Пайдаё но шуныт пумиськон

Пумиськонэ асьсэлэн семьяосынызы, нылпиосынызы куамынлы матэ удмуртъёс вуизы. Съездэ пыриськемъёс малпанъёсынызы, Удмурт Республикаысь ваем кузьымъёсынызы люкиськизы. Съездын улосвылмес возьматӥзы Екатеринбургысь, Вылысь Пышмаысь, Сысертьысь но Первоуральскысь тямыс делегатъёс.

Удмурт классысь дышетӥсь Зинаида Кадрова съездэ нырысьсэ быръемын вал. Отын со аслэсьтыз малпанъёссэ шараяз, идеяоссэ вераз. Сыӵе ужрадэ пыриськисьёс пӧлын егитъёс тросгес мед луысалзы шуыса пусйиз. Ужрадлэн йылпумъянэз таӵе луиз: огазеяськонлы азинлыкогес ужано, выль адямиосын тодматсконо, егитъёсын ужанъя ӧрез паськытатоно.

Ужпумъёс сярысь вераськон Евгения Сергеевнаез ӟечкыланлы выжиз, малы ке шуоно солэн общественной но журналистикая ужъёсыз Удмуртиен юн герӟаськемын луо. Аслэсьтыз 70 аресъем юбилейзэ Евгения Сергеевна эшъёсыныз Вылысь Пышмаысь воскресной школаын пусйыны мылкыд кариз. Та нуналэ со сярысь трос шуныт кылъёс верамын вал, крезьгур кузьымъёс, сяська керттэтъёс но палэнэ ӧз кыле. «Эгес» удмурт огазеяськон почётной председательзэ – Евгения Вахрушеваез – кема аръёс ӵоже «Эгесэз» азинтэмез, удмурт кылэз но культураез утён сярысь сюлмаськемез понна Данъян грамотаен пусйиз. Школалэсь ӟечкыланзэ лыдӟиз школаен кивалтӥсьлэн воштӥсез Вера Мезенкова. Воскресной классэ ветлӥсьёс но «Чингыли» нылпи ансамбле пыриськисьёс (кивалтӥсьсы Ольга Данилова) юбилярлы «Лымы тӧдьы» кырӟанэз кузьмазы.

Нырысьсэ кылдэм «Дэмен» удмурт общественной огазеяськон сярысь но трос тодэ ваёнъёс луизы. Соин кивалтэ вал татышлы музъемын вордскыса будэм Фёдор Садыков. Евгения Сергеевна но со огазеяськонлэн ёзчиосыз пӧлын лыдъяськиз. Жаляса верано, «Дэмен» удмурт огазеяськонлэн кивалтӥсез шудтэм учырын бырыны шедемен, огазеяськонлэн ужез дугдӥз.

Дас арлэсь трос дыр ортчем бере, «Эгес» огазеяськон Свердловск улосвылын удмурт движениез улӟытӥз.Со сярысь тужгес сюлмаськизы Е. С. Вахрушева, М. Ш. Ягуткина, И. Ш. Веретенникова.

Евгения Вахрушева Удмурт Республикаысь ЯкшурБодья ёросысь Кыква гуртын вордӥськем. Солэн творческой ужез школаысен ик кутскем. 1975-тӥ арын со Россиысь журналистъёслэн союзазы пыриськем. 1981-тӥ арын Свердловскысь вылӥ партийной школаысь журналистикая факультетэз йылпумъяса Удмурт Республикаын потӥсь «Швейник» газетлэн редакторез луэ (1981-1990-тӥ аръёс).1990-1993-тӥ аръёсын Ижевскын радист луыса ужа, «Удмурт дунне» газетын тырше, УдГУ-ын удмурт кылъя но литературая факультетын  дышетэ.

1993-тӥ арысен 2000-тӥ арозь Урал регионысь «Ключ земли» газетлэн валтӥсь редакторез луэ. Евгения Сергеевналэн Свердловск улосвыллы сӥзем кык книгаосыз потэмын: «Экология Екатеринбурга» но «Зелёная жемчужина Среднего Урала». Солэн очеркъёсыз «Твои лесничие, Россия» (г. Москва) сборнике пыртэмын. «Благославляю вас, леса» литературая быдэсросси конкурслэн лауреатэз Рослесхозлэн Данъян грамотаеныз пусъемын. Инкуазен, сое утёнэн герӟаськем ужпумъёсты ӝутэмез понна, Екатеринбурглэн тӧроезлэн Тау карон гожтэтъёсыз солы сётэмын. 

 Быръем уженыз сяна, Евгения Сергеевна общественной ужъёсын азинлыко выре. 2005-тӥ арын солэн кичӧлтэмезъя Екатеринбургын нырысьсэ бадӟым  финн-угор фестиваль радъяськиз. Татын ик удмурт школа кылдытон сярысь малпан «вордӥськиз». Вылысь Пышмаысь «Ваёбыж» воскресной класс но Евгения Сергеевналэн тыршеменыз кылдэмын.

2007-тӥ арын Е. Вахрушева Ижевскысь вань удмуртъёслэн «Удмурт Кенеш» ассоциацизылэн ёзчиез луиз. Евгения Сергеевна ик 2007-тӥ арын Брангуртысь песянайёсын пумиськон но радъяз. Куноос «Ваёбыж» классэн но тодматскизы. 2008-тӥ арын почётной председательмы «Дни культуры удмуртов Свердловской области» улосвыл фестивале пыриськиз. Ужан аръёсаз со уно данъян грамотаосын, тау карон гожтэтъёсын пусъемын. Туж трос соос - ваньзэ лыдъяса но уд быдты.

Евгения Вахрушева – сизьым книгаослэн авторзы. Алигес урал музъемысь лесоводъёс сярысь книгаез потӥз. Кематэк дышетӥсьёслэн династизылы сӥзем книгаез «вордӥськоз». Арлыдыз шоры учкытэк, Евгения Сергеевна журналист ужзэ азинтэ, общественной ужъёсы но азинлыко пыриське.

Марина ЯГУТКИНА, «Эгес» удмурт огазеяськонэн кивалтӥсь.