icon_gotop
18+
autorisation
Войти | Регистрация
Время в Татышле
15:57
Четверг, 28 Октября
Рекламный баннер 990x90px top

Сцена вылысь яркыт марӟанъёс

2015-12-10

Марӟанъёслы сӥзем ужрадэз Алла Кузнецовалэн «Дуннеын лыдъянтэм калыкъёс» кылбуреныз усьтӥз Кызыл-Яр школаын дышетскись Виктория Зарипова. Сое воштӥз Улысь Балтачысь уӵы куараё Ирина Шайхлисламова. Со «Тон но куно» но «Сюлэм куриське кырӟаны» кырӟанъёсты быдэстӥз. Учкисьёс кырӟасез туж шуныт пумитазы но келязы. Зал тыр чузъяськиз:

Ми - пересь песянайёс,

Аресмы но вань ини.

Мылкыдмес ке учкиды,

Чылкак дас тямыс али…

Закир Адуллинэн гожтэм шулдыресь такмакъёсты быдэстыса сцена вылэ потӥзы юбиляръёс – марӟанъёс.

Люкаськем калыклы тау карыса, соос арганчиоссэс – Рим Баймиевез, Флюр Ахметшинэз, Менсадик Сергеевез, репертуарысьтызы «Васько али Танып дуре» яратоно кырӟанзылэсь авторзэ Закир Адуллинэз – синпель кузьымъёсын пусйизы.

Дано ансамблез ӟечкыланы вуиз Улысь Балтач гурт поселенилэн администрациеныз кивалтӥсь Эдуард Рахимзянов. Со коллективлы но Лилия Садреевалы тау карон гожтэтъёс сётӥз. Марӟанъёсты БР-ысь удмуртъёслэн НКЦ-зылэн но ИКЦ-зылэн тау карон гожтэтэныз пусйиз Башкортостанысь удмуртъёслэн НКЦ-енызы кивалтӥсьлэн воштӥсез Юрис Саитов. Праздниклэн кузёосызлы вазиськыса со шуиз: «Шумпотымон, аресты шоры учкытэк, тӥ калык йылолъёсты азинтон сярысь сюлмаськиськоды».

Ансамбльысь котькуд «марӟанлы» Татышлы ёрос администрацилэсь но культурая управленилэсь тау каронъёссэс вуттӥз ёросысь культурая управлениен кивалтӥсьлэн воштӥсез Рустам Гарифуллин.

Та пумиськонын котькуд мылкыд карись марӟанъёслы шунытэсь кылъёссэ вераны быгатӥз. Кызыл-Яр школаен кивалтӥсь Иван Гайнияров, «Ошмес» газетлэн редакторезлэсь ужзэ быдэсъясь Ирина Самигулова, Башкортостанысь удмуртъёслэн ИКЦ-зылэн методистэз Ифира Гильфанова, гуртысь «Купанча» ансамбль, дышетскись Снежана Зиянгирова но ансамбле ветлӥсь песянайёсты ӟечкыланы дыртӥзы, Свердловск улосвылысь но ӟечкылан гожтэтъёс ыстӥллям. УР-ысь Калыкъёслэн эшъяськон юртсылэсь тау каронзэ но УР-ысь Калыкъёслэн эшъяськон юртысьтызы Россиысь удмурт диаспораосын ужанъя координаторезлэсь ӟечкылан кылъёссэ вуттӥз Татьяна Шайбакова.

Залын шып луиз. Кыл сётӥзы Лилия Садреевалы. Веранзэ со шулдыр кырӟанэз бордысен кутскиз. Тодаз ваиз 1995-тӥ арез. «Марӟанлэн» нырысетӥ вамышъёсыз, выль ужез ӧръяны юрттэм адямиос сярысь со вераз. Лилия апаез туж тунсыкъяськыса кылзӥзы.

«Кыӵе потэ, кыӵе потэ эмезен чай юэме» жингрес гурзэс кисьтыса сцена вылэ потӥзы Янаул ёросысь Вуж Варяшысь «Югдон» удмурт калык ансамбле пыриськисьёс. Марӟанъёс доры соос кузь сюресэз вакчи карыса вуиллям: тодматскыны, шулдыръяськыны, эктыны но кырӟаны. Озьы ик юбилеенызы ӟечкыласа шулдыресь кырӟанъёссэс кузьмазы Бигинейысь, Выль Татышлыысь, Вязовкаысь, Калмиярысь вуэм куноос.

Ужрадэ марӟанъёс Арибашысь эшъёссэс но ӧтиллям. Лилия Гараеваен Роза Шарафисламова залэ люкаськемъёсты ортчем аръёсы берыктӥзы кадь. Лилия апай юбиляръёслы аспӧртэм кузьымъёс дасям: нылкышноослы, вашкала аръёсы сямен, йырси пунэт кузьмаз, нош пиосмуртъёслы-арганчиослы  пуйы сётӥз. Роза апай егит дыръяз быдэстэм такмакъёссэ кырӟаса возьматӥз: выль кен нуон, армие келян но сюан гуръёсты тодаз ваиз.

«Сётэм сяськаме ӧд басьты кияд, верам кылъёсме ӧд поны пеляд…» - сцена вылэ потӥз Бальзюгаысь «Ошмес» ансамбль. Светлана Сабанчина юбиляръёслы сӥзьыса кылбур но гожтэм, солэн чуръёсаз «Марӟанлэн» кызь ар ӵоже азинскем сюресэз возьматӥське.

Ужрадэз «Ум люкиське» кырӟан йылпумъяз. Ӵошен кырӟан туж шулдыр пӧрмиз. Ужрадэ вуэмъёс ваньзы ӝутскем мылкыдын кошкизы. Та нуналэ марӟанъёслы котькин азинсконъёс но выль бадӟымесь вормонъёс сӥзиз.

Миляуша БУЛАТОВА.

Татышлы ёрос. 

2761

Оставить сообщение:

НАШИ ПАРТНЕРЫ