Татышлы ёросысь удмурт кышномуртъёс Выль Татышлые интыяськем историяя но культурая центре лыктӥзы. Та нуналэ Арибаш, Калмияр, Вязовка, Улысь Балтач, Выль Татышлы, Майск, Кызылъяр, Бальзюга, Уразгильды гуртъёсысь кышномуртъёсын пумиськон тунсыко но пайдаё ортчиз. Кышномуртъёслы вазиськыса БР-ысь национально-культурной центрлэн кивалтӥсез С. Г. Гарифуллин шуиз: «Кышномуртъёстэк улонэз син азе пуктыны уг луы. Тӥ луыку улон чеберске, узырме, тунсыко луэ. Удмурт кышномуртъёсмы пӧлын трос данъяськымон нимъёс. Сцена вылын но тӥ яркыт кизилиос выллем пиштӥськоды. Кылбураськоды но эктӥськоды, пӧртэм удысъёсын быгатэмдэс возьматӥськоды. Оскисько, азьланяз но кышномуртъёс ӟеч ужаны, усто кырӟаны, эктыны быгатэменызы паймытозы. Семьяяды но уж дурады учкымон луыса, шумпотыса но пальпотыса улыны сӥзисько.
Удмурт нылкышноосты огазеясь кужым кулэ, малпасько, историяя но культурая центрлэн выль малпанъёсыз улонэ но ужамы умой пыӵаны быгатозы. Камсьӧрын улӥсь нылкышноослэн нырысетӥ огазеяськон клубзылы ӟеч ужаны мылкыд карисько, выль азинсконъёссылы оскемме верасько».
Ужрадлэн программаяз пыриськыса гуртсылэн улонэныз тодматӥзы, гуртазы улӥсь кышномуртъёслэн общественной улонэ пыриськемзы сярысь веразы, сюлэмшугъяськонъёсынызы но пӧртэм ӵектонъёсынызы люкиськизы Татьяна Шайбакова (Выль Татышлы), Нина Зиннатуллина (Уразгильды), Наиля Арсланова (Калмияр), Ирина Шайхлисламова (Улысь Балтач), Лидия Зарипова (Кызыл-Яр), Татьяна Марданова (Майск), Светлана Сабанчина (Бальзюга), Маргарита Гараева (Вязовка), Лилия Гараева (Арибаш). Лулысь-сюлмысь вераськонъёсты шулдыр удмурт гуръёс воштӥзы. Шулдыр кырӟанъёсынызы шумпоттыса ужрадэз пуштросо каризы Мадина Нуртдинова, Зульфира Хатипова(Уразгильды), Закир Адуллин (Улысь Балтач), Надежда Гильманшина (Калмияр), Светлана Сабанчина, Ольга Ахметшина (Бальзюга), Фирая Туктамышева (Вязовка), Лидия Зарипова, Елизавета Шайсламова, Раида Гильмиярова (Кызыл-Яр), «Шулдыр ӝыт» ансамбль (Выль Татышлы). Асьсэлэн гожтэм кылбур чуръёсынызы шумпоттӥзы Лилия Гараева, Лена Исламова (Уразгильды), Маргарита Гараева, Нина Зиннатуллина. Уразгильды гуртысь Лариса Зайнокова аслаз киосыныз лэсьтэм тунсыко ужъёсын адӟытон дасяз.
Ужрадэз йылпумъяса нылкышноослэсь клубзылэсь кенешсэ бырйимы. Кенеше пыриськыса асьсэ гуртъёсазы кылдытэм клублэн кивалтӥсьёссы луозы Лилия Гараева, Ирина Шайхлисламова, Индира Шайсламова (Калмияр), Светлана Сабанчина, Лидия Зарипова, Альфия Медведева (Майск), Маргарита Гараева, Зифина Фархутдинова (Выль Татышлы), Зульфира Хатипова. Азьланяз удмурт кышномуртъёслэсь клубзылэсь ужзэ паськытатон но мукет ёросъёсысь удмурт кышномуртъёсын кусыпъёсмес тупатыса ужмес ӧръян сярысь малпан вань.
Ирина Самигулова,
БР-ысь историяя но культурая центрен кивалтӥсь.
Оставить сообщение: