Ужрад Быдӟым Атыкай ожын но мукет боевой действиосын бырыны шедемъёслэн Мемориалазы венок понон бордысен кутскиз. Соосты буре вайыса ыбылэм куара котыре шуккиськиз.
Ужрадлэн торжественной люкетэз ёросысь Нылпи творчествоя центрын ортчиз. Афган оже пыриськемъёсты ёрос Кенешлэн секретарез Радик Рахимов ӟечкылаз. Озьы ик со БР-ысь Кун Собранилэн депутатъёсызлэсь Шамиль Шариповлэсь но Фанис Таеповлэсь ӟечкыланъёссэс лыдӟиз, воинъёслы-интернационалистъёслы Тау карон гожтэтъёс но кузьымъёс сётӥз.
Башкортостанысь военной комиссариатлэн Татышлы но Балтач ёросъёсъя ёзэтэныз кивалтӥсьлэн Ансар Арслановлэн пусъемезъя, афган оже пыриськемъёс – со патриотизмез, зэмлыкез но данэз возьматон. «Боевое братство» огазеяськонэн кивалтӥсь Заки Габсаликов ужрадэ люкаськемъёсты огазеяськонлэн ужъёсыныз тодматӥз, пӧртэм ласянь юрттэт возьматэмзы понна, ёрос администрацилы, культурая управленилы, «Боевое братстволэн» ёзчиосызлы тау кылъёссэ вераз.
Кырӟанъёс но эктонъёс, кинохроникаосысь люкетъёс вордскем шаерен данъяськон мылкыд кылдытӥзы, ужрадлы аспӧртэм шӧм ватсазы.
Бӧрысь военно-спортивной праздник «Планета Спорт» ФОК-ын азинскиз. Афган оже пыриськемъёс бильярдын, дартсын, ыбылӥськонын, армрестлингын, автоматэз сэрттонын но люканын устолыксэс возьматӥзы. Командаос пӧлын ӟырдыт нюръяськон пуромиз. Вормисе потӥзы татышлыос, кыкетӥ интыын – аскынъёс, куинетӥ – мишкиноос. Караидель но Балтач ёросъёсысь командаос ньылетӥ но витетӥ интыосын луизы.
Ужрадын ӵем кылыны луиз таӵе кылъёсты: «Та ож сярысь пӧртэм веранъёсты, малпанъёсты кылыны луэ. Но огез воштонтэм луэ – советской солдатъёс асьсэлэсь ужзэс быгатыса быдэстӥзы. Ноку медаз луы ни сыӵе ож, анайёс пиоссы понна медаз кисьтэ ни синвуоссэс».
Эльмира ГАРЕЙШИНА.
Оставить сообщение: