӧдӥське тол куазен. Озьы Выль арлэн нырысетӥ нуналъёсаз ик Римма Раилевна тазалыко улонлэн пумитаз вамыштыны малпам – фитнес-клуб усьтэм. Отчы котькуд мылкыд карись, пе, пыриськыны быгатэ. Нылкышноос, соос пӧлысь тросэз 50 ареслэсь бадӟым, арняяз кык пол школалэн спортзалаз пумиськыло.

Татын соос нырысь вамышъяса ветло, бызьыло. Собере гимнастика борды кутско, бодыосын, скакалкаен упражнениос лэсьтыло. Римма Раилевналэн верамезъя, соос котькинлы капчиен сётӥсько. Нылкышноос спортзалын одӥг час ӵоже ужало. «Тренировкаос бере мугормы пӧся, футболкаос котмо. Озьыен, отын ми трос кужым поттӥськом. Тренировкаос шулдыр но капчи ортчо. Та вакытэ чузъяськись крезьгур, ог-огенымы пумиськон-вераськон мылкыдмес ӝуто. Соин ми дорамы котьку шумпотыса бертӥськом», - вера Римма Раилевна. 

Купченеевоысь фитнес-клубе, кылсярысь, мылысь-кыдысь ветло Т. А. Нестерова, Н. В. Пургина, В. Ю. Никитина, Н. А. Иванова, Н. В. Амосова  но мукетъёс. Соос ваньзы огкылысь шуо: «Физкультура тазалыкмес юнматэ, мылкыдмес ӝутэ». Спортзалын нылкышноослэн телевизор учкемзылэн но пайдаез шӧдӥське. Татын соос пӧртэм передачаосысь учкем упражнениоссэс быдэсто.

Вераны кулэ, Купченеевоысь нылкышноос спортзалын ужанэн гинэ уг буйгатско. Соос котькуд нунал ӝытазе киосазы боды кутыса ульча кузязы вамышто. Нылкышноос (соос 25-лы матэ люкасько) 4-5 иськемез капчиен ортчо. Тазалыко улонэн эшъяськисьёслы со трос, пе, ӧвӧл.

Чылкыт омырын

мугор капчия

Кылем ар пумын Бальзюгаысь Роман Юсупов анайзэ куасэн нискыланы потыны ӧтем. Соослэсь вожмаськиллям мукетъёс но. «Куасэн ветлыку мон пограса зол вӧсь луи. Собере бодыосын гинэ ветлыны малпамы», - вера Бальзюгаысь Светлана Сабанчина. Туннэ соос 15 кузя ветло. Нуналаз гуртсэс кык пол котырто. «Куинь иськемлы матэ ветлӥськом», - верало бальзюгаос.  Соослэсь бере уг кылё бигинейёс но. Татысь нылкышноос нырысьсэ 10-тӥ толшорын бодыосын потӥллям. Соосты огинэ люкан сярысь Флюза Минькина  сюлмаське. «Чылкыт омырен шокаса мугормы капчия кадь. Бодыосын ветлон сямен куддыр дискотекае но пырыса потыны вутскиськом», - верало бигинейёс. Нош балтачъёс 15-тӥ южтолэзе аспӧртэм юбилейзэс пусйизы. Соослэн бодыосын ветлыны кутскемзылы сизьым арня луиз. Балтачъёслы бальзюгаослэн бодыосын ветлэмзы сярысь А. И. Сабанчин верам. Собере соос но тазалыксэс таӵе амалэн кыдатыны малпаллям. Туннэ нылкышноос пӧлысь котькудзы солэсь пайдазэ шӧдӥзы ни. Вераны кулэ, бальзюгаослы, бигинейёслы но балтачъёслы НКЦ-лэн спортъя секторезлэн ёзчиез А. И. Сабанчин бодыосын ветлон ласянь кенешъёсын юрттылӥз. Табере дышетон, тазалыкез утён удысын тыршисьёс, гурт хозяйствоын ужасьёс но пенсиын шутэтскисьёс шумпотыса огазьын шутэтско.

Сюресэз пытсало песяйёс

«Шудекысь ульчаосын котьку калык трос, - вера Шудек гурт поселенилэн администрациеныз кивалтӥсь Инзиля Галихановна Минликаева. – Соин руль сьӧрын пукисьёслы но отӥ ортчон куддыр секытэн сётӥське». Ӵукна татысь ульчаосын пичиос шудо, собере соос вӧзы ватсасько дышетскисьёс. Нош ӝытазе отын кузёясько «Оптимист» клубе ветлӥсь песяйёс. Соос киосазы куас бодыосты кутыса огъя куинь иськемлы матэ сюресэз ортчо. Нош солэсь азьвыл нылкышноос пӧлысь тросэз культура юртысьтызы библиотекаын тазалыксэс кыдато. Со сярысь сюлмаське кивалтӥсьсы Елизавета Нияматова.

Шудекын азьвылгес ик та выллем клуб кылдытыны малпанзы вань ни вылэм. Но солы пӧртэм мугъёсын быдэсмыны кылдымтэ. Нош кылем ар пумын гуртысь Рая Гараевалэн кичӧлтонэзлы интыысь аскивалтэт дурбасьтэм. Нырысь клубе куать адями ветлэм. Табере соос 20-лы матэ люкасько ни.

- Физкультурной клуб усьтэм бере нылкышноослэсь ӝутскем мылкыдзэс адӟыса, ми пиосмуртъёсты но таӵе амалэн шумпоттыны малпамы, - вера Инзиля Галихановна. – Озьы соос понна туннэ шашечно-шахматной клуб ужа.

Шудек гурт поселениын 40 ареслэсь бадӟым нылкышноослэн но нимысьтыз клубзы вань. Отын соос тазалыксэс юнматӥсь гимнастика лэсьтэмзы сяна, инкуазен сётэм чеберлыксэс утён но мукетыз сярысь верасько. Со ласянь гуртысь нылкышноослы юрттэ Янаулысь кунозы. Ильзида Илюсовна Загитова соос доры арняяз кык пол вуылэ – понедельник но четверг нуналъёсы.

Сю вамыш

Каймашабашын бодыосын ветлонэн туж тунсыкъяське Татьяна Зарифуллина. Песянай ӝытлы быдэ пулэсь «эшъёссэ» кутыса ульчае чылкыт омырен шоканы дыртэ. Зэм, каймашабашъёслы со ласянь удалтымтэ. Татын омырез газ зын сапта. Но кузь улон сюресэз ортчем песянаез соин гинэ уд кышкаты вылэм. Трос дыръя со сьӧры бускельёсыз Нюра Садриева, Фируза Минияхметова, Кабира Садырова но вамышто. Соослы ӵошен кузь сюрессы но вакчи потэ.

Ми вуылон нуналэ нылкышноос ваньзы Татьяна песянай доры люкаськемын вал. «Со ӵукналы быдэ корка пушказ 100 вамыш, пӧртэм упражнениос лэсьтэ, - верало нылкышноос юрт кузё сярысь. – Тол куазен уж трос ӧвӧл, соин милям но ветлэммы потэ». Татьяна Зарифуллина гужем куазен но физкультураен уг люкиськы. Со юрт котырысьтыз ужъёссэ егитъёс сямен бызьылыса, пе, ужа на.

Нылкышноос улон шоры задор мылкыдын учко. Озьы ке но соос сюлмаськонзэс но вератэк ӧз чидалэ. Каймашабашын, пе, ракен висисьёс трос. Маин со герӟаськемын, пырак тодмо ӧвӧл. Но валамон: секыт висён тазалыко улонэн эшъяськисьёсты но ӝог чиге.

Йылпумъян интые

Одноклассники сайтысь туспуктэмъёсты учкисько. Тани одӥгаз Балтач ёросысь асавкаос ӝытазе ульчаетӥзы вамышто, нош мукетаз – Калтасы ёросысь Бадӟым Качакысь вить нылкышноос куас вылэ султыса нюлэскы потӥллям. Вераны кулэ, Бадӟым Качакын толшор-тулыспал толэзьёсы культура юртын фитнес-клуб но ужам. Отчы 12 нылкышноос ветлӥллям. Но южтолэзьын со пӧртэм мугъёсын ужамысь дугдэм. Но озьы ке но кутскем ужзылэн азинсконэзлы осконо. Азьланяз, оло, пиналъёс но телевизоръёсынызы, компьютеръёсынызы но телефонъёсынызы люкиськыса песяйёссы сьӧры спортзалэ вамыштысалзы.

Ольга НИГАМАТУЛЛИНА.

1861

Оставить сообщение:

НАШИ ПАРТНЕРЫ