Кырӟан сюлэмез буйгатэ

«Жингыртэ удмурт кырӟан» конкурс туэ кыкетӥ ползэ радъяськиз. Татышлы ёросысь культурая управлениен ӵош сое ортчытон сярысь сюлмаськизы Калмияр гурт поселенилэн администрациез но «Агро-Танып» СПК. Ёросысь культурая управлениен кивалтӥсьлэн воштӥсезлэн Р. С. Гарифуллинлэн верамезъя, конкурсэ 18 ареслэсь бадӟымъёс пыриськыны быгато. Но, жаляса верано, туэ соослэн лыдзы ӧжыт луиз. Сцена вылэ потыны 15 кырӟасьёс дӥсьтӥзы. Зэм, соос пӧлын луизы улонзэс та удысэн герӟам адямиос но. Учкисьёс соосты котьку сямен кужмо кичабонъёсын пумитазы. Соослэн жингрес кырӟанъёссы конкурслы аспӧртэм шӧм пыӵатӥзы, вуоно «кизилиослы» асьсэлэн кужымзылы оскон сётӥзы.

Кырӟасьёслэсь быгатонлыксэс куинь группаослы люкыса дунъязы. Егитъёс пӧлын, кылсярысь, яркыт воректӥз Калмиярысь Светлана Мардамшина. Жюри гала-концертэ солэсь «Куарадэ но вунэтӥ» кырӟанзэ бырйиз. Вераны кулэ, кырӟасьёс конкурсэ кык кырӟанэн вуизы: калык но эстрада.

Конкурс возьматӥз: удмурт кырӟасьёс та нуналэ тросгес Калмиярын. Со сяна, соос вань на Арибашын, Бальзюгаын, Вязовкаын, Выль Татышлыын, Улысь Балтачын. Нош кытысь «уӵыослэн» куараоссы тужгес чебер? Гала-концертэз йылпумъяса, учкисьёслы шулдыр удмурт гуръёссэ кузьмаз Вязовкаысь Лилиана Нуриахметова. Та вакытэ тросэз шӧдӥзы, вылды, сцена вылын – таиз арысь гран-прилэн кузёез. Соослэсь малпанъёссэс юнматӥзы «Агро-Танып» СПК-ысь агрономлэн Денис Мардамшинлэн кылъёсыз. Лилиана Нуриахметоваез со дипломен но дуно кузьымен пусйиз.

Вормисьёсты данъяны кыл сётӥськиз Калмияр гурт поселенилэн администрациеныз кивалтӥсьлы Ф. К. Ивановлы. Егитъёс пӧлын со куинетӥ степенё дипломен пусйиз Калмиярысь Анна Минлиаскароваез, кыкетӥен – Вязовкаысь Радис Гайниятовез. Нош нырысетӥ инты сётэмын Светлана Мардамшиналы. Куамын куать ареслэсь бадӟымъёс пӧлын яркытгес «пиштӥз» Калмиярысь Ирина Минлиаскарова. Кыкетӥ но куинетӥ интыосты люкизы кузёос ик – Александр Костин но Ефим Байрамшин.

Жюрилы секытэн сётӥськиз сцена вылысь «кизилиос» пӧлысь «кизилиосты» быръён. Озьы ке но соос нырысетӥ интыез Выль Татышлыысь Марина Низамовалы сётӥзы. Улысь Балтачысь Олег Марданов но Бальзюгаысь Фридман Кабипянов – кыкетӥ но куинетӥ интыосын. Кырӟасьёсты озьы ик пӧртэм номинациосын данъязы. «Башкортостанысь удмуртъёслэн НКЦ-зылэн Кенешеныз кивалтӥсьлэн нимысьтыз кузьымез» номинациын вормисе потӥз Улысь Балтачысь Янис Рафиков. «Оскон», «Агро-Танып» СПК-лэн нимысьтыз кузьымез», «Калык йылолъёсты утемез понна» но «Вормонэ кыстӥськемез понна» номинациосын данъямын Арибашысь Инна Зиянбаева, Калмиярысь Индира Шайсламова, Выль Татышлыысь Алевтина Миннимухаметова но Ульяна Гильманова.   

Жингыртӥз удмурт кырӟан. Вуоно аръёсы солэн гуръёсыз паськыт мед вӧлмозы вылэм. Удмурт калыклэн улоназ кырӟан вашкала дырысен ни бадӟым инты басьтэ угось.

  Ольга    НИГАМАТУЛЛИНА.

Татышлы ёрос.