Башкортостанысь удмуртъёслэн национально-культурной центрзы 1996-тӥ арын кылдытэмын. Та дыр ӵоже со бадӟым кужымлы пӧрмиз, мукет огазеяськонъёсын, республикаысь кун но муниципал кивалтэтэн юн кусып тупатӥз. Со удмурт калыклы пӧртэм ласянь азинскыны юрттӥз.
Берло аръёсы анай кыллы кун кивалтэтэн бадӟым саклык висъяське. Республикаямы удмурт кылэз 22 школаосын но 21 филиалъёсын, 10 нылпи садъёсын но 9 группаосын дышето. Нылпи садъёсын ужасьёслэн но анай кылэз улӟытонын люкетсы шӧдскымон. Соос пиналъёсты удмурт калыклэн историеныз, уженыз, культураеныз тодмато.
2012-тӥ арын республикаысь дышетонъя министрлэн А. С. Гаязовлэн кичӧлтэмезъя, Татышлы ёросысь Улысь Балтач школаын «Педагогические условия формирования успешной личности в национальной (удмуртской) школе» экспериментальной площадка кылдытэмын. Со 2015-тӥ арысь коньывуон толэзе нимзэ утьыны быгатӥз. Оскиськом, матысь дыре республикаямы удмурт гимназия усьтӥськоз. Нылпиосмы понна со бадӟым кузьым луысал.
Но, жаляса верано, берло аръёсы школаосын анай кылэз дышетонлы ӧжытгес дыр висъяське. Со сяна, оптимизациен сэрен, тросэз школаос пытсасько. Соос пӧлы удмуртъёсыз но шедё. Нош анай кыл ке быриз, кызьы тодмо, калыкмы но быроз.
Анай кылэз утён но азинтон дышетон удысэн гинэ герӟаськемын ӧвӧл. Та ласянь бадӟым юрттэт возьматэ «Ошмес» газет но. Со удмурт калык кие нырысьсэ 1999-тӥ арын вуиз. Табере асьмеос арнялы быдэ выль иворъёсты анай кылынымы лыдӟыны быгатӥськомы. Газетлэн учредителез Башкортостанысь Правительство.
Национально-культурной центрлэн одӥгез бадӟым ужпумез – калык культураез утён но азинтон. Кун кивалтэтлэн но ёрос администрациослэн юрттэтсыя пӧртэм калык праздникъёс, фестивальёс, смотръёс ортчыло. Республикаысьтымы ёросъёсын фольклор коллективъёс кылдытэмын. Соос пӧлысь тямысэзлы - Татышлы ёросысь «Шулдыр ӝыт», «Марӟан», «Уӵы ныл», Балтач ёросысь «Чибориё», Янаул ёросысь «Югдон», Калтасы ёросысь «Ингур», Бурай ёросысь «Инвожо», Ермекей ёросысь «Зангари» ансамбльёслы - калык ним сётэмын. Со сяна, Татышлы ёросын ужало на «Ӟеч малпанъёс», «Удмурт пиос» калык ансамбльёс, пиослэн «Ӧрӟи» калык вокал коллективзы, «Ложкари» нылпи образцовой коллектив, духовой но ӟуч калык инструментъёсъя оркестръёс.
Туннэ шумпотыса вераны луэ, Башкортостанысь удмуртъёс регионъёс, калыкъёс куспын ортчись конкурсъёсысь бадӟым вормонъёсын берто шуыса. Озьы Альфира Камалтдинова но Алёна Тимерханова 2012-тӥ арын Санкт-Петербургын ортчем «На крыльях таланта» калыккуспо фестивальын Гран-при утӥзы. Нош сузэръёс Линда но Алина Гильмановаос «Финно-угорский транзит» калыккуспо фестивальысь (Ижевск, 2014) «Наследники традиции» номинациын нырысетӥ степенё дипломен берытскизы. Нош туэ «Марӟан» ансамбль Москвае «Гербер» шулдыръяськонэ вуылӥз.
Троссэ ужрадъёсты ортчытон йылоллы пӧрмемын. Кема аръёс ӵоже ни дано удмуртъёслэн пумиськонзы, нылпи творчествоя фестиваль радъясько. Фестивальын пиналъёс пӧртэм ужъёслы дышетско, ог-огенызы тодматско, кенешо. 2004-тӥ арысен, БР-ысь физической культурая дано ужасьлэн Г.Ю. Тимирбаевлэн кичӧлтэмезъя, арлы быдэ нылпиос пӧлын олимпи шудонъёс ортчыло. Спортэз гажасьёс волейбол площадкаосын «Ошмес» газетлэн но национально-культурной центрлэн кубокъёссы понна нюръясько.
Башкортостанысь удмурт нылпиослы азьпала вамыштыны «Усточикар» лагерь но бадӟым юрттэт возьматэ. Со 2003-тӥ арысен ужа. Сое радъяны национально-культурной центрлы юрттӥзы Башкортостан Республикаысь но Татышлы ёросысь егитъёслэн ужъёссыя комитетъёс, Удмурт Элькунысь Йӧскалык политикая министерство, «Шунды» огазеяськон но Удмурт Элькунысь «Шундыкар» лагерьлэн кивалтэтэз. «Усточикарын» арлы быдэ 100-лэсь ятыр пиналъёс шутэтско, быгатонлыкъёссэс волято. Лагерь республикаын одӥгез устоез профильной лагерен ке но лыдъяське, татын арысь аре коньдон ласянь шугъяськонъёс юнгес шӧдӥсько. Соин милям ёросъёсысь дышетонъя ёзэтъёслы одӥг куронмы: нылпиослэсь «Усточикар» лагерьын шутэтсконзэс арлы чаклам бюджетэ пыртоно.
Национально-культурной центр трос ужъёс быдэстӥз удмурт калыклэсь осконзэ, сям-йылолъёссэ улӟытон ласянь. Табере арлы быдэ котькуд ёросын вӧсьёс радъяськыло. Татышлы ёросысь Улысь Балтачын но Выль Татышлыын Вӧсь корка пуктэмын. Кызетӥ даурысь 30-тӥ арозь «Элен вӧсь» ортчылэм. Отчы Бирск уездысь удмуртъёс люкаськылӥллям. Вӧсь Бурай ёросысь Алтауын, Янаул ёросысь Вуж Варяшын но Пермь шаерысь Куеда ёросысь Киргаын ортчылэм. 2008-тӥ арын «Элен вӧсь» выльысь улӟытэмын. Со сяна, арлы быдэ «Вӧй», «Быдӟынал» йылол праздникъёс ортчыло.
Удмурт огазеяськонмы трос пол ни Эстониысь , Финляндиысь, Венгриысь куноосты пумиталляз. Ӵыжы-выжы калыкъёсмы котьку паймылӥзы асьмелэн сям-йылолъёсмес, кылмес утьыны быгатэммылы. Национально-культурной центрлэн Кенешезлэн ёзчиосыз но республикамылэн палэназ ортчись научно-практической конференциосы ӵемысь пыриськыло. Хельсинкиын (Финляндия), Таллинын (Эстония), Ханты-Мансийскын (Россия), Шиофокын (Венгрия) ортчем финн-угор калыкъёслэн конгрессазы делегатъёс луизы Р. Б. Галямшин, Ю. М. Садыров, Ю. С. Саитов, Т. Н. Шайбакова. Конгрессъёсын анай кылэз утёнэн, егитъёслэн политикаенызы, тазалыкез, калыклэсь лыдзэ утёнэн герӟаськем ужпумъёс эскеремын.
Бадӟым уж нуиське гуртысь егитъёсты дышетон ласянь, малы ке шуоно, МАФУН-лэн ӧнерчиосызлэн пусъемзыя, соос пӧлын вылӥ тодон-валанэн адямиос ӧжыт. Соин матысь кусып возиськом Нефтекамскысь педколледжен, Ижевскысь медакадемиен, Ижевскысь культурая колледжен.
Вераны кулэ, республикаямы финн-угор калыклы азинскыны паськыт сюресъёс усьтэмын. Со понна туннэ удмурт калыклэн нимыныз тау карон кылъёсме верасько Башкортостан Республикалэн Тӧроезлы Рустэм Хамитовлы, Удмурт Элькунлэн Тӧроезлы Александр Соловьёвлы; Башкортостан Республикаысь Правительстволы, Культурая, Дышетонъя, Егитъёслэн политиказыя, спортъя но туризмъя министерствоослы, БР-ысь Калыкъёслэн Эшъяськон юртсылы; Удмурт Элькунысь Йӧскалык политикая, Дышетонъя министерствоослы, «Удмурт Кенеш», «Шунды» огазеяськонъёслы; удмуртъёс тросэн улоно ёросъёслэн администрациосынызы кивалтӥсьёслы, дышетонъя но культурая ёзэтъёсынызы кивалтӥсьёслы, гурт поселениослэн тӧрооссылы; НКЦ-лэн правлениезлэн ёзчиосызлы, удмурт школаосын но нылпи садъёсын кивалтӥсьёслы но витетӥ съездлэн делегатъёсызлы но куноосызлы. Со сяна, вераме потэ на: НКЦ-лэсь котькуд ужрадзэ ортчытыны юртто гурт хозяйствоосын кивалтӥсьёс но ужбергатӥсьёс.
НКЦ-лэн выль Кенешезлэн ёзчиосызлы азьпалан таӵе ужпумъёсты бадэстон бордын ужано:
- Удмурт калык пӧлын демографической югдурез эскероно, кылдэм шуг-секытъёсты палэнтоно.
- Национально-культурной центр борды егитъёслэсь огазеяськонзэс кылдытоно.
- Удмуртъёс улоно ёросъёслэсь кусыпъёссэс юнматоно.
- Татышлы ёросысь Бальзюга гуртысь РФ-ысь сӥё-дано суредасьлэн, Удмурт Элькунысь дано суредасьлэн Менсадык Гариповлэн юртаз удмурт корка тупатонэз йылпумъяно. Со Башкортостанлэн уйпал ёросаз этнотуризмез азинтонын нырысетӥ вамыш луысал.
- Ужан планэз ёрос администрациосысь ёзэтъёсын юнматоно.
Съездлэн ужаз пыриськисьёслы но удмуртлыкез азинтон понна ӝуась адямиослы бадӟым тау. Сӥзисько тӥледлы тазалык, шуд, уж дурады азинсконъёс.
Оставить сообщение: