icon_gotop
18+
autorisation
Войти | Регистрация
Время в Татышле
06:24
Понедельник, 26 Июля
Рекламный баннер 990x90px top

«Мукет уж быръён сярысь малпанэ ноку ӧй вал»

2016-01-14

Калтасы ёросысь Кургак гуртысь Надежда Минтимировалэн улон сюресэз капчи вылэм уд шуы. Но со номырлы ӝожтӥськытэк ялан азьлань мынэ, вазь ӵукна но ӝыт фермае скал кыскыны дыртэ. Сӥзьыл солы «Башкортостанысь гурт удысысь сӥё-дано ужась» ним сётӥзы.

Надежда Меншариповна Бадӟым Качакысь колхозникъёслэн семьяязы вордӥськем. Анаез но, атаез но фермаын ужаллям. Семьяязы трос нылпи будӥллям. Куать пиналъёс пичиысен ужаны дышыса будӥллям. Трос дыръя юртъер котырысь ужъёс соос вылын луэм. Надя апай пичиысен анаез сьӧры фермае юрттӥськыны ветлэм.

- Мон куинетӥ класс бере аслым фермае сюрес усьтӥ: пичи ведра кутыса анай сьӧры мынӥ. Нырысетӥ нуналысен ик мыным отын ваньмыз кельшиз. Соку ик йырам скал кыскись луон сярысь малпан кылдэм, лэся. 1980-тӥ арын, школаез йылпумъяса, Бадӟым Качак фермае скал кыскыны потӥ. Ужаны кутскыкум 26 скал вал. Вань ужез киын быдэсъямы, - тодаз вае Надежда Меншариповна.

1984-тӥ арын Надежда Меншариповна улон сюрессэ Юрий Шадияровичен герӟам. Юра агай но соку фермаын ужа вылэм. Уж дуразы пумиськыса, егитъёс ог-огзылы синмаськиллям, соослэн сюлэмъёсазы яратон тылгизьы ӝуатскем. Шудо кузпалъёс кык пи будэтӥзы. Бадӟым пизылэн семьяез вань ни.

- Ми – шудо песяй-песятайёс ини. Пиосмылэсь будэмзэс шӧдытэк но кылим кадь, - пальпотэ Надя апай.

Фермае ужаны кутскем дырысеныз Надя апай конкуръёсы пыриськылэм. Нырысетӥ вормонзэ со 1987-тӥ арын Бадӟым Качакын радъяськем ёрос конкурсын утэм.

- Соку мыным борддоре понон бадӟым час кузьмазы. Шумпотонлэн пумыз ик ӧй вал. Со часэ али но вань на, - шуэ скал кыскись.

Республика конкурсэ но со трос пол вуылэм ни. Кылем арын но Надя апайлы ужрадын удалтэм: отысь со кыкетӥ степенё дипломен берытскем. Татышлы ёросын радъяськем конкурсын 68 скал кыскисьёс кужымзэс мерталлям.

- Ваньмыз витьымтэ шорысь луиз: конкурсэ мынон но, кыкетӥ интые потон но. Билетъёсъя дасяськыны но дыр ӧй вал, конкурс сярысь ӝыт веразы но ӵукна мыныны потӥмы. Куамын вить ар ӵоже люкам опытэлэн емышез луиз, дыр, со, - малпанъёссэ шарая Надя апай.

Надежда Минтимировалэн усто, дано ужась луэмез сярысь солэн грамотаосыз, тау карон гожтэтъёсыз но верало. Кӧня пӧртэм соос!

- Кема аръёс ӵоже ми Юралэн анаеныз ӵош улӥм. Со нылпиосты утялтыны, юртъер котырысь ужъёсты быдэсъяны юрттӥське вал. Анай ке ӧй луысал, мон дано ужась нимлы кузё ӧй луысал, дыр. Азьло, али кадь, нуныен дорын кема уг пуко вал ук. Бадӟым пиелы, Артурлы, одӥг арес вал, мон ужаны потӥ. Соин анай пукиз. Нош Артёмез со дас толэзьысеныз утиз, - ужезлы вылӥ дунъет сётӥсь кагазъёсты учкыса-эскерыса вера Надя апай. – Азьло дежурство но вань вал. Ужаны ӝыт мыныса ӵукна гинэ бертӥськом вал. Нуныдэ утисед ӧй ке луысал, озьы ужалод-а? Вылӥ лыдпусъёс возьматод шат?

- Азьло ужам аръёстэс туала уженыды ӵошатоно ке, мар верасалды?

- Азьло фермае пыдын, велосипедэн ветлылӥмы. Али машинаен нуо но ваё. Вакытаз кунянъёсты но асьмеос ик утимы. Туннэ нуналэ секытлыкъёс уг пумисько шуыны уг луы. Молокопроводмы ӧвӧл, йӧл азьло кадь ик ведраен поттаськом, сиён но киен тыриськом. Шумпотымон, уждун дыраз басьтӥськом. Азьло кадь коньдонлы ёрмыса ум улӥське. Уждун тыриллям бере, ужаны но шумпотыса мынӥськом, ӟеч ужъёс возьматыны тыршиськом, - шуэ Надя апай.

Юрий Шадияровичлэн но уж сюресэз гурт удысэн герӟаськемын вылэм. Фермаын скотник луыса ужан сяна, со комбайнёрын но тыршем. Хозяйствоязы уждун тырон ласянь шуг-секытъёс кылдэмен, со вахта амалэн ужаса ветлэм. Али дыре со дораз.

Гурт улос арлэн котькыӵе вакытаз тыршемез кулэ каре. Минтимировъёслэн хозяйствозы но бадӟым. Гид тыр пудо вордо, сад, бакча утялто. Ӵукна вить часын дорысьтыз потыса ужаны мынэм кышномуртлы юртъер котырысьтыз ужъёсты быдэстон секытэн сётӥськысал. Надя апайлэн кылъёсызъя, али хозяйствозы быдэсак Юра агай вылын, пе.

Минтимиров кузпалъёс, бадӟым улон сюресэ нырысетӥ вамыш лэсьтыкузы, гурт удысэз бырйиллям. Секыт уж кышкатымтэ соосты.

- Мукет уж быръён сярысь малпанэ ноку ӧй вал, - вера Надя апай. - Котькуд уж ас понназ тунсыко, дыр. Котькуд ужын но секытлыкъёс пумисько, луоз. Тыршыса ужад ке, котькыӵе ӧрын но вормонъёс басьтыны луэ, - вераськонмес йылпумъяса шуиз Надежда Меншариповна.

       Миляуша БУЛАТОВА.

Калтасы ёрос.

1590

Оставить сообщение:

НАШИ ПАРТНЕРЫ