icon_gotop
18+
autorisation
Войти | Регистрация
Время в Татышле
11:01
Четверг, 29 Июля
Рекламный баннер 990x90px top

Анай кыл но удмурт квест

2016-02-25

Ужрад куинь люкетлэсь сылӥз. Нырысь ик вань люкаськемъёсын «Мон тодӥсько, мынам кылы ноку уз быр» темая конференция ортчиз. Сое усьтӥз Каймашабаш школаысь дышетӥсь З. С. Ибраева. Со вакчияк та нуналлэн историеныз  но ортчоно ужрадлэн планэныз тодматӥз. Люкаськемъёс азьын тунсыко вераськиз  Ю.С. Саитов – Янаул ёросысь удмурт огазеяськонлэн тӧроез. Со пусйиз: «Ас кылыдлэсь палэнскон, сое ултӥян ноку нокинэ ӟече ӧз вутты. Ас кылзэ тодӥсь но гажась мурт гинэ улонын ас интызэ шедьтоз, котькыӵе  калыкен кусып возьыны быгатоз». Озьы ик Ю.С. Саитов  Ижевскын ортчем бадӟым Кенешлэн ужъёсыныз, отын ӝутэм ужпумъёсын тодматӥз,  туспуктэмъёссэ возьматӥз.

Собере Истяк школаысь егит дышетӥсь А. А. Гизитдинова кыл куриз.  Алёна Александровна туала школаын дышетон ужпумъёсты ӝутӥз: 2-3-тӥ классэн ӵош ортчытэм урокъёслэн ӟечлыксы ыше-быре. Пиналъёслэн тунсыкъяськонзы синэ, мултэс урок  шоры кадь учко. А. А. Гизитдиновалэсь сюлмаськонзэ туннэ котькудӥз дышетӥсь вала, ас вылаз шӧдэ. Соин ик та выллем ужпумъёсты ӵемгес ӝутылыны кулэ шуыса огъя малпанэ вуизы дышетӥсьёс.

Алигес Ижевскын ортчем удмурт кылъя но литературая олимпиадалэн ужрадъёсыныз тодматӥз Вуж Варяш шор ёзо школаысь дышетӥсь С. Г. Ахметгараева. «Олимпиадае пиналъёсты дасяно быдэс ар, малы ке шуоно туала куронъёс ваньмыз выль стандарт вылэ пыкиськыса лэсьтэмын. Школаын урокъёс бере кыльыса гинэ дасямлэн пайдаез уз луы, пиналэз заданиосын дистанционно дасяны умойгес  луоз, - валэктӥз со. - Ӟеч тодыны кулэ туала литератураез, удмурт терминъёсты».

Библиотекарьёслэн нимынызы вераськиз Янаул ёрослэн центральной модельной библиотекаысьтыз удмурт секторен кивалтӥсь В. Р. Файзуллина. Со удмурт  сайтъёсын тодматӥз, отысь созэ яке тазэ литератураез, писатель сярысь кулэ материалъёсты, критической статьяосты шедьтыны валэктӥз. Озьы ик виртуальной музейёсты уже кутыны луонлыкез возьматӥз.

Пайдаё вераськонъёс бере, ялэмын вал «Усто лыдӟись» конкурс. Лыктэм пиналъёс котькудӥз презентациен, крезьгурен дасям  А. Окилэсь, В. Сергеевлэсь,Ф. Васильевлэсь но мукетъёслэсь кылбуръёссэс лыдӟизы. Конкурс вискын кузё пиналъёслэн дасямзыя кырӟанъёс чузъяськизы, эктонъёс жингыртӥзы.

Вань та ужрадэз йылпумъяз «Удмурт квест» шудон. Сое дасяз О. Р. Давлетова. Егитъёс пӧлы вӧлмем туала шудон пиналъёслы паймымон кельшиз. Дышетскисьёс группаослы люкиськыса пӧртэм станциосы дугдыло но отын дасям ужъёсты быдэсто. Шонер быдэстэм ужзылы жетон басьто. Ужазы таӵе станциос: «Удмурт эктон», «Удмурт крезьгур», «Музей», «Лодӥга», «Литература», «Анай кыл». Пиналъёслы йӧспӧртэм потӥз лодӥгаен шудон. Та вашкала шудонэн тодматӥз но шудыны дышетӥз гуртысь кышномурт Галя апай Давлетова. Бӧрысь, пиналъёсты шудыны дышетскыны курыса, лодӥгаоссэ школа музейлы кузьмаз.

Усто лыдӟисьёсты но квестын вормисьёсты грамотаос но кузьымъёс возьмазы. Шумпотымон кузьымъёс вуттӥз Ю. С. Саитов. Малпасько, пиналъёслы та нунал кемалы вунонтэм кылиз. Анай кылзэз утён, сое дышетон мылкыдъёссы уката пуромизы. «Выльысь пумиськытозь!» - шуизы пиналъёс огзылы огзы школа азбаретӥ потыкузы.

              Земфира Ибраева.

1821

Оставить сообщение:

НАШИ ПАРТНЕРЫ