icon_gotop
18+
autorisation
Войти | Регистрация
Время в Татышле
05:46
Понедельник, 26 Июля
Рекламный баннер 990x90px top

Кылъёсты дышетэ, пӧртэм шаеръёсын тунсыкъяське

2015-12-02

- Катя, школаын дышетскон аръёсыд сярысь кыӵе тодэ ваёнъёсыд кылизы?

- Нырысь мон Пермь шаерысь Слудка гуртын улӥ, Чернушка городын дышетски. Бӧрысь атаеным но анаеным ӵошен Каменск-Уральск городэ улыны выжимы. Дас одӥг ар куспын мон куинь школаосын дышетски. Одӥгаз трос саклык висъяськиз спортлы. Мукетыз школа мыным англи кыллы но история предметлы яратон мылкыд пыӵатӥз. Куинетӥез школа трослы  визьмогес кариз, азьланяз дышетсконо факультетме бырйыны юрттӥз.

- Кызьы тон дышетсконо университеттэ бырйид? Кыӵе факультетэз йылпумъяд?

- Мыным пичиысен гуманитарной дисциплинаос капчиен сётӥськизы. Мон историез, обществознаниез яратӥ. Пӧртэм шаеръёсты но пӧртэм калыкъёслэсь кылзэс дышетон мылкыды бадӟым вал. Школаез Каменск-Уральскын йылпумъяса, мон А. М. Горький нимо Уральской государственной университетлэн международной кусыпъёсъя факультетаз дышетскыны пыри.

- Мукет калыкъёслэсь кылзэс дышетон мылкыдыд кытысь?

- Мынам семьяям котьку куинь кылъёсын вераськизы: удмурт, ӟуч но бигер. Мон понна ӟуч кыл матынгес луиз. Анае но атае монэным ӟуч сямен вераськизы. Пичи дырысен мон валаса будӥ: пӧртэм кылъёсты тодӥсь адями мукет культураослы матын луэ, аслэсьтыз культуразэ но узырмытэ.

- Кӧня кылъёсты то-дӥськод но кыӵе калыклэн кылыз тыныд тужгес кельше?

- Али дыре мон ӟуч кылэз но ӟеч тодӥсько шуыны уг дӥсьты. Малы ке шуоно, котькуд кыл ас сяменыз секыт но тунсыко луэ. Умой вераськисько англи но испанской кылъёсын. Испанской кыл - со кыл, кудӥныз мон кема дыр ӵоже вераськыса дышетски но улӥ. Трос эшъёсы испанской кылын верасько. Али дыре соос пӧртэм шаеръёсын уло. Эшъёсыным вераськыса мон выль выражениос, акцентъёслэсь пӧртэмлыксэс аслам испанской кылам кутыны быгатӥсько. Мон яратӥсько та кылэз, испанской кыл мыным роман кылысь мукет калыкъёсын вераськыны но юрттэ. Дыры луыку мон португальской, французской, итальянской кылъёсын гожтэм книгаосты лыдӟыны яратӥсько.

- Кыӵе шаеръёсын луид ни?

- Мыным пичи дырысеным ни пӧртэм шаеръёсы вуылон кельше вал. Али мон со малпанъёсме улонам пыӵатыны тыршисько. Та дырозь Испаниын, Турциын, Италиын, Грециын, Индиын луылӥ. Университетын дышетскыку, калыкъёслэсь культуразэс, кылзэс тодон вылысь, мон та шаеръёсы вуылӥ. Отын улӥсьёслэн кылынызы вераськонме волятӥ. Тулыс Стамбулэ шумпотыса вуыло на, отын мынам  матысь эше дышетске. Кематэк Индиетӥ путешествовать каро, Латинской Америкаетӥ ортчон сярысь но малпаськисько.

- Удмурт кылэз дышетыны мылкыдыд ӧвӧл-а?

- Башкириын мынам трос агайёсы, вынъёсы, сузэръёсы уло. Соосын мон ӟуч кылын вераськисько. Песяелэн Анфиса апаез но Татышлы ёросысь Улысь Балтач гуртын улэ. Жаляса верасько, та дырозь  удмурт кылэз ӧй дышеты. Мукет калыкъёслэн кылынызы тунсыкъяськон мылкыды удмурт кылэз палэнэ кельтӥз. Но удмуртэн асме шӧдӥсько, калыклэсь культуразэ но тодыны тыршисько. Песяелэсь кияз, чыртыяз  нуллон азвесь танкаоссэ мон ӵем нуллӥсько. Туала дӥськут вылын соос туж чебер адӟисько. Кин тодэ, оло, азьланяз удмурт кылэз дышетон борды но басьтӥсько на.

- Азьланезлы кыӵе малпанъёсыд?

- Али дыре ми Андре нимо егит испанецен семья кылдытыны малпаськомы. Семьяе одно ик путешествовать карыны яратоз. Нылпиосмы луизы ке, дуннелы усьтӥськемын эрико мед луозы шуыса сюлмаськомы. Туала обществоен кылдытэм предрассудокъёслэсь семьяе палэнтӥськыса улыны быгатоз шуыса малпасько. Со сяна, туала дуннелы ачим но маке ӟечсэ вайыны мед быгато. Ӟечлык лэсьтонме аслам семьяе бордысен кутско. Нылпиосы одно ик билинг луозы. Билингвизм - со огдыре кык пӧртэм кылъёсты валан но соосын  вераськыны быгатон. Али дыре мыным тросэз кельше: event-менеджмент но международной торговля, пӧртэм кылъёсты дышетон но туризм.

- Катя, мон малпасько, пӧртэм ласянь учкымон нылаш луыны улонад кин ке но юрттӥз?

- Нырысь ик, анаен атае. Анае пичи дырысеным умой дышетскемме куриз. Со мон азе котьку  бадӟым куронъёс пуктылӥз. Атае бадӟым нефтяной компаниын ужа. Сое дорысь туж ӧжыт адӟылӥськомы. Озьы ке но пичиысен атае валэктыны быгатӥз: дышетскон, маке выльзэ тодон - туж тунсыко уж. Собере анае но атае котькуд тунсыкъяськонме валаны тыршизы, соосты быдэстыны юрттӥзы. Туж эрико пинал луыса ке но будӥ, нравственной принципъёсы вылӥын луизы. Эшъёсы сярысь вератэк но уг луы. Соос пӧртэм шаеръёсын но континентъёсын уло, пӧртэм кылъёсын верасько. Но котькудӥз мыным маке но выльзэ, ӟечсэ сётэ. Эшъёсы - мынам кужыме.

Ирина Самигулова.

1364

Оставить сообщение:

НАШИ ПАРТНЕРЫ