Крезьгур эшъяськытэ, кужым сётэ

Калык творчествоя республика центрын ужасьёс 63 муниципал кылдытэтъёсы  вуылӥзы, сюрслы матэ коллективъёсты учкизы. Соосын огъя вить сюрслы матэ концерт номер дасямын вал. Калык творчествоя юртлэн 100 ар тырмонэзлы сӥзем фестиваль улсын, сцена вылэ 16 сюрс кырӟась-эктӥсьёс потӥзы. Та нуналъёсы соос пӧлысь устоосыз гала-концертэ пыриськизы. Соос пӧлын луиз Татышлы ёросысь Вязовкаысь «Уӵы ныл» калык фольклор ансамбль. Туннэ нуналэ республикаын 1112 «калык» но «образцовой» ансамбльёс лыдъясько. Та лыдпус кырӟан-эктонлэсь быронтэм кужымзэ возьматэ.

Гала-концертэз Уфаысь бальной эктонъёсъя «Радость» калык ансамбль усьтӥз. Та нуналэ республикаысь сизьым коллективъёслы калык ансамбль ним сётэмын. Со пумысен фестивальысь бадӟым шумпотонэн бертӥзы Калтасы ёросысь «Холмичи» но Янаул ёросысь «Хаят» театръёс. «Калык» ним сётэмзы сярысь свидетельствоосты БР-ысь культурая министр Амина Шафикова сётӥз.

- Культура удысын тыршисьёслэн сюлмаськемзыя, республикаямы ортчись ужрадъёс пӧлысь тросэз йылоллы пӧрмизы ни. Соосты быдэс шаерамы вылӥ дунъяло. 2020-тӥ арын республикаямы ортчоно фольклориада но асьмелэсь сюлмысь тыршеммес но ужрадъёсты ӟеч ортчытыны быгатэммес возьматэ, - вераз Амина Ивниевна.

Гала-концерт республикаысь пӧртэм калык ансамбльёслэн кырӟан-эктонъёсынызы узыр луиз. Кылсярысь, сцена вылын удмурт гуръёс чузъяськем улсын «Ялкын» ансамбльысь эктӥсьёс но поръязы.

Фестиваль азьланяз культура удысэз азинтонлы бадӟым кужым сётӥз. Зэм, со куд-ог тырмымтэосты но шараяз. Но, шӧдӥське, соос быдэстонтэм ӧвӧл.

Дасяз Ольга Нигаматуллина.