Калтасы ёросын, кылсярысь, «Победа» ООО, кытын тыршыса но азинлыко ужало Бадӟым Качак, Покчи Качак, Кургак, Качкин-Турай гуртъёсын улӥсьёс. Со сяна, Ленин нимо СХПК-ын, «Новый путь» СПК-ын ужасьёсты но пусъёно. Бурай ёросысь Мамады гуртын улӥсьёс «Дэмен» ООО-ын тыршо. Янаул ёросысь ӟеч возиськись хозяйствоос пӧлысь одӥгез – «Колхоз Восток» СПК. Озьы ик «Победа», «Агро М», «Агрофирма «Урада» хозяйствоос азинлыко ужало. Татышлы ёросын вылӥ лыдпусъёс возьматэменызы висъясько «Агро-Танып», «Дэмен», «Рассвет» СПК-ос.
Тулыспал толэзе хозяйствоосын арлы йылпумъянъёс лэсьтӥзы: отчётной собраниос радъяськизы. Ми Татышлы ёросысь удмурт хозяйствоослэн собраниосазы вуылӥмы. Вакчияк соослэн ужъёсынызы тодматскыны ӵектӥськом.
«Агро-Танып» СПК
2015-тӥ ар таныпъёс понна азинлыко луиз. Сабантуйын 2-тӥ степенё дипломлы кузё луизы (толалтэ пудоослы тырмыт саклык висъямын). Вуз поттонъя лыдпусъёсты басьтоно ке, Гурт удысын ужасьёслэн нуналазы таныпъёсты 3-тӥ степенё дипломен пусйизы.
Хозяйстволэн арлы йылпумъянъёс лэсьтон ужрадаз Татышлы ёрос администрациен кивалтӥсь Рушан Гараев но пыриськиз. Вераськоназ со хозяйстволэн коллективезлы вылӥ дунъет сётӥз, СПК-лэн азинскыны луонлыкъёсыз вань шуыса пусйиз.
Хозяйствоен кивалтӥсьлы Сергей Хановлы со РФ-ысь Гурт хозяйствоя министерстволэсь тау карон гожтэтсэ сётӥз.
Кылем арын гужем зоро ке но улӥз, хозяйствоысь нянь будэтӥсьёс 14639 ц ю тысь дасязы (2014-тӥ арен ӵошатыса 104%), ю тысьлэн удалтонлыкез гектарысьтыз 15,1 ц усиз. Калыклы но ю тысь тырмыт сётэмын, пудоослы фураж дасямын, кидыс ласянь но сюлмаськонэз ӧвӧл. Хозяйствоын огъя 21088 ц сенаж, 6820 ц турын, 49824 ц силос, 900 ц куро дасямын. Кивалтӥсьлэн верамезъя, турын ушъяськымон ӟеч возиськымтэ, соин туэ турын дасян амалъёслы бадӟым саклык висъяно луоз. 2015-тӥ арын таныпъёсын 13338 ц йӧл кыскемын (2014-тӥ арен ӵошатыса 107%), 12723 центнерез реализовать каремын. Сӥль 993 ц дасямын, солэн 911 центнерез вузамын.
- Та вылӥ лыдпусъёс ужасьёслэн тыршеменызы басьтэмын, - вераз кивалтӥсь.
«500 ферм» программа улсын тупатъян ужъёс быдэстэмын. Искусственной осеменениен ужан амалъёслы татын бадӟым саклык висъяське, выль ужан тӥрлыкъёс но басьтэмын ни. Ужъёс дыраз но ӟеч быдэстӥськемен, хозяйствоын финансово-экономической лыдпусъёс но учкымон. Кылем арын хозяйство вузъёсызлэсь 35 млн 469 сюрс табыш поттэм. Уждун тыронлы 8 млн 341 сюрс коньдон висъяськем. Туннэ нуналэ хозяйстволэн нокыӵе пунэмъёсыз ӧвӧл.
«Дэмен» СПК
Дэменъёс но кылем арын вормонъёс утӥзы. «Сабантуй-2015» ужрадын хозяйстволы 3-тӥ инты сётэмын, гырон-кизён ужъёссэс ӟеч но дыраз быдэстэмзы понна. Тысё но тысё-кӧжыё культураос будэтонын вылӥ лыдпусъёс басьтэмзы понна хозяйство РФ-ысь Гурт хозяйствоя министерстволэн азвесь медаленыз но дипломеныз дунъямын.
Хозяйствоен кивалтӥсьлэн Радис Зиннатуллинлэн кылъёсызъя, кылем арын дэменъёс 1569 га музъеме тысё культураос кизиллям, 1791 ц ю тысь октӥллям, солэн удалтонлыкез гектарысьтыз 11 ц ӵошам.
Хозяйствоын 8210 ц турын, 27840 ц сенаж, 72330 ц силос дасямын. Сӥзьыл 170 гектаре толйись культураос киземын. ГСМ ласянь секытлыкъёс кылдэмен, кын улэ гырон ужъёс ӝегатскиллям. Соин ик кивалтӥсь ужасьёс азе зол куронъёс пуктэ – тулыс ужъёс борды дыраз басьтӥськоно. Туннэ нуналэ хозяйство тулыс бусы ужъёслы техниказэ, ужан тӥрлыкъёссэ дасян сярысь сюлмаське.
Вераны кулэ, кивалтӥсьлэн воштӥсезлэн Рустам Галямшинлэн, менеджеръёслэн Алевтина Туктаровалэн, Жанна Зариповалэн, Вячеслав Камидуллинлэн кичӧлтэмзыя, пудо вордон ӧрын ӟеч лыдпусъёс возьматэмын. Та дыре хозяйствоын 1200-лэсь ятыр сюро пудо лыдъяське. Со сяна, ӟеч выжыысь кунянъёс басьтэмын. Кылем арын хозяйствоын 15497 ц йӧл кыскемын, 1267 ц сӥль дасямын. Кивалтӥсь зооветеринарной службалэсь ӟеч ужъёссэ но пусъе.
«Рассвет» СПК
Рассветъёс доры но отчётной собрание ёрос администрациен кивалтӥсь Рушан Гараев вуылӥз. Со хозяйствоен кивалтӥсез Альберт Минлебаевез, комбайнёрез Геннадий Гайнияровез но скал кыскисез Лира Сахиповаез ёрос администрацилэн данъян грамотаосыныз пусйиз. Ужасьёслы усто ужъёссы понна тау кылъёссэ вераз. Собрание лыктэмъёс Рушан Кадимовичлы сюлэмшугъяськытӥсь юанъёссэс сётъязы, валэктонъёс басьтӥзы.
Эскероме лыдпусъёсты. Кылем арын хозяйство вузъёсыныз огъя 50 млн 600 сюрс манет тыр табыш поттӥз. 8478 ц турын, 4408 ц куро, 43550 ц сенаж, 55820 ц силос, 9000 ц фураж дасямын. Хозяйствоын 1713 йыр пудо лыдъяське. 1702 ц сӥль дасямын, 19889 ц йӧл кыскемын.
Пудо вордон – коньдон пыртон ӧр. Соин ик хозяйствоын пудо вордонлы бадӟым саклык висъяське. Рассветъёс ӟеч выжыысь пудооссэс йылэтон сярысь сюлмаськыса ужало. А. Минлебаевлэн кылъёсызъя, ужъёс азинлыко радъясько Кызыл-Яр фермаын. Татын «500 ферм» программая азьвылгес тупатъян ужъёс быдэстӥськизы.
- Милям хозяйствоямы племенной завод кылдытыны луонлыкъёсмы вань. Ӵошен, кенешыса ужамы ке, 2020-тӥ арын малпанмы быдэсмоз, - вераз кивалтӥсь.
Кивалтӥсьлэн ужасьёсыз азе пуктэм куронъёсызъя тодмо луэ: азьпалан рассветъёслэн лыдпусъёссы эшшо но вылӥын луозы.
Миляуша НИГАМАТУЛЛИНА.
Оставить сообщение: