icon_gotop
18+
autorisation
Войти | Регистрация
Время в Татышле
02:47
Пятница, 29 Марта
Рекламный баннер 990x90px top

Котыре мед вӧлмоз удмурт калыклэн данэз

14:42 12.11.2015

Съездэз усьтыса вераськиз Татышлы ёрос администрациен кивалтӥсь Рушан Гараев. Со удмуртъёслэн национально-культурной центрзылэсь ӟеч ужъёссэ пусйиз, дас укмыс ар ӵоже центрен кивалтэм Ренат Галямшинлы тау кылъёссэ вераз, азьланяз тазалык, шудбур сӥзиз.

Башкортостан Республикалэн Тӧроезлэсь Рустэм Хамитовлэсь ӟечкылан кылъёссэ вуттӥз БР-ысь Тӧролэн общественно-политической азинсконъя управлениысьтыз национальной политикаез азинтонъя ёзэтэныз кивалтӥсьлэн воштӥсез Илшат Ханов.

- Ми оскиськом, та съезд национальной политикаез юнматонын бадӟым вамыш луоз. Уго национальной политика – со кышкытлыкъёслэсь утиськон, ас калыктэ но тонэн артэ улӥсь калыкъёсты гажан, калык культураез азинтон, вордскем шаерез яратон но утён, - вераз Илшат Нафкатович.

Озьы ик съездын ӟечкыланъёссэс но тау карон кылъёссэс веразы БР-ысь Кун Собранилэн-Курултайлэн депутатэз, ветеранъёслэн ужъёссыя, социальной политикая но тазалыкез утёнъя комитетэн кивалтӥсь Николай Никитин, БР-ысь Культурая министерствоысь ведомствоос куспысь секторен кивалтӥсь Айгуль Зулкарнаева, БР-ысь Кун Собранилэн-Курултайлэн депутатэз, журналист, «Дознание» программалэн авторез но нуисез Ильдар Исангулов, «Удмурт Кенеш» ассоциацилэн вице-президентэз Валерий Хохряков, УР-ысь Калыкъёслэн эшъяськон юртысьтызы Россиысь удмурт диаспораосын ужанъя координаторез Флюра Чибышева.

- Калыкез огазеян – капчи уж ӧвӧл. Со понна вакыттэ, тазалыктэ, огъя вераса, номырдэ жалятэк тыршоно. Нош кӧня кужым кулэ? Ренат Биктимирович быгатӥз удмуртъёслэсь данзэс ӝутыны. Со котькытын  гажано адями. Тодӥсько, солэн нимыз аспӧртэм пароль выллем луэ. «Галямшин» ке шуид, усьтӥськымтэ ӧсъёс но усьтӥсько, – данъяськыса вераз Флюра Ахметовна.

Дуно куноос пӧлын луизы БР-ысь Калыкъёслэн эшъяськон юртэнызы кивалтӥсьлэн воштӥсез Ильшат Сабитов, БР-ысь поръёслэн «Эрвел Марий» национально-культурной автономиенызы кивалтӥсь Павел Бикмурзин.

- Ренат Биктимировичен мон кема аръёс тодмо ӧвӧл ке но, солэн ужъёсыз мыным тодмо. Макем бадӟым уж со лэсьтӥз аслаз калыкез, анай кылзэ утён но ӝутон понна. Национально-культурной центр кылдэм дырысен пӧртэм интыосын улӥсь удмуртъёс ог-огзы сярысь тодӥзы, матысь кусыпъёс возьыны кутскизы, - съездэ лыктэмъёслы вазиськыса шуиз Башкортостанысь Финн-угор калыкъёслэн ассамблеяенызы кивалтӥсь Юлия Герасимова.

Ужрадын тужгес но сюлэмшугъяськытӥсь юанъёс, ужпумъёс сэрттэмын-пертчемын вал. Сыӵеос пӧлын: удмурт кылэз дышетон, утён но азинтон. Кызьы пусйиз В. Хохряков: «Кыл бордысь ваньмыз потэ. Кыл ке быриз, калык но быроз». Озьы ик гуртъёсын школаослэн ворсаськемзылы бадӟым саклык висъяськиз, «Усточикар» лагерьлэсь ужзэ азинтон сярысь но вераськон мынӥз.

Ужрадын удмуртлыкез, анай кылэз, культураез, сям-йылолъёсты паськытатон вылысь азинлыко тыршисьёсты данъян грамотаосын пусйизы. Съездлэн делегатъёсыз матысь ньыль арлы валтӥсь уж ӧръёс, НКЦ-лэсь Кенешсэ бырйизы. Съездлэн йылпумъянъёсызъя резолюция кутэмын. Со сяна, Быдэс Россиысь удмуртъёслэн съездазы делегатъёс быръемын.

 БР-ысь удмуртъёслэн НКЦ-зылы кивалтӥсе быръемын Татышлы ёросысь культурая управлениен кивалтӥсь Салимьян Гарифуллинович Гарифуллин. Делегатъёслэн ӵектэмзыя, Ренат Галямшин НКЦ-лэн дано кивалтӥсеныз ялэмын. Ужрад бадӟым, шулдыр концертэн йылпумъяськиз.

Миляуша БУЛАТОВА.

6420

Оставить сообщение: