- Бадӟым ужлэн нырысетӥ пичи вамышэз лэсьтэмын. Оскисько, та уж арысь аре паськыталоз, пумиськонэ лыктыны мылкыд карись геройёсмылэн лыдзы будоз, - вераз Ирина Муллаяновна.
Ужрад афган оже быремъёсты буре вайыса, обелиск вӧзы венок понон бордысен кутскиз. Пумиськон ӝытэ Балтач ёросысь Асавка гуртысь Арсений Гиматов, та гуртын ик вордскыса будэм но али дыре Пермь шаерысь Чернушкаын улӥсь Лев Зиянгиров, Татышлы ёросысь Улысь Балтачысь Борис Зиядуллин, Выль Татышлыысь Роберт Шарафутдинов, Майскысь Томас Марданов, Петропавловкаысь Валерий Арсланов, Янаулысь Дарвин Нурисламов но Янаул ёросысь Шудекысь Александр Васиуллин пыриськизы.
Кызьы тодмо, афган ожез пиос сяна, егит нылъёс но веръязы: эмчиос, медсестраос, связисткаос. Соос но ужзэс быгатыса, кышкатэк лэсьтӥзы, шаермылэсь данзэ усто утизы. Афганистан соослэн но сюлэмъёсазы ноку бурмисьтэм гожъёс кельтӥз. Ужрадэ вуэм воргоронъёс пӧлын луиз Вылысь Татышлыысь Роза Фатниева но.
Та ӝытэ воинъёслы-интернационалистъёслы тау кылъёссэс веразы но соосты шаермес утисьёслэн нуналэнызы ӟечкылазы «Боевое братство» огазеяськонэн кивалтӥсь Заки Габсаликов, Россиысь ДОСААФ-лэн Татышлы ёросысь ёзэтэныз кивалтӥсь Марс Самигулов, БР-ысь удмуртъёслэн НКЦ-енызы кивалтӥсь Салимьян Гарифуллин, Выль Татышлы гурт поселенилэн администрациеныз кивалтӥсь Николай Рахимьянов ноТатышлы ёросысь «Дэмен» СПК-ен кивалтӥсь Радис Зиннатуллин.
Ож. Кышкыт кыл. Дас ар ӵоже со кыстӥськиз Афганистанын. Кин ке отысь зэмос улонлы дышетскыса бертӥз, кин ке нош – цинк гробын. Оже пыриськемъёс матысьёссылэсь сюлэмъёссэс шуныт гожтэтъёсынызы шунтылӥзы, буйгатъязы. Соос ноку ӟечезлы осконзэс ӧз ыштэ. Выль Татышлы школаын дышетскись нылъёс солдат гожтэтъёсты лыдӟизы. Соос бордын – шунытлык, улонэз гажан но яратон.
Та пумиськонлэн геройёсыз кыӵе малпанъёсын уло меда?
Выль Татышлы школаысь 10-11-тӥ классъёсын дышетскись пиналъёс ужрадэ вуэмъёслы дасям юанъёссэс сётъязы. Кылсярысь, Дарвин Нурисламовлэсь юазы: «Ортчем аръёсы берытскыны, улон сюрес бырйыны луонлыкты луысал ке, Тӥ ортчем ож сюрестэс выльысь ортчысалды-а?» Дарвин Янтемирович малпаськытэк, нокыӵе кариськытэк шуиз: «Ортчысал». Томас Мардановез армия улонысьтыз тужгес тодаз кылем учыр сярысь мадьыны куризы.
- Вань вал мынам Курган улосвылысь матысь эше. Ми соин котьку ӵош луимы. Огпол ми танклэн башенной ключез понна керетон поттӥмы. Эшме задание ыстӥзы но, со отын бырыны шедиз. Та учыр сярысь туж жалясько, одӥг бадӟым малпанэн улӥсько: эшелэн шайгуаз вуылэме потэ, - вераз Томас Шаймарданович.
- Кыӵе сямъёсты ожын кышкытлыкъёсты вормыны юрттӥзы?- юазы Роза Фатниевалэсь.
- Мон номырлэсь уг кышкаськы! Сыӵе сямы ик юрттӥз, лэся, - вераз Роза Салимьяновна.
Та ӝытэ удмурт геройёс понна кылбуръёс, кырӟанъёс чузъяськизы. Ужрадэз дасяны юрттэт возьматӥзы Выль Татышлыысь культура юртын, школаын, библиотекаын ужасьёс, школаын дышетскисьёс. Коньдонэн юрттӥзы «Дэмен» СПК но ДОСААФ-лэн интыысь ёзэтэз.
Миляуша БУЛАТОВА.
Оставить сообщение: