icon_gotop
18+
autorisation
Войти | Регистрация
Время в Татышле
10:52
Четверг, 29 Июля
Рекламный баннер 990x90px top

Валтӥсь ужмы – кылмес но калыкмылэсь выжызэ утён

2016-02-18

Ижкарын 12-13-тӥ тулыспалэ вань удмуртъёслэн «Удмурт кенеш» огазеяськонзылэн ХIII  бадӟым ӧтчамез ортчиз. Та форуме Башкортостан Республикаысь 15 делегат пыриськиз. Кызьы тодӥськомы, пӧртэм улосвылъёсын азьлогес ортчизы отчётно-выборной конференциос (съездъёс),  кудъёсаз быръемын вал ӧтчанэ делегатъёс. Кык нунал ӵоже пленарной но секционной заседаниосы пыриськыса, удмуртлык понна висисьёс трос лэчыт юанъёсты эскеризы, тодматскизы, кенешизы, валче ужан сярысь мылкыдзэс веразы, выль кивалтӥсь бырйизы. Ӧз вунэтэ кырӟаны-эктыны-шулдыръяськыны но.

2012-тӥ арысен та нуналозь «Удмурт кенешен» кивалтӥз Игорь Николаевич Семёнов. «Быдэс дуннеысь но Россиысь финн-угор калыкъёсты сюлмаськыто анай кылэз дышетон, сямъёсты-йылолъёсты утён, егитъёслы ӟечсэ пыӵатон, кивоштӥсьёсты будэтон но трос мукет ужпумъёс. Котькуд съездын, Пичи кенешын, исполкомын, конференциын асьмеос выльысь но выльысь ӝутӥськомы тужгес ӟырдыт ужпумъёсты.

«Удмурт Кенешлэн» исполкомез тыршиз котькыӵе удысэз синйылтыса но чакласа возьыны», - таӵе кылъёсын мытӥз Игорь Николаевич аслэсьтыз отчётной докладзэ. Йылпумъянъёс лэсьтыса, кивалтӥсь валэктыны тыршиз, кыӵе ужрадъёс пӧрмизы кадь, малы куд-ог ужъёс йылаз-пумаз вуттэмын ӧз луэ. 

«Удмурт Кенеш» огазеяськон бадӟым ӧтчамаз Кузебай Герд нимо премиез сётӥз. Туэ сое басьтӥзы протодьякон, профессор, кылосбур тодосъя доктор Михаил Атаманов, кырӟанъя но эктонъя «Айкай» калык театрысь артист Геннадий Кузнецов, «Удмурт Кенешлэн» Ижысь Первомай ёросысь ёзэзлэн кивалтӥсез Ольга Шилова, Кузебай Герд нимо гимназиез усьтон понна сюлмаськись.

Съездлэн кыкетӥ нуналаз докладэн (соин газетмылэн вуоно номераз тодматомы) вераськиз БР-ысь удмуртъёслэн историяя но культурая центренызы азьвыл кивалтӥсь Татьяна Николаевна Шайбакова. Диаспораосысь удмуртъёс озьы ик асьсэлэсь ужпумъёссэс ӝутӥзы пӧртэм секциосын. Соос таӵеесь вал: «Этнополитика но право», «Культура», «Кыл но дышетон удыс», «СМИ но информационной технологиос», «Семья но тазалыкез утён», «Удмурт егитъёс». 

Та нуналэ ик «Удмурт Кенеш» огазеяськонлы президент но бырйизы. Табере соин кивалтоз Татьяна Ишматова. Татчыозь со ассоциациын вице-президентлэсь ужзэ быдэсъяз.

Оглом вылӥ ӧтчамлэн ужез сярысь ке верано, удмуртъёслэн, котьку сямен, лэчыт юанъёссы – удмурт кылэз дышетон, вераськон, кылэз быронлэсь утён, сям-йылолъёсты возён, диаспораослы удмурт телевидениез но радиоез учкыны-кылзыны луонлык кылдытон. Быдэстӥськозы-а соос, уз-а, соиз ини мукет ужпум. Башкортостанысь удмуртъёс сярысь ке верано, соослэн кылзы утиське на, сое дышетон радъямын, сям-йылолъёсты возиськом, ог дас ар нокыӵе шуг-секыт уз кылды, дыр, та юанъёсын.

Кыкетӥзэ таӵе ӧтчаме пыриськыса, вераме потэ: кыӵе узыр асьмелэн удмурт кылмы, кыӵе умой, пӧртэм улосвылъёсысь калыкъёсын асьме кылын вераськыны быгатӥськом! Сое утён, калыкмылэсь выжызэ вуоно поколенилы кельтыны сюлмаськон – асьмелэн валтӥсь ужмы.

Анна БАЙДУЛЛИНА,

аслаз мылкыд каремезъя ӧтчаме пыриськись.

1541

Оставить сообщение:

НАШИ ПАРТНЕРЫ