Пӧртэм калыкъёсты огазея чебер инкуазьмы

Конкурсэ Башкортостанысь 1-11-классъёсын дышетскись пиналъёс пыриськизы. Сое радъясьёслэн верамзыя, котькуд суред аспӧртэм лэсьтэмын, бордаз кыскись кужмыз шӧдӥське. Пиналъёс ужъёсазы калыкъёсмылэсь эшлыко кусыпъёссэс, инкуазь узырлыкмес, сям-йылолъёсты быгатыса возьматӥллям. Соос пӧлысь куд-огеныз устоосыныз суредъёсын БР-ысь Калыкъёслэн эшъяськон юртэнызы дасям календарья тодматскыны луэ. Отчы, кылсярысь, Татышлы ёросысь Выль Татышлы школаын дышетскись Мария Гийбатовалэн «Купание невесты» но М. Гарипов нимо Бигиней школаысь Дарья Туктамышевалэн «Традиции моего народа в гармонии с природой» ужъёссы пыртэмын. Конкурсын 1-4-тӥ классъёсын дышетскисьёс пӧлын кыкетӥ инты сётэмын Вылысь Татышлыысь нырысетӥ номеро школаын кыкетӥ классын дышетскись Аделина Зидымаковалы. Озьы ик «За активное участие» дипломен пусъемын Татышлы ёросысь Выль Татышлы школаын дышетскись Алёна Самигуловалэн, М. Гарипов нимо Бигиней школаысь Нелли Камидуллиналэн,  Вылысь Татышлыысь нырысетӥ номеро школаысь Дарья Рахимовалэн, Уразгильды школаысь Софья но Дарья Садриеваослэн  ужъёссы.

19-тӥ тулыспалэ нылъёс Х. Ахметов нимо башкир кун филармонилэн покчи залаз вуылӥзы. Татын Анай кыллэн нуналызлы сӥзем ужрадъёс улсын конкурсын вормисьёсты данъян ӝыт ортчиз. 

        Ифира Гильфанова,

      БР-ысь удмуртъёслэн историяя но культурая центрысьтызы методист.