Вераны кулэ, гурт поселенилы ужъёс, ужрадъёс ортчытонын трос юрттэт возьматэ татчы интыяськем ёросысь ӟеч возиськись хозяйство – «Колхоз Восток» СПК. Кужмо хозяйство луэмен, адямиос ужлы ёрмыса уг пуко.
Ми Вуж Варяше вуылыкумы, гурт поселениен кивалтӥсез уж муген ёрос центре вазиллям вал. Соин ик ми гурт поселенилэн администрациысьтыз ужъёсты нуисен Джанна Гайфуллинаен вераським. Нырысь ик со гурт поселенилэн администрацияз быдэстӥськем ужъёс сярысь вераз:
- Тупатъян ужъёслы ёрос администрация коньдон висъяз. Ужъёсты «Кедр» ООО быдэстӥз. Татын ваньмыз выльдэмын. Та юртэ ик почта ёзэт но фельдшерско-акушерской пункт интыяськемын. Шумпотымон, «Единая Россия» партилэн «Реальные дела» проектэз улсын гуртысь культура юрт вӧзы нылпиослы шудон площадка лэсьтэмын.
Кылем арын школаын тупатъян ужъёс лэсьтӥллям. «Италмас» нылпи сад но палэнэ кыльымтэ. Кема ӧвӧл культура юртын реконструкция ортчиз. Юртэз газэн шунто. Наняды гуртысь клубын но тупатъян ужъёс быдэстэмын.
Котькыӵе ӧрез басьты, вуж варяшъёс нырысетӥос пӧлын, шуыны луоз. Кылсярысь, туэ калыклэсь имущественной налог бичанын но соос висъяськизы.
Вуж Варяш гурт лыктӥсь-кошкисьёссэ «Трезвость – норма жизни» плакатэн пумита-келя. Гурт поселение республикаын радъяськем «Трезвое село» конкурсэ азинлыко пыриськыса, вормисьёс радын луиз угось.
Вуж Варяш гурт поселение пырись гуртъёсын – Будья Варяшын, Выль Варяшын, Вуж Варяшын но Нанядыын – улӥсьёс ужын но, спортын но, культурая ужрадъёсын но мукетъёслы адӟем карымон луо. Татын ӝӧквыл теннисэн шудонъя, волейболъя, капчи атлетикая но куасэн бызьылонъя ӵошатсконъёс ӵемысь радъясько. Кылсярысь, та нуналъёсы гурт администрациен кивалтӥсьлэн кузьымезлы «Минута славы» ужрад мынэ.
Кылсярысь, «Югдон» калык фольклор ансамбль (кивалтӥсез М. Шаритдинов). Сое ёросын сяна, республикалэн мукет ёросъёсаз но ӟеч тодо, солэн данэз бускель шаеръёсы но вӧлмемын.
- Азьпалан кыӵе ужъёс быдэстыны малпаськоды? – юасько Джанна Кахимзяновналэсь.
- Выль ар азьын лымылэсь лэсьтэм фигураослы ёрос конкурс ялӥське. Отчы пыриськыны малпаськом. Организациос сяна, гуртоосмы но та конкурсэ мыло-кыдо пырисько, - вера Д. Гайфуллина.
Огъя вераса, Вуж Варяш гурт поселениын арлэн котькыӵе вакытаз улон «пӧзе». Татысь калык ӟеч вуоноезлы оскыса, усто ужъёс быдэстон сярысь сюлмаськыса улэ.
Миляуша БУЛАТОВА.
Янаул ёрос.
Оставить сообщение: