Эстрадая крезьгур – роклэн вуоноез

Ужрадэ вуэмъёсты пӧртэм номинациосъя профессиональной жюри дунъяз. Кылсярысь, «Эстрадная музыка» номинация: Урал Идельбаев – композитор, М. Гафури нимо башкир академической драмтеатрлэн музыкальной люкетэныз кивалтӥсь, Максим Шкель – «Нечто» рок-группалэн кивалтӥсез, вокалистэз но гитаристэз, Павел Сагитов – «Год Змеи» российской рок-группалэн бас-гитаристэз.

Башкортостанлэн уйпал ёросаз интыяськем пичи гуртысь 13-17 аресъем нылпиос 18 кужмо коллективъёс пӧлын ӧз «ыше», асьсэлэсь быгатонлыкъёссэс усто возьматӥзы. Жюри кордонъёслы вылӥ дунъет сётӥз: «Эстрадная музыка – будущее Рока» номинациысь дипломен пусйиз. Фестивальын пиналъёс «Быть счастливым» но «Мир, проснись!» асьсэлэсь малпам кырӟанзэс быдэстӥзы. Сыӵеос ужрадын трос ӧй вал. Милям выступленимылы дунъет сётыны луоз вконтакте сайтын, «Группа *KordoN*» сообществоын.

Кылем ар пиналъёс понна вунонтэм луиз. Соос туж трос ужазы, олокӧня республика конкурсъёсы пыриськыса, вормонъёс утӥзы: Стерлитамакын ортчем творческой проектъёсъя «Арт-Старт-2015» республика конкурсысь лауреатлэн нырысетӥ степенё дипломеныз бертӥзы, «Йэйгор-2015» республика конкурсын «Сценический драйв» номинациын вормисе потӥзы, со сяна, группа Пермь шаерысь Оса городын радъяськем «Свежий ветер» джазъя фестивале пыриськиз.

Спортсменъёслэн кылынызы верано ке, пиналъёслэн амбициоссы трос, нош амуницизы ӧжыт – ӟеч, фирменной крезьгур инструментъёс уг тырмо. Соин сэрен, быгатонлыкъёсмы но кулэсмо. Вераны кулэ, берло аръёсы группа выль тубатэ ӝутскиз, соосты ог-огзылэсь люкыны уг луы ни. Фестивальёс, пӧртэм конкурсъёс соосты огазеяло угось. Соос ог-огзэс пал кылтэк, синмазы учкыса валало ни.

Дышетэм пиналъёсылы азьпалан выль вормонъёс, выль кырӟанъёс сӥземе потэ. Крезьгурез котьку мед яратозы, азьпалан фестивальёссы трос мед луозы на, творческой улонзы котьку мед пӧзьыса улоз.

      Вакиль ШАРИФЬЯНОВ,

    рок-группаен кивалтӥсь.